Melam blaoh, rahra tuh mai labik pasak Quận 1, TP. Hồ Chí Minh piah salam uan Noel ngak ka rilo jalan pak ini bak manuac. Tal maong 9 melam, vil val labik pasak yau ye: jalan nao takai Nguyễn Huệ, nhà thờ Đức Bà, pasak pablei salih hu biak rilo rahra mai ma-in, mek thaot binguk saong nao tal nhà thờ ngak adat. Vil val labik ini hu cảnh sát jalan mbak, khik siam makre tacei jalan, kakei dom sruh radaih patok njauk labik brei adat. Hu biak rilo tuai negar langiu pilih ruah nao ma-in gam raok Noel di Việt Nam.

Tal urak ini, Sở LĐTB&XH tỉnh Bình Dương taduan hu pathau khan di jaik 1.000 doanh nghiệp ka bruk jien bilan, jien thưởng Tết Dương lịch saong Tết nguyên đán thun anek sak inegirai 2024. Dalam jaik 1.000 doanh nghiệp pathau khan, hu labaih 950 doanh nghiệp hu yaom jien thưởng Tết Dương lịch saong Tết Nguyên đán thun anek sak inegirai 2024, daok veik dom doanh nghiệp oh ka hu yaom jien thưởng. Dalam nan, yaom jien thưởng Tết Dương lịch glaong abih lac labaih 42 triệu đồng di doanh nghiệp karja. Thưởng Tết Nguyên đán anek sak inegirai glaong abih lac 366 triệu đồng di doanh nghiệp hu phun jien negar langiu. Tui kuhria, ngan saong dom doanh nghiệp di Bình Dương, yaom jien thưởng Tết thun ini kuhria rah tapa lac 6 triệu 800 rabau đồng sa urang.

Harei kabroi, di bhum tasik Mỹ Hòa, xã Vĩnh Hải, huyện Ninh Hải, tỉnh Ninh Thuận hu tamat Jai Lướt ván diều Ninh Thuận – Bình Thuận peih praong thun 2023. Ini lac bruk piah salam uan Thun Du lịch negar 2023 "Bình Thuận – Pataom veik hijao” kayua Sở Ilamo, Thể thao saong Du lịch dua tỉnh Ninh Thuận saong Bình Thuận pambuak gauk peih ngak. Tui Mban peih bruk, jai pakacah ini dui pachreih hu labaih 100 urang pakacah mai meng dom tinh, ban dalam taneh ia saong dom urang pakacah mai meng 18 taneh ia di dunya yau ye: Mỹ, Hàn Quốc, Australia, Anh, Phần Lan, Ấn Độ, Pháp… Dalam tuk langik hangin khang, dom urang pakacah hu parang iek dom ilamo nao angaok riyak bak kan kandah, ba mai ka tuai damuai saong dom urang maong iek dom kadha par gilung di mangaok langik tasik.

Tui pathau khan di Liên đoàn Caoh mbanh Việt Nam, harei ini huấn luyện viên Troussier brei thau angan dom urang dalam kapul Việt Nam caga ka Asian Cup 2023. Tapa bốc thăm parabha bảng di Asian Cup 2023, kapul Việt Nam daok dalam bảng D haong dom kapul Indonesia, Iraq, Japon. Dhi chung kết Asian Cup 2023 hu peih tabiak di Qatar bilan 1/2024. 24 kapul hu mbaok tame pakacah hu parabha jeng 6 bảng, yaok bảng 4 kapul. Dom kapul pakacah haong gauk piah pilih ruah tabiak dom kapul dang akaok saong dang dhi 2, gam haong 4 kapul dang dhi 3 di yaok bảng tame dhi 1/8.

Jabat Kuhria mboh dahlau bruk langik tasik bhum Nam Bộ bahrau khan brei thau dahlau ka tukvak tabung glaong ia tagok di TP.HCM. Tui nan, tukvak tabung glaong ia tagok di bilan 12/2023 meda rahtabiak di harei 27-29 anak tal. Tukvak tabung glaong rahtabiak bruk ia tagok dalam harei lac meng maong 4 tal maong 6 page saong meng maong 5 tal maong 7 melam. Jabat Kuhria mboh dahlau bruk langik tasik bhum Nam Bộ kuhria mboh dahlau lac ini mbang ia tagok glaong, njauk caga dahlau bruk dauk ia di dom bhum dhaong saong labik tapen kraong. Dom labik jalan meda njauk ia dauk, yau ye jalan Trần Xuân Soạn, Đào Sư Tích, Huỳnh Tấn Phát, Nguyễn Bình, Lê Văn Lương, jalan Roya 50, Phạm Hữu Lầu. Labik dauk ia pataom rilo abih di Quận 7 saong huyện Nhà Bè. Tui kuhria, tanut ia di bilai Phú An (kraong Sài Gòn) saong bilai Nhà Bè (kraong Đồng Điền) lac meng 1 mét 6 tấc 5 phân tal 1 mét 7 (mangaok tanut báo động 3).

Dom gom hadah tanyak hu truac tagok di dom jalan praong, sit, gam haong bruk bui sambai chreih chrai di malam Noel daok hu mboh di rilo taneh ia di dunya. Yaom lac daok dang anak bruk lạm phát, ngak ka rilo menuac sia di rilo taneh ia kali kalih cai pandar dalam bilan Noel thun ini, min oh lac yau nan bo Noel thun ini kurang chreih chrai bui sambai. Dom gom hadah tanyak di grauk labik ba mai bui sambai chreih chrai ka malam Noel siam mekre. Menuac sia ba gauk nao tal mblang bein Torreon, Cartes, Tây Ban Nha dalam malam Noel chreih chrai maong iek phun thông Noel glaong tal 65m hu ngak mekre meng 19.000m baoh gom LED. Mblang bein Nhiệt đới di ban Miami, Florida, Mỹ tuk Noel ini biak njauk caik hatai haong bruk par iek kapal haoh oh hu menuac peih ngak jeng dom rup binguk hu asal kadha Noel bui sambai chreih chrai.

Daok di Pasak ban ine London, Anh chreih chrai uan raok harei Noel ngan haong var to yaom ralaow hu peih tabiak yaok thun di labik darak Smithfield. Tui ilamo meng kan, yaok ratuh urang hu pataom gauk di darak praong Smithfield piah hu mbaok tame mbang to yaom dom ralaow saong manuk ada anak mbang padeih Noel, ngan haong yaom trun sa mateh duk haong yaom ralaow yaok harei. Bruk to yaom di Harei Noel hu meng labaih 100 thun di darak Smithfield. Dom pandap hu ba tabiak pablei to yaom, hu manuk prang, ralaow pabui, ralaow limo saong hu gam ralow pabui sit. Rilo urang mai hu mbaok tame mbang to yaom ngan haong hatai caong blei hu ralaow that bingi, yaom lap, bier jang yaom pablei dalam sieu thi meng 50 - 60%.

Urang Australia takre nao mein saong Đông Nam Á tuk halei jeng lac labik urang takre mai kayua oh atah saong jien sahui mbiah. Langiu dom labik urang Australia bhian nao ravang me-in dalam rilo thun tapa, Việt Nam urak ini daok lac sa labik mai tal bahrau biak dui pachreih. Tui yaok pataom di Google pak Australia jeng brei mboh lac, Việt Nam dang dhi 4 dalam 10 labik nao ravang me-in hu urang Australia duah di mangaok Google. Njauk caik hatai lac, labik dang di Việt Nam daok dang anak New Zealand saong Thái Lan, 2 labik ravang me-in bo urang Australia bhian nao tal dalam rilo thun tapa./.