"Khik tani tanat mblang taneh 3 triệu 560 rabau ha taneh ngak padai, khik kajap salamat pandap mbang di taneh ia, pabak bruk blei mbang, ngak pandap, khik piah saong pablei tapa negar langiu". Ini lac asal kadha dalam Jalan ngak praong patagok bruk pala drak tal thun 2030, pamaong tal thun 2050 bahrau hu Phó Thủ tướng Trần Lưu Quang pasang iek, mbaoh tangin brei ngak. Tui nan tal thun 2030, patagok yaom pala drak kuhria rah tapa lac 2,2 - 2,5% sa thun, patagok yaom ngak pandap meng pala drak kuhria rah tapa hu meng 8-10% sa thun. Kham merat tal thun 2050, pala drak jeng gah kinh tế kỹ thuật bahrau dalam nyaom dang akaok bhum taneh saong dunya.

Mbang pilih ruah urang nao ngak pak Hàn Quốc tui danak dak EPS mbang camriep di thun 2024 tui kuhria hu peih tabiak dalam bilan 1 ini saong meda mek labaih 15.000 urang, tagok labaih 3.000 urang dut saong thun 2023. Urang ngak hu mbaok tame pakacah daok dalam umo meng 18 tal 39 thun, ka oh bhian njauk pateok tabiak truh Hàn Quốc. Urang ngak pakacah gah ngak nong, ngak kaya ilan lac urang bangsa takik, daok di sa dalam 74 huyện kan kathaot, 54 xã biak kan kandah dalam bhum taneh, tapen tasik, kaoh pulao tukvak 2021-2025.

Piah pabak prein patagok bahrau ka gah cakrok KTXH dalam thun ini, tỉnh Ninh Thuận tacei tabiak 11 bruk ngak saong 8 nyaom jalan ngak praong piah peih ngak, tapa nan kham merat ba bruk cakrok GRDP hu meng 11-12% yau Sarak Nyaom roya Đảng bộ tỉnh mbang ka XIV ba tabiak. Tỉnh kham merat ngak brei dom baoh sang kan kathaot rilo gah tui asal bahrau trun meng 1,5 - 2%. Langiu di nan, tỉnh jeng sangka patagok abih gah, samu gauk dom gah ilamu, xã hội, pato megru, y tế…; sangka khik kajap an sinh xã hội, patrun kathaot khang kajap, pasiam raidiuk di bhap bini. UBND tỉnh brei khik iek catang, pandar hu siam taneh riya, khik caga alam môi trường, pacang caga bala meng langik tasik.

Tui kuhria dalam bilan 1 ini, HĐND TPHCM meda peih mbang ginum biai piah pasang iek 11 asal kadha bo UBND ban raya hu payua tagok. Dalam nan, dom urang dalam HĐND TPHCM meda pasang iek, brei tapa sarak ka bruk rami ramik dom khu phố, puk. Tui kuhria, bruk ramik veik khu phố, puk iek tui hadom baoh sang pak nan tui Hukum Cư trú, taneh riya hành chính, ranh giới khu phố, puk piah pataom tame atau neh tabiak, padang ngak khu phố, puk bahrau. Ngan haong dom khu phố, puk hu ngak bruk tani tanat, anh địa giới oh salih meda pandar bier abih jang atau praong jang dom baoh sang rahra piah khik tamo khu phố, puk palei.

Dah page ini (4/1), Sở Pato Megru tỉnh Sóc Trăng hu peih bruk tabiak mbaok tame mbang pakacah pilih ruah anek saih naih joi pakat negar THPT thun bac 2023-2024 ka 54 anek saih di tỉnh. Thun bac ini, Sóc Trăng hu 9 kapul hu mbaok tame pakacah pilih ruah anek saih naih joi pakat negar THPT, dalam nan hu 6 adei lac urang bangsa Khmer, 9 adei bangsa Low. Tapa nan, Kapul pachreih bac tỉnh Sóc Trăng hu jao 54 pok jien bac Lương Định Của brei ka 54 anek saih, yaok pok yaom 2 triệu.

Yaok ribau urang daong duah urang njauk bala di Nhật Bản daok kham marat duah dom urang daok veik di mbang magei baoh taneh, ngan haong hatai caong lac daong hu rilo urang di abih. Tui panuac brei thau di dom urang roh duah ilamo daong duah samar drah, bruk diuk trun daok 72 maong hadei di mbang magei baoh taneh. Min, bruk daong duah daok gaok rilo kan kandah kayua dom jalan njauk mbaih mbaoh saong labik njauk kan kandah trak abih nyu daok di bhum atah biyah. Kuhria tal urak ini, dom urang metai tagok tal 78 urang, labaih 100.000 baoh sang oh daok ia piah pandar saong labaih 30.000 sang oh hu điện pandar.

Lào daok caga piah peih Harei pataom Lamen mbang ka 17 haong rilo bruk ngak chreih chrai dui pachreih tuai damuai. Harei pataom lamen Xayaboury lac sa harei pataom pakat negar hu peih ngak yaok thun piah daong ka rahra saong tuai damuai hu thau jang ka lamen, janih athur kak kajap haong adat cambat, tanarakun , ilamu saong sajarah di urang Lào. Harei pataom lamen thun ini hu yaok pluh kadha parang mein yau ye lamen caoh mbanh, nduac daong prein, phi tiêu, bóng rổ, cih rup cih, dui barak, tamia Lăm Vông atau ngak dom janih tui panuac tacei di urang pahat lamen.

Dom sang iek ruak di rilo tiểu bang di Mỹ hu tabiak veik bruk cuk pataik pacang mbaok dalam tuk dom menuac njauk COVID 19, cúm tui bilan saong dom urang ruak jalan suak yava karei daok tagok. Tui nan, dom urang ruak saong gah pabak dom jit vu y te njauk cuk pataik pacang mbaok di labik sang iek ruak. Tui pathau khan meng Pasak pasang iek ruak kik saong pacang caga jit ruak Mỹ (CDC) meng harei 17-23/12/2023 hu labaih 29.000 urang tame sang iek ruak kayua COVID-19 di grauk labik dalam taneh ia, tagok jang 16% dut saong adit blaoh.