Di mbang nyaom online di Akok UBND TPHCM Phan Văn Mãi haong dom tỉnh Bình Dương, Đồng Nai, Bà Rịa - Vũng Tàu, Long An ka bruk caga ho so danak dak jalan Vành đai 4 TPHCM, TPHCM saong dom tỉnh njauk gauk  kham merat kuhria phun jien piha peih ngak danak da. Ta-eng tỉnh Long An,  danak dak nao tapa tỉnh atah labaih 78km, phun jien labaih 43.000 tỷ đồng. Kayua kan kandah ka phun jien yau nan ye Long An likau Karja daong 33.000 tỷ đồng. Akok UBND TPHCM caong khin dom tỉnh samar ngak brei salah harak ho so pathau khan roh duah bruk ngak dom danak dak payua UBND TPHCM.

Bruk salih pandar taka so tame bruk pacang caga taong chap kaya ikan hadang  tui Hukum IUU daok hu tỉnh BR-VT peih ngak sumu dalam bruk khik iek dom kapal gilai ikan, tui kuhria iek kaya tasik mek hu, brei thau taong chap meng halei mai. Urak  hu 3 bruk ngak ta-eng  khik iek bruk taong mek ikan lac: phan mem khik iek ikan hadang, khik iek gilai saong phan mem langyah bruk ngak suan bruk ba tabiak di IUU. Tapa nan, tapen gilai ikan hu khan brei thau hu hadom gilai tame atau tabiak tasik yaok harei, hu harak gal cambaic laic, brei thau hu hadom kaya tasik, taong chap meng halei mai.

Hu mbaok harei jum pataom bangsa di palei Phú Thuận, xã Phú An, ban Bến Cát, tỉnh Bình Dương, ong Nguyễn Văn Lợi, Bí thư Tỉnh ủy Bình Dương taong yaom glong dom bruk ngak hu siam mekre di palei Phú Thuận mek hu dalam thun 2024. Tui nan, brei mboh dom bruk ngak hu jak jeng di tỉnh Bình Dương tukvak tapa  mai meng prein khang bruk jum pataom, njauk hatai di bhap bini. Ong Nguyễn Văn Lợi caong khin urang jakar, bhap bini palei Phú Thuận patagok bruk dan chu di bhum palei, peih ngak tui jalan “ Bhap bini thau, bhap bini biai, bhap bini pasang iek, tui iek, bhap bini taduan kein lagaih”. Njauk brei kham merat abih hatai  dalam bruk peih bruk pandar taka so, padang ngak rahra taka so; khik brei salamat puk palei.

Tỉnh An Giang sap pagap peih bruk Pahadar 200 thun ngak salah ribaong Vĩnh Tế (1824 - 2024), di Labik yulit pakat negar Núi Sam, phường Núi Sam, TP. Châu Đốc. Akok UBND tỉnh An Giang Hồ Văn Mừng khan lac, ini lac tuk piah manuac sia  hadar dhar phol praong  di dom urang peih taneh, padang palei; iek praong ribaong  Vĩnh Tế lac sa danak dak praong hu sajarah dakrai, brei mboh akaok sahaneng, prein ngak bruk hadah karah di ong muk kei dahlau diah. Tỉnh An Giang  daok jhul pakhang rilo bruk ngak piah pahadar, bruik buh ralo prein yawa biak praong di ong Thoại Ngọc Hầu saong rahra dalam bruk kuac rok ribaong padang ngak Vĩnh Tế.

Sở Ilamo, Padhih saong Yulit tỉnh Sóc Trăng pambuak haong Gah kỷ lục Việt Nam VietKings peih ngak “danak dak parang iek Alat ragam Ngũ âm di urang Khmer  tỉnh Sóc Trăng hu peih ngak praong abih di Viet Nam”. Ini lac janih nghe thuat biak siam gheih, hu urang bangsa Khmer biak takre nyu hu dalam raidiuk ilamo bhap bini yaok harei. Yau nan ye, tapa bruk ngak nan daong cakrok patagok ilamo siam gheih meng kan di urang Khmer.

Hadei tuk hu palih ruak veik Thu tuong mbang ka 103 di negar Japon Thủ tướng Ishiba Shigeru ba drei tame ngak bruk chip padang rajaei rai birau.  Thủ tướng Ishiba khan lac dom sarak di Rajaei birau kuhria iek tui 5 bruk praong: chinh tri, kinh te, tani tanat raidiuk xa hoi, khik salamat taneh ia saong bruk pambuak gah langiu negar. Tui ong Ishiba, dalam dom bruk ngak nan, rajaei birau brei iek praong 3 bruk nan lac: an ninh – quốc phòng; salamat palei negar saong pacang caga bala meng langik tasik, puac abih lac jalan ngak mbang birau ba negar Japon patagok.

Trung Quoc birau khan brei thau sarak tacei pato piah dut iek saong jru ruak lameh labaih kilo. Tui nan, urang pachreih brei mbang huak tui yaok labik piah hu plaik njiak hu lameh siam, tui nan lac yau sa jalan khik iek alam dunya saong moi truong. Dom urang ilamo tacei lac, oh lac Trung Quoc  bo dom taneh ia karei  jeng daok kan kandah prein yawa dreih yau gauk saong moi truong meda hu siam meng bruk mbang huak nan.   

Gah Y te Dunya brei da-a mai ginum biai di Ủy ban Khẩn cấp di adit anak piah brei thau ruak đậu mùa khỉ daok ngak jhak tal prein yawa manuac sia di dunya ha-oh. Kuhria tal harei 3/11, urang ruak saong mbuan si ruak  tagok tal 47 ribau mbang, ralo di bhum Châu Phi, takik di nyu lac 1000 metai. Dom mbang vaccine hu dalam bilan  ini brei parabha  ka 9 taneh ia hu rilo urang ruak trak damak abih./.