Mban Khik ramik Salamat Pandap mbang TP. Hồ Chí Minh daok patagok kapul pasang iek salamat pandap mbang, gam haong nan jeng pambuak haong Cục Khik ramik darak pasa ban raya piah pacang caga pandap ja. Amuk Phạm Khánh Phong Lan, Akaok Mban Khik ramik salamat pandap mbang TP. Hồ Chí Minh brei thau lac, piah khik kajap salamat pandap mbang ka rahra dalam tuk Tết Nguyên đán sak ine girai thun 2024, mBan khik ramik hu padang 11 kapul pasang iek, pataom tame pasang iek labik ngak, abih di nyu nan lac dom labik kho pandap, dom pandap tamo piah caga ka bruk ngak. Meng ini tal Tết, meda pataom tame rilo jang di dom gah parabha, meng dom darak pasa praong tal darak meng kan, dom siêu thị. Asal kadha pasang iek pataom tame chất lượng, salamat pandap mbang, tapa nan, samar drah duah mboh dom bruk ngak suan gah salamat pandap mbang, khang hatai langyah catang dom bruk ngak suan tui adat hukum.

Tui lambaok UBND tỉnh Bình Dương, tal abih thun ini, dalam tỉnh hu labaih 1,2 triệu menuac ngak, dalam nan menuac langiu tỉnh mai ngak hu tal labaih 80%. Kayua kan kandah ka bruk pablei pandap, dalam thun hu labaih 127.000 menuac ngak lahik bruk, padeih bruk atau ngak takik bruk veik, dalam nan rilo meng lac gah jhik pet, ngak kayau, ngak takhaok kalik… Tuk doanh nghiệp caong hu menuac ngak bahrau ye oh duah hu menuac piah pilih ruah ba tame ngak, kayua rilo menuac lahik bruk nao veik palei. Kuhria tal abih bilan 11, Bình Dương hu labaih 89.000 menuac ngak harak likau mbang jien daong oh hu bruk ngak, tagok jaik 10% duk haong thun dahlau. 

Thun ini, meng phun jien Mban jak ba kadung jien “ka urang kan kathaot”, huyện Đam Rông, tỉnh Lâm Đồng hu Ủy ban MT negar VN tỉnh parabha brei labaih 3 ty 4 rituh trieu dong piah daong ka dom bruk ngak mbang duah jien ka sang kan kathaot saong jaik kathaot di dom xã biak kan kandah. Ủy ban MT negar VN huyện Đam Rông hu peih bruk pasang iek, daong jalan ngak mbang duah jien ka 167 baoh sang hu tut angan tabiak truh kan kathaot; dalam nan, hu 82 sang likau daong mac jamraik, pandap panda ngak nong dom janih piah pabak ka bruk pala drak lac mac pruh ia, nding ia, mac cakak hareik, mac pruh jru saong mac li-ua tangin. Tui ong Nguyễn Quốc Hương, Akaok Ủy ban MT negar VN huyện Đam Rông, kein lagaih praong abih bo dom bruk ngak mbang duah jien ba mai lac dak harei dak salih jalan sahaneng di rahra, abih di nyu nan lac mikva bangsa takik.

Harei 1.7.2024, Hukum Căn cước 2023 hu ba tame pandar, bhap bini meda likau ngak bahrau, ngak veik di mangaok blah điện tử. Thẻ căn cước jeng hu salih bharau, klaak meneing dom bruk yau ye vân tay, palei negar, labik daok... duk haong CCCD urak ini. Mintri Công an brei thau, dalam hukum hu pabak bruk langyah baoh panuac piah ngak brei cambaih laih dom panuac pambuak tal bruk khik ramik karja ka căn cước yau ye sinh trắc học; urang asal Việt Nam oh ka thau hu quốc tịch daok daok di Việt Nam... Hukum hu pasiam, pabak tui jalan klaak vân tay saong ramik veik ka thông tin số căn cước, talei haroh "căn cước công dân, palei negar, labik daok, chữ ký di urang ngak thẻ" jeng "số định danh cá nhân, căn cước, labik ngak harak khai sinh, labik daok" di mangaok thẻ căn cước...

Mban peih Jai thuong baoh mbanh ameh Việt Nam thun 2023 brei thau angan 5 urang caoh mbanh piah pilih ruah pok brei angan Baoh mbanh ameh Việt Nam, lac: Bùi Hoàng Việt Anh, Nguyễn Hoàng Đức, Phạm Tuấn Hải, Đặng Văn Lâm saong Hồ Tấn Tài. Jai thuong baoh mbanh ameh Việt Nam thun 2023 hu dom hạng mục: baoh mbanh ameh, praik, ban ka likei; Baoh mbanh ameh, praik, ban brei ka kumei; Baoh mbanh ameh, praik, ban brei ka futsal (likei); Urang caoh mbanh negar langiu naih joi; urang likei caoh mbanh ranaih umo naih (mala umo 21 thun); Urang kumei caoh mbanh naih (umo mala 21 thun). Harei jao jai tui kuhria hu peih tabiak di harei 19-2-2024, di TP. Hồ Chí Minh

Piah ba bui sambai mai ka dom menuac oh hu sang danaok, daok ban glai ban klo dalam tuk thun bahrau 2024 jaik tal, sa bruk ngak pahla hu peih tabiak di ban La Paz negar Bô-li-vi-a. Yaok thun urang daok ban glai ban klo di Bô-li-vi-a taduan hu pandap mbang, khan ao, hu cakak mbuk saong pandap me-in brei saoh di sa nhà thờ Tin Lành daok di La Paz. Ini hu maong lac sa bruk ngak pahla biak hu makna ka dom menuac daok ban glai ban klo dalam tuk jaik yam tame thun bharau 2024. Brei panuac anak dom urang vak, Yam ndok danak dak, ong Efrain Alarcon brei thau, ini lac sa bruk ngak pahla hu peih ngak rilo thun tapa di Bô-li-vi-a piah ba bui sambai ka dom menuac oh patuah dalam raidiuk.

Hệ thống định vị Bắc Đẩu – lac pandap di mangaok langik praong abih di Trung Quốc urak ini – bahrau pabak veik dua vệ tinh piah ngak pasiam veik bruk tantu cambaih laih saong chất lượng định vị. langiu di nan, Hệ thống định vị Bắc Đẩu daok meda peih ngak dom bruk ngak iek kong nghe ka rai vệ tinh ba jalan patui veik. Bruk patagok dom vệ tinh ba jalan jeng meda daong paglaong jang bruk tantu cambaih laih saong chất lượng định vị di hệ thống Bắc Đẩu. ​Ini lac hệ thống angaok langik praong abih saong kan di abih, pabak hu riyak langik praong abih, kein lagaih di jit vu glaong abih saong pambuak pagam tal raidiuk di rahra pak Trung Quốc urak ini.

Ấn Độ hu dom menuac njauk Covid-19 dalam harei tagok biak rilo haong labaih 700 urang njauk ruak, dalam nan hu 6 urang matai. Tui Mintri Y tế Ấn Độ, dom menuac njaom Covid-19 tagok khang dalam dom harei tapa lac kayua bruk hu mbaok di biến thể JN.1 di virus SARS-CoV-2 saong langik la-an barak. Anak bruk yau nan, gah y tế di ban ine New Delhi hu tabiak tacei pato bahrau dalam bruk lanyah bộ gen vi-rút SARS-CoV-2 piah duah mboh biến thể JN.1. Tui dom urang ilamu, yaom lac JN.1 hu prein njaom mbak glaong min mboh lac ruak hanjul dreih yau ruak sru la-an, pambak tal jalan suak yava./.