Mesup ini, meng hu 453 dalam 459 urang QH yar tangin njauk hatai, Quốc hội brei tapa bruk ramik veik Danak dak mbang nyaom ka 6, Quốc hội mbang XV. Di mbang nyaom ka 6, Quốc hội mbang XV oh ka peih bruk yar tangin brei tapa danak dak Hukum taneh riya (pasiam veik). Tổng Thư ký Quốc hội, Chủ nhiệm Văn phòng Quốc hội Bùi Văn Cường brei thau, hadei di tuk ginum biai njauk gauk haong Rajaei, UB Thường vụ QH pathau khan Quốc hội brei adat ramik veik tukvak brei tapa danak dak Hukum taneh riya (pasiam veik) meng mbang nyaom ini tapa mbang nyaom jaik abih di Quốc hội piah patui bruk roh duah, taduan mek panuac, pasiam veik, pasang iek cambaih saong pasiam danak dak hukum khik kajap asal siam di abih dahlau di tuk pok tagok Quốc hội brei tapa. 

UBND tỉnh Bình Thuận daok kuhria ba tabiak bruk abih rahra hu mbaok tame duah mboh pabak dom khau tin, thaot bingu, khan brei thau dom bruk ngak suan gah siam mekre, salamat jalan mbak. Bruk njauk caik hatai nan lac angan di urang pabak dom khau tin hu khik kandauk. Urang pabak khau tin hu pachreih ba, pok mayaom samar meng dom jalan ngak lagaih. Min, dom bruk pambak tame piah khan suan, khan oh njauk, oh biak atau ngak jhak tal manuac urang, doanh nghiệp meda njauk langyah biak catang.

Meng kreih bilan 9 tal ini, TPHCM hu 63 urang njauk ruak đậu mùa khỉ, taong abih jeng lac lakei, dalam nan hu 70% lac menuac hu bruk tình dục đồng giới saong 60% lac menuac njaom HIV. Urak ini hu 35 urang ruak hu thit abih ruak, 2 urang ruak trak, metai. Tui Pasak Pasang iek ruak kik TPHCM ruak đậu mùa khỉ lac ruak meda thit abih eng dalam 2 tal 4 adit. Kayua yau nan ye, urang njauk ruak atau medil lac njauk ruak, brei nao bác sĩ piah hu tacei pato jalan taong ruak ka nyu lagaih. 

Meng akaok thun tal urak ini, tỉnh Tiền Giang hu 53 baoh sang raong pabui di 12 xã dalam 8 huyện, ban sit saong ban njauk jit ta aih traoh pabui châu Phi. Dalam nan hu 1.158 drei pabui ruak njauk ba nao am cuh klaak, meblah labaih 54%. Di labik pandiak pak xã Xuân Đông, huyện Chợ Gạo hu tabiak panuac lac hu jit ruak tuk hu 40 sang raong pabui njauk ruak, metai njauk ba nao am cuh klak. UBND xã Xuân Đông hu padang 4 bilai pasang iek jit ruak di dom labik akaok jalan tame xã, canah klau, canah pak jaik taphia haong xã karei. Daok dom huyện Tân Phú Đông, Cai Lậy saong ban sit Cai Lậy ka oh mboh jit ta aih traoh papui châu Phi.

“Adit Ilamu, Du lịch – harei pataom pandap mbang huak Nam bộ pambuak haong Harei Ok om bok tỉnh Trà Vinh thun 2023” bahrau peih tabiak tuk melam blaoh. Tapa nan, hu dom bruk yau ye: Labik ngak ahar bhap bini saong mbang huak Nam bộ; Nyaom darak peih bruk pablei salih, pandap ngak kong palei pala saong OCOP; Harei pataom pakacah parang iek khan ao meng kan bangsa Khmer; Parang iek dom pandap di bangsa Khmer; pakacah ghe Ngo, dom kadha me-in meng kan di bhap bini saong Melam pataom Ok om bok... piah ba bui sambai, chreih chrai duh ka bhap bini uan "Sa thun pala drak njauk”. Ini lac bruk piah yaih khan dom labik nao tal, yaih khan du lịch di tỉnh. Gam haong nan, piah khik ramik, patagok yaom glaong ilamu bangsa Khmer.

Bol lin Mỹ saong Philippines daok tame bruk pasang iek haong gauk di tasik Biển Đông. Brei panuac di mangaok mạng xã hội X, Tổng thống Ferdinand Marcos ndom lac, bruk pasang iek haong gauk di tasik Biển Đông ini, lac jalan sahneng bahrau hu makna praong piah pakhang prein pambuak gauk mesuh di dua taneh ia, ndem lac bruk ini meda daong ngak jeng labik salamat saong tani tanat jang ka rahra negar ini.

Bruk tableik radaih buýt di mesup kabroi angaok jalan nduac samar di Mexico ngak brei takik di abih 12 urang matai saong 58 urang njauk rambus. Gah salamat bruk nao mai angaok jalan Mexico brei thau, yaok thun bala radaih angaok jalan nao mai ngak brei 17.000 menuac matai saong 17.000 urang njauk rambus. Bala angaok jalan radaih nao mai jeng ngak lahik 500 tỷ peso (samu 29 tỷ USD) ka kinh tế praong ka 2 di bhum taneh Mỹ Latinh.

Dom urang khảo cổ di Peru bahrau kuac rok hu 4 xac ướp di uranaih meng takik di abih lac 1.000 thun dahlau, di sa dalam dom khu phố klak abih di Lima zaman bahrau. Xac uop hu duah mboh tapen rilo pandap lan am. Labik ini meng kan hu brei thau lac labik peih ngak dom adat cambat gireih. Dom talang menuac hu duah mboh mala takai kanjar angaok sa tabung ceik sit, labik hu brei thau lac bhian padauk sa baoh bimon hu padang ngak atah di ini 3.500 thun. Ngan haong rahra labaih 10 triệu urang, ban ine Lima di Pê-ru lac labik hu labaih 400 inem krung khảo cổ.