Dalam harei ini, Quốc hội sua tangi ka bruk peih ngak dom sarak di Quốc hội ka bruk pasang iek saong sua tangi ngan haong dom gah, yau ye jalan ngak saong buh jien tame; gah jien padai; gilang paraik; công thương; ngak nong saong cak rok patagok palei pala; jalan mbak pajeng ba; padang ngak; tài nguyên saong môi trường.

Dalam nyaom biai taong yaom 10 bilan peih ngak sarak ka 01 của Thủ tướng Rajaei ka patagok bruk pacang khuah padam khuah dalam tukvak bahrau urak ini, akaok UBND TPHCM Phan Văn Mãi brei thau, TP.HCM hu 60.488 sangchung cư, rilo sang brei pah, bilik brei pah, sang daok pambuak haong ngak pandap, pablei salih. Dalam nan, rilo sang daok di labik dalam, kan tame, oh njauk tanut chuẩn ka padang ngak saong pacang khuah padam khuah. Akaok UBND TPHCM caong khin rajaei, mintri Công an saong dom gah pambuak tal, njauk pasang iek saong ramik ngak ka nyu samu gauk dom adat hukum, langyah dom bruk di dom chung cư, dom sang klak.

Di danak dak “taom gaok, ndem mayai nao mai tapak di Bí thư Tỉnh ủy saong Akaok UBND tỉnh ngan haong dam dara thun 2023" ngan haong asal kadha “Padang ngak saong cak rok patagok dom urang ngak ranaih umo di tỉnh Long An dalam tukvak urak ini” hu peih tabiak bahrau ini, ong Nguyễn Văn Út, akaok UBND tỉnh Long An brei thau lac, dam dara lac dom urang ngak ranaih umo, siam makre, hadah krah, duah jalan ngak bahrau, lagaih samar haong bruk ngak bahrau, tuk halei jeng caong hu rik daong, ba prein tame ka bruk cak rok patagok di palei negar. Kayua yau nan ye, tukvak anak tal, jabat chức năng meda daong palagaih ka urang doan, dam dara peih bruk ngak mbang, hu bac taa, pato pakai hu siam jang; sangka paglaong tal urang ngak, bruk pato bruk ngak, langyah bruk ngak, paglaong raidiuk ka dam dara.

Jaik 700 urang kan kathaot di xã Hàm Chính, huyện Hàm Thuận Bắc, tỉnh Bình Thuận hu dom y, bác sĩ kapul ngak pahla Phòng khám Đa khoa Ngọc Minh di TPHCM iek ruak, siêu âm baoh hatai, tung pruac, brei jru menyum meng 10 tal 20 harei saong tacei jalan iek glang prein yava. Bhap bini xã Hàm Chính rilo meng ngak nong. Jaik abih dom urang mai iek ruak mboh lac darah glaong, dom ruak pambuak tal jalan suak yava, tung pruac, talang raong... Hu thau, langiu di bruk iek ruak brei saoh, 160 menuac dalam sang sarak karja gaok kan kandah jeng hu taduan pok pandap yaom 500.000 đồng.

Jabat Cảnh sát hình sự Công an tỉnh Bình Dương daok cap khik Trần Đức Hữu (umo 37 thun, palei daok di Hải Phòng) saong Nguyễn Thị Thắm (umo 35 thun, daok di ban Tân Uyên, tỉnh Bình Dương) piah pasang iek ngak cambaih laih bruk brei masaiy mek laba glaong tal 475% sa thun. Tui pasang iek tuk camriep, tapa krein randap, Hữu saong Thắm duah hu rilo urang caong hu jien piah brei masaiy. Dua urang ini brei masait biyar góp (jien laba saong jien jhung dalam tukvak 25 harei) saong masaiy jien laba tui harei, oh kaoh tame jien jhung. Jabat pasang iek brei thau lac, Hữu saong Thắm hu brei ka rilo urang masaiy jien ngan haong laba meng 282% tal 475% sa thun, tapa nan mek laba oh siam labaih 100 triệu đồng. Bruk ini daok hu pasang iek ngak cambaih laih.

Thủ tướng Singapore Lý Hiển Long brei thau lac, ong meda jao quyền pan akaok ka Phó Thủ tướng Lawrence Wong dahlau di peih bruk pilih ruah urang ka quốc hội patui di nan, hu peih tabiak suai di abih lac di bilan 11/2025. Panuac khan nan jeng hu makna lac Phó Thủ tướng Wong meda tacei ba rai dang akaok ka 4 (4G) di Singapore dalam bruk tranh cử patui di nan saong eng drei mek hu bruk pilih ruah di cử tri brei ka drei saong rai pan akaok 4G.

Cảnh sát Nepan brei thau lac hu takik di nyu 157 urang metai saong labaih 200 urang karei njauk rambuac hadei di bala magei baoh taneh khang rahtabiak di gah pai negar ini di harei 3/11. Bala magei baoh taneh ngan haong pasak dalam meng 10 tal 15 km ngak magei dom huyện Jajarkot saong Rukum West di tuk kreh melam. Rahra di labik rahtabiak bala brei thau “meda lac oh daok baoh sang halei daok tamo”. Kanja Nepan hu brei thau dom paok daong ka dom labik njauk bala magei baoh taneh.

Labaih 500 urang di cư hu sraong daong di Đại Tây Dương langiu kaoh pulao Canary di Tây Ban Nha. Dom menuac nao tal kaoh pulao Canary tagok rilo dalam tukvak tapa hadei di tuk langik saong tasik siam jang. Tui Mintri Nội vụ Tây Ban Nha, abih tih 30.705 urang di cư oh hu harak gar nao tal kaoh pulao Canary dalam 10 bilan tapa, tagok 111% duk haong tukvak ini thun blaoh. Rajaei Tây Ban Nha khan lac brei padang labik daok chip ka  3.000 urang di cư dalam doanh trại quân đội, hotel saong ký túc xá./.