Hadei di labaih 2 harei pataom tame ngak bruk, page ini, Mbang nyaom oh hu caga dahlau ka 5, Quoc hoi mbang 15 hu ginum biai mbang tamat. Quoc hoi hu brei tapa Hukum Taneh riya (pasiam veik), Hukum Dom gah brei jien mesre (pasiam veik) saong 2 asar kadha hu makna praong dalam karei. Dalam nan Hukum Taneh riya (pasiam veik) hu bhap bini sangka ralo. Hukum hu 16 paka, 260 kadha ba tabiak: Taneh riya  di taong abih bhap bini kayua Karja lambaok ngak po saong njuak gauk dalam bruk khik iek. Karja jao brei adat pandar taneh ka urang pandar taneh tui Hukum taneh riya (pasiam veik). Quoc hoi brei pandar 2 ribau 500 tỷ đồng piah caga  di Bruk buh tame ngak meng kadung jien karja vaktu 2021 -2025 piah pabak Kapol Điện lực Viet Nam peih ngak Danak dak pabak điện meng pakat negar ka huyen  Côn Đảo, tỉnh Bà Rịa - Vũng Tàu…

Mintri Pato Megru brei peih bruk taong yaom tapuk bac ta-a pakat Trung học Cơ sở saong Trung học Phổ thông ngak tui Danak dak pato pakai phổ thông 2018 di dom kapul nyaom, menuac urang. Dom kapul nyaom, menuac urang hu panuac ieu taong yaom tapuk bac ta-a brei tut angan brei thau hadom baoh tapuk, angan tapuk di môn bac, bruk ngak gah pato pakai pakat Trung học Cơ sở saong Trung học Phổ thông mai ka mintri dahlau di harei 20/3/2024. Tal tukvak ini, Mintri Pato Megru hu pasang iek, mbaoh tangin brei tapa 3 bộ tapuk bac ta-a hu ngak tui Danak dak pato pakai phổ thông 2018 piah pandar dalam dom labik pato pakai phổ thông  lac: Pambuak ilamu haong raidiuk, takai langik hu yaom glaong bahrau saong Drei klang.

Gah dulich tỉnh Tiền Giang daok kham ramik caga ginup ndap nda, blaoh blai piah duh ka tuai damuai dalam tuk Tet Nguyen dan. Urak ini, rilo labik yulit daok patui ngak brei salah  bruk yulit gam mbang huak dom kaya bingi karei piah pachreih tuai; peih dom kadha ma-in ilamu, sajarah dakrai, ilamu di bhum taneh Nam bộ. Abih di nyu nan lac, ralo bruk yulit sinh thái birau hu padang di dom bhum palei pala biak gheih karei lagaih daong bruk caong khin di bhap bini ma-in xuan. Thun 2023, kuhria taong abih tuai damuai mai tal Tiền Giang hu 1 trieu 4 rituh mbang, labaih 12% bruk ba tabaik.

Huyện An Biên, tỉnh Kiên Giang daok patagok bruk peih dom tal pato bruk ngak ka urang ngak palei pala, dalam nan pataom rilo tame urang ngak lac dam dara. Tal urak ini, huyện An Biên peih hu 7 tal pato bruk ngak katut panak harei brei ka labaih 200 urang ngak haong dom bruk ngak lac: điện pandar dalam sang, điện lạnh, trang điểm, ilamu padang ngak sang danaok, tin học văn phòng... Urang bac lac urang bangsa takik hu daong taong abih jien sahui. Hadei di tuk bac tamat, jaik abih dom urang bac duah hu bruk ngak, peih labik ngak di drei, paglaong jien mek tame. 

UB bhap bini tỉnh Trà Vinh birau khan brei thau bruk samar drah glut jaleih ar pacang ia ndik di ralo labik di huyen Duyên Hải. Dalam dom harei tapa, ia ndik gam haong hangin catang  labiah 100m, ia tasik sre tame taneh ngak khat lahik 2 hecta  njam patam saong ngak jhak tal 70 ha taneh pala drak di labaih 110 baoh sang bhap bini. Yaom lac, karja palei hu brei pasiam pakajap pacang ia tasik tame  min urak ini jalan ar pacang  daok njauk ia ndik ngak talah abih. Urak ini, karja palei  jak ba dom baoh sang daok dalam labik glut jaleih panduan nao labik karei hu salamat.

Mintri CA Trung Quốc brei thau lac dalam kham merat pagui mek kol tội phạm, thun 2023, gah chức năng hu cap mek jaik 27.000 kol duas hình sự saong pasang iek, duah thau jaik 29.000 vụ án hình sự dom janih. Gam haong nan, hu tui iek bruk langyah 37 vụ án kol duas dalam kapul nyaom praong saong kan kandah, hu tacei pato saong pabak ilamu ka dom bruk pasang iek, duah thau. Langiu di nan, dom gah chức năng jeng hu peih dom mbang truy nã dom kol duas nduac dauk, cap mek 1.222 urang, dalam nan hu 117 urang daok di negar langiu.

Ấn Độ dang akok dom angan taneh ia di dunya ka bruk njom nerak tachrauk dalam sang ngan haong tanut PM 2.5 kuhria rah tapa yaok thun  glong abih, patui di nan lac Trung Quốc, Thổ Nhĩ Kỳ, UAE saong Hàn Quốc. Tapa langyah meng Danak dak Dữ liệu asar Khong khi pambuak dunya di Kong ty ilamu dom taneh Dyson brei mboh  khong khi dalam sang meda jhak jang, abih di nyu nan lac dalam bilan la-ar. Khong khi dalam sang  di bilan la-ar  mboh jhak jang langiu 15%. Abih di nyu pak Ấn Độ, dalam bilan 11, 12 khong khi dalam sang  nerak jang 41%, hu labiah 48%.

Jabat khik caga bhum tapen negar saong takai tasik châu Âu mboh hu 380.000 menuac tame negar suan hukum di dom labik tapen negar di Liên minh châu Âu (EU) dalam thun 2023. Tapa nan mboh lac nyu tagok rilo jang 17% duk haong thun 2022 saong lac tanut glaong di abih kuhria meng thun 2016. Labaih 40% dom menuac tapa negar suan hukum tame châu Âu nao tui jalan tasik Địa Trung Hải, bhian tabiak meng Tunisia saong tame châu Âu tapa Italy. Jaik abih dom menuac tame EU suan hukum lac likei dam. Urang kumei saong uranaih tok hu 10%./.