Mintri Ngak nong saong patagok palei pala saong dom tinh ban daok khang hatai ba Danak dak “pala sa ty phun hijao” di Thủ tướng Rajaei, tukvak 2021 – 2025 "ngak salah” tui njauk jalan ba tabiak. Dalam klau thun meng 2021 - 2023 peih ngak Danak dak, dalam taneh ia hu pala jaik 770 triệu phun hijao, mek hu labaih 121% dut saong jalan ba tabiak. Dom tỉnh peih ngak Danak dak mek hu kein lagaih glaong, yau ye Lào Cai, Phú Thọ, Long An, Gia Lai. Dom Mintri, dom gah, jabat Trung ương  halain hatain hu mbaok tame danak dak pala phun hijao. Rilo doanh nghiệp, manuac urang jeng pachreih tui Danak dak tapa bruk padang kadung jien piah jak ba taduan mek saong peih bruk pala glai, pala phun kayau.

Dom harei pataom jalan tapuk Tết di TPHCM thun ini mek jien tame hu labaih 10 tỷ đồng, lac glaong jang gah jien mek tame saong hu rilo tuai jang duk haong thun blaoh. Dom harei pataom jalan tapuk Tết thun ini hu peih ngak 63 danak dak, dalam nan dui pachreih hu bruk sangka, pachreih tui di rilo urang puac tapuk lac danak dak “Lì xì tapuk Tết”, haong labaih 16.000 baoh tapuk hu mBan peih bruk alin hadiah ka tuai mai ravang iek di harei 1 bingun Tết. Langiu di nan, daok hu dom danak dak taom gaok, ndom biai nao mai haong lambaok ilamu puac tapuk di TP.HCM vaktu 2023-2024 ngan saong kadha “Tapuk saong hatai anit ranam” uan harei 14/2.  

Urang nong pak tỉnh Tiền Giang barau taduan khau tin biak bui sambai, chreih chrai tuk labaih 20.000ha padai đông xuân di bhum ia taba Gò Công pala njauk, pablei hu yaom. Urak ini, padai Đài Thơm 8 saong ST25 – lac dua janih padai hu pala rilo abih di bilan đông xuân hu yaom lac 8.800 đồng/kg saong 10.000 đồng/kg. Yaom ini glaong jang yaom padai hè thu meng 500 đồng tal 1.000 đồng/kg. Rilo urang mai blei brei thau lac kayua dom mbang kakei blei piah pablei tabiak negar langiu hu ngak ka yaom padai tagok glaong meng dom harei akaok thun ini.

Hadei di dom harei bui sambai mbang Tết Nguyên đán, urang ngak nong tỉnh Đồng Tháp daok yam tame yuak padai bilan Đông Xuân 2023 - 2024. Yaom lac padai trun yaom hasit duk haong tukvak dahlau Tết Nguyên đán min urang ngak nong jeng daok chreih chrai kayua lac meng yaom pablei yau urak ini, urang ngak padai daok hu laba rilo. Thun 2024, gah ngak nong tỉnh Đồng Tháp ba tabiak bruk lac kham merat mek hu labaih 3 triệu 300 rabau tấn padai. Piah paglaong chất lượng padai, tỉnh Đồng Tháp urak ini daok patagok mbaok taneh ngak padai pajaih xác nhận, pajiah chất lượng glaong, padai pahe đặc sản. 

Dom tinh, ban gah maraong negar daok tame tukvak tabung glaong di langik pandiak bhang saong njom ia mbak. Di ĐBSCL, bruk njom ia mbak thun ini di tanut glaong jang kuhria rah tapa di rilo thun dahlau saong tanut njauk bala di pakat 2. Tui kuhria meng urak ini tal harei 20.2 tanut mbang dalam di ia mbak lac 4 mangaok ribau di dom pabah kraong praong, yau ye Vàm Cỏ Đông, Vàm Cỏ Tây, njom ia mbak meng 50 - 60km; kraong Hậu njom ia mbak meng 50 - 57km. Piah pacang caga haong bruk njom ia mbak biak glaong ini, Pasak Kuhria mboh dahlau bruk langik tasik pakat negar hu kakei lac: dom bhum palei njauk hu jalan caga dahlau bruk khik piah ia taba tuk ia tagok bier piah pabak ka bruk pala drak saong piah pandar.

Piah pacang jalan pandap panda yaom lap tuh tame taneh ia, ngak khut bruk ngak mbang dalam taneh ia, Karja Thái Lan daok sahneng kuhria brei klaak bruk oh kak je giá trị gia tăng (VAT) saong dom đặc quyền hải quan tuk blei tame dom pandap meng Trung Quốc hu yaom mala 1.500 baht (42 USD). Thủ tướng taneh ia ini ieu taong abih dom jabat pambuak tal brei caik hatai bruk bleik saleik dalam khai báo hải quan tuk dom urang blei pandap tame khan yaom pandap ba tame Thái Lan piah hu kein laba meng  je VAT saong oh njauk kak je pandap blei tame meng negar langiu 

Dom menuac metai dalam bala magei baoh taneh di harei 6/2 di gah maraong negar Philippin tagok tal 92 urang, dalam tuk kapul daong duah urang njauk bala jeng daok duah yaok piluh urang lahik. Hajan khang dui atah rilo harei ngak glut jaleih taneh di ban sit Maco di tỉnh gah maraong Davao de Oro melam 6/2, lam rilo baoh sang, radaih saong yaok piluh urang. Philippin dang akaok dalam dom taneh ia gaok kan kandah abih di dunya tuk rilo mbang rahtabiak dom mbang ribuk hajan khang saong glut jaleih taneh, magei baoh taneh saong gaok kan kandah biak trak damak di dom mbang ceik pui pruh tagok.

Lac bhum eik lapa kathaot rambah, rilo taneh ia châu Phi daok hu bruk châu chấu sa mạc ngak kan kandah khang tal bruk ngak nong. Sa tapon châu chấu yaok rabau km vuông haong jaik 80 triệu drei châu chấu meda mbang abih phun lương thực ginup piah raong 35.000 menuac dalam sa harei. Bruk ini dak harei dak kan pacang cakak dalam tuk langik daok pandiak tgaok Gah pandap mbang saong ngak nong Liên hợp quốc (FAO) ndom lac, ini janih “di cư” hu prein palai pajoa khang abih di mangaok dunya./.