Mintri Công an bahrau patabiak jalan ngak piah khik kajap siam mekre salamat bruk nao mai angaok jalan di tuk Tết Nguyên đán saong dom Rija akaok thun 2024. Tui nan, Mintri Công an brei peih ngak tukvak tabung glaong piah samar drah pacang caga, duah mboh, pacang cakak saong langyah dom bruk ngak suan lac makna ba tal dom bala di jalan mbak biak trak damak; patakik bruk gar jalan; pacang caga, mesuh pacang kol tội phạm saong dom bruk ngak suan adat hukum di dom jalan; daong ba, pabak ka bruk nao mai, ma-in bui sambai, harei rija roya akaok thun 2024 di rahra.

Tỉnh Long An hu jalan tapen negar atah labaih 132 km daok tapen 2 tỉnh SvayRieng, PreyVeng di Campuchia. Tukvak jaik ini, bruk kol tội phạm Việt Nam nduac tapa Campuchia biak rilo, abih di nyu lac di dom labik hu dom casino. Piah pacang, cakak hu siam lagaih jang bruk pablei salih oh njauk adat hukum saong bleik saleik dalam pablei salih, gah công an Việt Nam brei patagok menuac tui iek, pacang cakak di rilo jalan tuh mai tapen negar, peih bruk pasang iek pambuak pagam haong duah thau piah caga pacang.

Bruk meriak gauk ka labik taong cap kaya ikan di bhum tasik Tây Cà Mau tukvak tapa biak sarau kadhau. Piah patakik bruk ini, UBND tỉnh Cà Mau hu panuac likau Mintri Quốc phòng saong Mintri Ngak nong saong patagok palei pala daong bruk pasang iek di tasik, abih di nyu nan lac di bhum bhian rahtabiak bruk meriak gauk ka labik taong cap ikan, piah oh caik ka bruk meriak gauk tagok rilo, ngak srau kadau tal bruk sron mbon di angaok tasik. Urak ini, Công an Cà Mau hu padang ngak Mban chuyên án piah pasang iek, duah thau, ngak brei cambaih laih dom bruk meriak gauk ka labik taong cap ikan angaok tasik rahtabiak dalam tukvak tapa di pak ini.

Piah daong ka urang ngak bui sambai taduan raok Tết Nguyên đán 2024, UBND tỉnh Đồng Nai hu caik tabiak 30 tỷ đồng piah daong ka urang ngak gaok kan kandah.. Tổng Liên đoàn Lao động Việt Nam daong 350 harak radaih ba urang ngak nao palei mbang Tết saong pajeng mai ngak bruk veik. Thun 2023, dom doanh nghiệp di tỉnh Đồng Nai gaok kan kandah kayua takik bruk. Nan ye yaok rabau urang ngak di 147 doanh nghiệp gaok kan kandah tui. Hu thau, kuhria tal abih bilan 10/2023, hu 2.058 doanh nghiệp oh ka đóng BHXH, BHYT, BH oh hu bruk ngak meng 3 bilan tagok haong yaom jien abih tih jaik 400 tỷ.

Tui jalan ngak lac “Taong abih đoàn viên, urang ngak jeng hu mbang Tết” dom harei ini, công đoàn dom pakat di ban Cần Thơ pataom tame bruk nao rivang, tadhau ayuh Tết dom baoh sang sarak kanja saong dom urang gaok kan kandah. Gam tui di nan, peih tabiak ngak dom bruk sangka yau ye danak dak “Blah vé anit ranam - Tết jumpataom gauk” daong taong abih atau sa binah harak ve radaih ô tô, harak ve radaih pui, harak ve kapar haok ka urang ngak caong nao palei mbang Tết. Danak dak “darak Tết Công đoàn” jeng hu peih ngak saong jao 15.000 paok pandap ka urang ngak gaok kan kandah, urang ngak gaok bala tuk ngak bruk, ruak kayua bruk ngak.

Tổng thống Indonesia Joko Widodo saong Tổng thống Philipin Ferdinand Marcos njauk gauk brei patagok talei pambuak bruk quốc phòng, khik kajap sron mbon tapen negar, paglaong yaom di Công ước Liên Hợp Quốc ka Hukum Tasik (UNCLOS 1982). Dua urang dang akaok 2 taneh ia jeng hu sanya brei jhul tagaok, ngak brei dalam jang talei pambuak bruk di anak tal, abih di nyu lac pambuak bruk quốc phòng, khik kajap sron mbon siam mekre tapen negar.

Dom urang padang hukum negar Singapore bahrau pok tagok Quốc hội sa dự luật brei cap khik oh hu tukvak ngan haong dom “kol toi pham biak jhak” gam di tuk dom urang ini abih tukvak daok guk. Dự luật brei pandar ka dom urang umo labaih 21 thun njauk kaoh dom duas yau ye pametai manuac, rapeik rabai saong ndih daok haong ranaih daok sit. Mintri Tư pháp saong Mintri Nội vụ Singapore tabiak panuac lac jalan ngak ini lac sa “bản án biak catang” min meda daong “khik ka rahra hu siam jang plaih nyaih dom kol toi pham biak jhak”.

Gah ilamu khoa học châu Âu bahrau ndom lac, thun 2023 lac thun pandiak abih kuhria meng di thun 1850 saong mada lac thun baoh taneh pandiak abih dalam 100.000 thun. Ini jeng lac thun hu mboh dom kan kandah di langik tasik dak harei dak khang jang. Dahlau di nan, dom urang ilamu bhian brei thau dahlau ka bruk ini, hadei di tuk dom kan kandah dak trak damak jang. Gah khoa học jeng langyah lac, bruk langik pandiak di abih lac makna ba tal palai pajoa dunya dalam thun blaoh./.