Dalam adit ngak bruk ka 4 (meng harei 20 - 24/11) di Mbang nyaom ka 6, Quốc hội pataom tame dom bruk lập pháp saong pasang iek. Dalam nan, Quốc hội ginum biai ka pasang iek bruk langyah panuac caong di cử tri payua tal Mbang nyaom ka 5, Quốc hội mbang XV; ginum biai ka bruk taduan raok rahra, langyah dom harak gar saong langyah dom bruk pathau khan di rahra thun 2023. Di bruk lập pháp, Quốc hội ginum biai ka dom danak dak hukum, sarak lac: hukum peih bruk Tòa án rahra (pasiam veik); Hukum Bảo hiểm xã hội (pasiam veik); Hukum dom Kapul brei masaiy jien (pasiam veik); Hukum jalan mbak nao mai; Hukum Trật tự, salamat jalan mbak; Sarak ka bruk pandar jien je jien mek tame di doanh nghiệp pabak tui adat pacang caga bruk jhak nao di asal kadha jien je di dunya. Quốc hội yer tangin brei tapa Hukum Viễn thông (pasiam veik); Hukum Khik ramik, daong khik danak dak quốc phòng saong labik quân sự.

Uan harei Gru pato VN 20.11, Mintri Pato Megru, Công đoàn pato pakai Việt Nam bahrau peih bruk pok meyaom gru pato, urang jakar khik ramik naih gheih, hu rilo sahneng duah salih bahrau, rik daong ka bruk pato megru. Gam haong nan, pathau khan, pambak tabiak kreih camin gru pato naih gheih, buh rilo prein yava saong rik daong ka gah pato megru, pachreih ba dom gru pato yam tapa kan kandah, yam tagok ngak siam bruk di drei, rik daong ka bruk jak jreng salih bahrau bruk pato megru. 

Ủy ban Mặt trận negar Việt Nam Ban raya Hồ Chí Minh hu brei tabiak mbaok Kadung jien An sinh xã hội. kadung jien ngak ngak bruk tui ứng dụng công nghệ số piah gam pambuak dom gah manuac sia, gam duah mboh dom urang caong hu daong. Urang hu mbang tui kadung jien oh deih yau dom danak dak bruk ngak negar patrun kan kathaot khang kajap saong parilo gah di ban raya bo pamaong tal bruk daong ba samar drah, samu ka dom urang gaok kan kandah. Di dalam harei tabiak mbaok, 200 sổ patak pataom ngan haong yaom 2 tỷ đồng hu jao tal 200 anek saih matuai kayua jit ruak COVID -19 saong 300 baoh sang jeng hu taduan paok kadung pandap an sinh.

Bilan padai Thu Đông thun ini di tỉnh An Giang pala njauk, pablei hu yaom. Yaom dom janih padai tagok glaong, glaong jang takik di abih lac meng 1.000 - 2.500 đồng/kg duk haong tukvak ini thun 2022. Tui Sở Ngak nong saong Patagok palei pala tỉnh An Giang, bilan padai Thu Đông 2023, dalam tỉnh trun pajaih hu labaih 157.000 ha, tal urak ini yuak hu labaih 50.000 ha, yaok ha yuak hu jaik 58 tạ. Langiu di taneh pambuak gauk ngak, hu dom doanh nghiệp blei veik abih, daok veik jeng hu urang nong pablei ka urang pablei salih nan ye mikva biak bui sambai saong sahanang hatai

Di tukvak urak ini, baoh thanh long di tỉnh Tiền Giang daok khik hu yaom glaong abih dalam thun. Di sang bein pak huyện Chợ Gạo, thanh long tai bhong janih 1 hu yaom 40 ribau đồng/kg, janih 2 hu yaom 33 ribau đồng/kg. Baoh thanh long yaom glaong, baoh takik ba tal bruk darak pasa kurang baoh, urang blei mai tal bein piah blei. Tỉnh Tiền Giang hu labaih 10.000 ha phun thanh long. Dalam thun ini, yaom thanh long tui kuhria meng 15-40 ribau đồng/kg. Urak ini, sang bein daok ngak ka phun tabiak bingu suan bilan saong labaih 2 bilan hadei meda tame bilan paik baoh.

Tui gah padai brah pandap mbang Liên hợp quốc (FAO), jaik 6,5% menuac sia di bhum châu Mỹ Latinh saong Caribe daok kurang mbang, samu haong 43 triệu menuac daok gaok kan kandah dalam bruk duah pandap mbang ka yaok harei. Kadung jien dunya ka patagok ngak nong (IFAD) mboh lac, biến đổi khí hậu, mesruh gauk saong dom kan kandah hadei di jit praong COVID-19 daok lac dom makna ngak ka padai brah, pandap mbang dak harei dak takik nao.

Kanja New Delhi, Ấn Độ mbang camriep daok kuhria ngak hajan piah pasiam veik alam langik tasik di ban ine tachrauk nerak abih di dunya, daok njauk ia kakuan ma-aom luac sa adit tapa. Kanja New Delhi hu tabiak adat brei kareik pabah mbang dom sang bac, padeih bruk padang ngak sang danaok saong brei thau lac medabrei patakik veik ngan haong dom sruh radaih nao mai di mangaok jalan. Bruk alam langik tasik di New Delhi bhian jhak nao di bilan laar, tuk langik laar khik veik dom tachrauk nerak alam meng dom gah yau ye radaih, bruk ngak kong, dhur mur meng bruk padang ngak saong cuh hareik hareim di bruk ngak nong.

Gah cảnh sát Maroc cap mek hu 4.635 tấn cần sa saong cap khik 2 urang hu pambuak tal sa jalan pablei salih jru phien ma túy. Sa bruk duah thau daok hu pasang iek ngan saong 2 urang ini kayua kol nan meda pambuak tal sa kapul tội phạm dunya pablei salih jru phien saong chất hướng thần meng jalan tasik. Tui Jabat Liên Hợp Quốc ka Ma túy saong Tội phạm, yaom lac karja ngak khang bruk pakauk pala cần sa dalam sa pluh thun tapa, Maroc jeng daok lac sa dalam dom taneh ia ngak ma túy jru phien praong abih di dunya./.