Rajaei birau pasang iek, mbaoh tangin brei tapa Quy hoạch tỉnh Bến Tre vaktu 2021-2030, pamong tal thun 2050. Tui nan, tal thun 2030, tỉnh Bến Tre kham merat jeng tỉnh cak rok patagok mbiah di negar; hu dom ha tang KT-XH sumu gauk; pataom tame cak rok patagok kinh te tasik; kong nghiep che bien, che tao saong nang luong birau pambuak pagam haong alam moi truong, sinh thai saong lagaih haong bruk BĐKH; hu đô thị birau, palei pala rilo ilamu siam gheih, dulich rilo urang takre; quoc phong, an ninh xa hoi hu tani tanat… Tal thun 2050, Bến Tre jeng labik njuak daok, hu dom do thi birau, thong minh, alam langik tasik hijao, hacih.

Liên đoàn Lao động TP.HCM meda peih danak dak “blah harak vé anit ranam”, harei palao saong alin pandap ka urang ngak mai palei raok Tết Nguyên đán thun sak inegirai 2024. Dom urang hu alin harak ve lac dom urang di công đoàn, brei dahlau di abih ka dom urang ngak tapak di doanh nghiệp, hadei di nan meng pasang iek alin ka urang ngak bruk dalam jabat. Abih di nyu nan lac, công đoàn dom labik chế xuất, labik ngak kong dalam ban raya meda peih danak dak “sruh radaih bilan xuân” mbang ka 4. Tapa nan daong abih tih yaom harak ve radaih pui ba 500 sang đoàn viên naih gheih mai palei raok tết.

Peih ngak Danak dak pakat negar cak rok patagok KT-XH bhum urang bangsa takik saong bhum ceik vaktu 2021 -2025, dom puk palei dalam tỉnh Ninh Thuận  hu ieu pataom prein yava jien padai padang ngak rilo baoh sang  birau  ka urang kathaot. Meng thin 2022 mbiah tal ini, Ninh Sơn padang hu 185 baoh sang ka dom urang kan kathaot, kuhria tui jien 7,6 tỷ đồng. Gilang pariak sarak karja peih jien ka urang kathaot mesraiy abih tih jaik 7 tỷ đồng. Huyen Bác Aí jeng daok  ngak brei salah harak gal  piah padang ngak birau 128 baoh sang ka dom urang kathaot kuhria tui jien jiak 59 tỷ đồng. Tapa nan, daong dom baoh sang bhum urang bangsa takik hu tani tanat raidiuk, yam tapa truh kathaot hu khang kajap.

 Akaok UBND tỉnh Cà Mau bahrau hu harak payua Thủ tướng Rajaei pasang iek, daong phun jien 2.070 tỉ đồng piah langyah, ngak pasiam veik bruk glut jaleih takai tasik atah jaik 43 km. Tui UBND tỉnh Cà Mau, 10 thun tapa, takai tasik di tỉnh glut jaleih dak harei dak trak damak, tinh hu ieu pataom yaok gah piah pasiam veik dom kan kandah kayua glut jaleih. Min, kayua bruk glut jaleih biak praong, labik glut jaleih biak khang min tinh kurang jien ngak.

Rilo tỉnh di bhum taneran kraong Cuu Long daok tame bilan yuak padai Thu Đông, yaom padai daok glong saong daok tagok. Di tỉnh Kiên Giang, rilo palei yuak blaoh, yaom padai tagok glong labaih 100 đồng sa kilo dut saong adit dahlau, dalam nan yaom padai that IRR 50404 meng 8.900 - 9.000 đồng sa kilo; padai Đài Thơm 8 yaom pablei meng 9.200 - 9.400 đồng sa kilo. Tỉnh Đồng Tháp jeng yauk jaik blaoh, padai yuak hu 60 tạ / ha. Yaom padai pablei di mblang hamu lac 9.200 đồng sa kilo,  hu labik pablei tal 9.400 đồng sa kilo. Kaoh tabiak  abih jien buh tame ngak, bilan padai Thu Đông di Đồng Tháp  laba hu labaih 30 trieu dong sa hecta, tagok 15 trieu dongsa hecta dut saong tukvak ini thun dahlau.

Danak dak alam Môi trường Liên hợp quốc brei thau, yaom lac hu kuhria tal bruk cakak trun carbon di dom taneh ia, min baoh taneh daok mboh pandiak tagok tal tanut trak damak meng 2,5 độ C tal 2,9 độ C di thun 2100. Tok pamaong tame dom sarak saong bruk kham marat cakak trun  dom nerak urak ini, ye bruk pandiak tagok di dunya meda pandiak jang tal 3 độ C di thun 2100. Kayua yau nan ye, Danak dak alam Môi trường Liên hợp quốc ieu dom taneh ia hu bruk kinh te cak rok patagok glaong abih di dunya njauk taduan labaih 80% dom nerak tathuak tabiak, njauk ba akaok nao dahlau dalam bruk cakak trun.

Ceik pui Dukono di tỉnh Bắc Maluku, bhum Đông Indonesia daok pruh dhun mun bau glong jiak 2.000m. Dalam melam blaoh hu 24 mbang pruh megei baoh taneh ngan haong got bau dhur mun  dak harei dak glong. Jabat chuc nang palei pachreih bhap bini juai nao tame labik mbuan gaok bala atah vin taom dar pabah ceik pui 2km; caga siuk tanyiak pacang mbaok  piah plaik  dhur mun ngak jhak tal prein yawa. Ceik pui  Dukono glong labaih 1.100 m, lac sa dalam dom baoh ceik apui daok megei khang di Indonesia.

Baoh tamo Napoleon bhian ma-aom tuk ong ngak Patao hu pablei  yaom 2,1 triệu USD dalam mbang to yaom bahrau ini pak langiu ban ine Paris, France. Ini lac baoh tamo jhuk, praong, sa dalam takik baoh tamo bo Napoleon ma-aom tuk ong pan akaok negar France abap 19. Urang pablei to yaom oh ndem tabiak angan atau daok di negar halei urang blei hu baoh tamo ini. Po klak di baoh tamo ini lahik di thun blaoh, ong buh tabiak mateh abap piah pataom dom pandap panda klak, phao, kiếm saong jien xu zaman Napoleon.