Ndom biai peih praong bruk pambuak gauk cakrok bhum TPHCM saong 13 tỉnh ban bhum ĐBSCL, pamaong tal jeng labik ndom biai nao mai di kinh tế công tư yaok thun piah ngak jeng labik taom gaok, ginum biai saong ba tabiak dom jalan ngak gaok tapak tal bruk kinh tế di bhum. Abih di nyu lac labik ndom biai meda hu ginum biai jalan ngak karei ka TPHCM dalam talei pambuak bruk haong bhum ĐBSCL pambuak tal chuỗi pabak pandap panda saong dịch vụ…

Cục Du lịch Negar Việt Nam tabiak mbaok blah yaih khan ravang iek palei pala piah cakrok du lịch ngak nong pambuak haong khik ramik, patagok yaom glaong meng kan tui jalan khang kajap, rilo gah, rilo yaom glaong. Ini lac bruk kham merat piah jhul khang yaih khan ka siam lagaih, gheih mekre labik ravang me-in di bhum palei pala, danak dak ravang iek, jalan nao, pandap du lịch ngak nong, OCOP, kaya pandap di dom bhum palei piah dui pachreih tuai mai ravang iek, ba drei tame duah thau, blei dom kaya nong, rik daong paglaong yaom kinh tế di du lịch palei pala.

Tui Sở LĐTBXH ban raya HCM, yaom lac darak pasar urang ngak dom bilan puac thun daok rilo kan kandah, min dom doanh nghiệp jeng daok caong pilih ruah urang ngak piah caga ka bruk ngak di tuk Tết. Dalam quý IV, TP.HCM caong hu meng 75.500 – 81.500 urang ngak. Dalam nan, menuac ngak ka gah pablei salih, dịch vụ meblah 70%, labik ngak kong, padang ngak sang danaoh lac jaik 30%... Langiu di nan, rilo doanh nghiệp daok caong pilih ruah menuac ngak ka gah pablei salih, dịch vụ, công nghiệp chế biến, bảo vệ, sang danaok taneh riya…

Tukvak jaik ini, rilo anek saih di Bình Dương ka oh ginup umo thun min amaik ame jeng daok brei nduac radaih mô tô phân khối praong nao bac. Hu adei daok peih radaih nduac cagar jalan, lạng lách... ngak ka rilo menuac mboh duh hatai. Dalam 10 bilan tapa, Bình Dương hu 31 bruk radaih paoh gauk, ngak brei 17 anek saih matai saong 36 anek saih njauk rambus. Yau nan, Bình Dương lac 1 dalam 10 tỉnh, ban hu bala radaih angaok jalan pambuak tal anek saih rilo abih dalam taneh ia.

Meng jhung bilan 10 tal ini, dalam tỉnh Tây Ninh hu hajan praong gam tui ngin rabuk, ngak brei 248 baoh sang khut, tayah, labaih 1,120 ha padai, 7,42 ha durian saong labaih 500 ha njam patam khut, jaleih… Abih tih yaom khat lahik lac jaik 9 tỷ đồng. Hadei di tuk rah tabiak bala, gah chức năng saong dom puk palei hu daong ka dom baoh sang khut pasiam veik, njuk ia tabiak di dom labik dauk dalam, tacei pato dom sang njauk khat lahik ngak harak gar piah hu daong tui sarak. Gam haong nan, hu panuac kakei bhap bini takik tabiak gah langiu tuk langik hajan rabuk piah khik salamat ka rup drei saong drap ar di drei.

Gilang pariak Công Thương Trung Quốc (ICBC) bahrau jeng labik di bruk tấn công mạng meng mã độc ngak jien, ngak brei klaih klaoh dom dịch vụ jien padai. Jeng dalam harei nan, Mintri jien padai Mỹ khan lac taduan hu panuac khan ka bruk srau kadau an ninh mạng di Gilang pariak Công Thương Trung Quốc ICBC ngak srau kadau tal darak pasar trái phiếu kho bạc Mỹ, saong ndom lac brei khik bruk taom gaok gam gam haong dom gah pambuak tal saong jabat khik ramik praong dalam gah jien padai. Tui Cty daong bruk kaoh yaom angan Brand Finance (Anh), ICBC, lac gilang pariak praong abih di dunya kuhria tui yaom drap ar daok khik ramik, kuhria tal bilan 12/2022 jien mek tame hu lac 143 tỷ USD sa thun.

Thủ tướng Canada Justin Trudeau hu panuac lên án bruk srau kadau jaik di ini hadei di tuk hu dom bruk cuh phao di dua sang bac Do Thái daok dalam ban Montreal di taneh ia ini melam 9/11 (tui mon pak nan). Dom bruk cuh phao rah tabiak hadei di mbang taong mbom tame sa giáo đường Do Thái jeng daok di Montreal tuk akaok adit. Jeng dalam tukvak ini hu dom bruk taong paoh gauk di sa gah lac dom sinh viên tui Palextin, haong sa gah lac dom urang tui gah Ixraen di Đại học Concordia daok di ban praong ka 2 ini di Canađa. 

Bahrau ini, sa drei arieng “cua tuyết” trak 1,2kg di pajaih Matsuba hu pablei haong yaom biak glaong oh ka bhian mboh, lac 10 triệu yen (samu  1 tỉ 620 triệu đồng) dalam mbang to yaom camereip abih di bilan taong cap arieng di pabah lamnge Hamasaka, Shinonsen, tỉnh Hyogo, gah pai negar Japon. Urang blei hu, lac Ryosuke Uemura, po sa nhà hàng di Kobe. Langiu drei arieng hu yaom 10 triệu yen, ong Uemura jeng brei yaom 2,5 triệu yen ka sa drei aring karei dalam mbang to yaom harei 7/11. Yaom ini nyu tapa mbaok yaom glaong di abih lac 3,15 triệu yen hu blei di thun 2022./.