UBND TP.HCM bahrau hu harak payua tagok Thường trực HĐND TP likau padang ngak sarak adat mek jien lệ phí tuk peih ngak dom jit vu kong online. Tui panuac ba tabiak nan, ban raya oh mek jien di 5 janih adat lac hộ tịch, jien pabak harak adat ka urang negar langiu ngak bruk di Việt Nam, jien likau ngak adat padang ngak, jien tut angan pablei salih, jien pabak harak pok brei angan quyen pandar taneh, quyen ngak po sang, drap ar pambuak haong taneh ka rahra saong doanh nghiep tuk pandar jit vu kong online.

UBND tỉnh Đồng Nai brei patabiak jalan peih ngak bruk pakacah pilih ruah “Hatai sahneng quy hoạch ban mblang kapal haoh Long Thành saong bhum jaik taphia”. Bruk pakacah ini piah dui pachreih dom hatai sahneng quy hoạch, hadah krah, gheih mekre meng dom urang ilamu, urang quy hoạch dalam saong langiu taneh ia. Tapa nan, pilih ruah jalan ngak siam di abih, pabak ka bruk quy hoạch, padang ngak, ilamu, kein laba KTXH, QPAN saong khik caga alam langik tasik. Tapa pakacah bei pasang iek, pilih ruah dom hatai sahneng gheih, bahrau, hu makna praong piah ba tame đồ án ramik veik quy hoạch ban Long Thành tal thun 2045.  

Bhum Tây Nguyên saong Nam Bộ daok tame bilan glai salih hala, tal thực bì thu ngak ka rilo binah glai mbuan khuah glaong. Tui Cục Kiểm lâm, urak ini hu 114 labik glai mbuan khuah pakat 5, lac pakat biak mbuan si khuah di abih saong 120 labik mbuan khuah glai pakat 4, lac pakat kan kandah, rah tui grauk labik di bhum Tây Nguyên saong Nam Bộ. Tui kuhria mboh dahlau, mboh lac langik pandiak thu lagu meda dui atah takik di nyu lac 10 harei anak tal, độ ẩm bier jang tok daok labaih 30 - 50%, nhiệt độ glaong, abih di nyu nan lac bhum gah maraong negar hu labik pandiak meng 35 - 37 độ C. Dalam tuk langik yau urak ini, rahra njauk padeih dom bruk ngak yau cuh danko mek ia hani, cuh puh pakak.

Sa tal bac palahik bruk oh thau akhar haroh ka bhap bini bangsa S'tiêng daok di xã Long Tân, huyện Phú Riềng, tỉnh Bình Phước hu peih tabiak di puac bilan 7 thun blaoh. Tal bac ini hu 35 anek saih, dalam nan hu rilo gu, rilo yau lac amuk haong taco, anek saong ame, amaik saong anek, adei haong sa-ai ... Yaok urang tame bac jeng hu hatai caong thau bac, thau vak. Ini lac tal bac dalam danak dak bruk ngak negar ka palahik bruk oh thau akhar haroh. Tal bac tui kuhria hu tamat di jhung thun ini.

Dua danao raong arieng tasik praong labaih 7ha di ong P.V.B. pak xã Nam Thái A, huyện An Biên, tỉnh Kiên Giang hu arieng metai biak rilo, tui kuhria khat lahik labaih 90%. Karja palei daok tame bruk pasang iek, duah thau makna ba tal bruk arieng metai ini. Tui UBND xã Nam Thái A arieng tasik (janih arieng gạch) di darak pasa hu urang mai blei yaom meng 400.000 - 450.000 đồng/kg. Arieng y yaom meng 250.000 - 300.000 đồng/kg. Kayua yau nan ye, bruk arieng tasik raong di sang ong B. metai biak rilo nan meda ngak khat lahik biak praong tal bruk ngak mbang di sang.

Pambuak gauk ngak du lịch tui jalan ngak lac "6 taneh ia, sa labik tal" piah dui pachreih rilo tuai mai tal ASEAN. Ini lac sa dalam dom asal kadha hu Thủ tướng Thái Lan saong Thủ tướng Malaysia ginum biai di mbang taom gaok di dua gah rah tabiak harei kabroi tuk 2 Thu tuong mai hu mbaok dalam nyaom biai pakat glaong ASEAN - Australia 2024. Dua Thủ tướng Thái Lan - Malaysia hu ginum biai ka bruk pambuak gauk ngak du lịch tui jalan "6 taneh ia, 1 labik tal" piah jhul tagok du lịch haong gauk di Lào, Campuchia, Myanmar, Thái Lan, Việt Nam saong Malaysia. Dua gah jeng njauk gauk brei pambuak bruk piah khik kajap bruk nao mai mbuan lagaih di dua taneh ia tapa yaok jalan tapen negar, jeng yau jhuk patagok bruk sron mbon saong siam mekre salamat di bhum gah meraong Thái Lan.

Bilan laar thun ini di Nhật Bản hu độ ẩm biak karei oh ka bhian mboh tuk nhiet do glaong jang tanut yaok thun lac 1,27 độ C. Tui dom urang roh duah ilamo, langiu di bruk lac kayua baoh taneh pandiak tagok, sa makna karei lac langik hangin gah pai, daok ieu lac hangin jaik nhiệt đới nyu ngak brei salih jalan rilo jang nao gah barak, jaik Nhật Bản, ngak brei tagok jang tukvak langik pandiak tagok di dalam taneh ia ini. Langik ini daok ba tal bruk oh samu gauk di nhiet do di harei saong melam biak praong jang. Dom urang ilamo mboh lac,  bilan pandiak thun ini Nhật Bản meda hu rilo mbang pandiak biak khang ka oh bhian mboh.

Gah y tế Brazil daok ngak iek sa danak dak pabam pajaih janih jamaok ba tui vi khuẩn Wolbachia meda ngak brei klaih klaoh bruk pambak ruak piah daong ka dom ban praong pacang veik ruak pandiak tabiak darah daok njaom mbak khang di taneh ia ini. Di jhung thun 2023, Bộ Y tế Brazil hu khan brei thau bruk padang ngak sa sang mac praong piah pabam pajaih janih jamaok ba vi khuẩn Wolbachia. Tui kuhria, dalam 10 thun tal, sang mac ini meda ngak hu 100 triệu baoh jamaok yaok adit, rilo jang 10 mbang prein ngak urak ini./.