Nyaom biai pambuak bruk blei saong pablei di TPHCM saong dom tỉnh, ban thun 2023 mbang 12 birau peih tabiak di Sang pakacah the duc the thao Phú Thọ. Nyaom biai ini hu 45 tỉnh ban hu mbaok tame, oh lac ba mai ban raya yaok ribau pandap di bhum taneh, bo daok peih ngak iek 19 labik ilamu  palei ngak biak gheih dalam negar. Njauk caik hatai lac tapa nan hu ngak jeng bruk pambuak gauk, taom gaok tapak  haong 12 he thong parabha pandap, 5 blah web pablei salih điện tử sang labaih 1.000 labik pabak pandap mai meng dom tỉnh, ban.

Tui kuhria, jalan cao tốc Mỹ Thuận - Cần Thơ atah 23 km hu peih pakak di harei paguh (24/12). Jalan ini abih takik jang jaik meteh tukvak nao meng TP Cần Thơ tal TP Hồ Chí Minh. Jalan ini hu maong lac pambuak hu siam 2 bhum kinh tế praong Đông saong Tây Nam Bộ. Jalan ini jeng hu pambuak haong dom jalan cao tốc hu makna praong daok hu padang ngak yau ye Cần Thơ - Cà Mau, Châu Đốc - Cần Thơ - Sóc Trăng, peih tabiak jalan patagok ka dom tỉnh, ban dalam bhum.

Yaom lac, gaok kan kandah kayua BĐKH jeng yau bruk kinh te, min thun ini, bruk patagok kinh te di tỉnh Sóc Trăng kuhria mboh hu 5,77%. Dalam nan, tỉnh trun pajaih abih tih hu labaih 330.380 ha padai, yuak hu labaih 2 trieu tấn ( tagok 1,46%, ta-eng padai đặc sản, asar siam glong  meblah labaih 93%. Thun 2024, tỉnh Sóc Trăng kham merat taong abih gah di bhum I mek hu 40%, padai brah asar siam meblah hu labaih 93,3%, pandap kaya ikan  dalam ia hu 380.000 tấn.

Bruk mblo tabiak gah langiu thông tin cá nhân, pablei salih thông tin cá nhân daok rah tabiak rilo ba tal dom mbang ieu phone pachot, ngak brei bhap bini mboh huac. Piah pacang cakak bruk ini, Mintri Công an hu pok panuac tagok Rajaei patabiakk Sarak  ka bruk khik caga dữ liệu cá nhân, hu ba tame ngak tui meng di harei 1/7/2023. Anak tal, Mintri Công an daok hu panuac tal dom jabat hu thẩm quyền patabiak harak quy phạm pháp luật saong tacei pato, peih ngak tui adat hukum ka bruk khik caga  dữ liệu cá nhân.  

Mentri Y te brei parabha ka Đồng Nai 21 ribau mbang jru vaccine 5 dalam 1 di Danak dak klauk jru pambak praong oh abih jien brei ka uranaih dalam tỉnh. Dalam mbang ini Đồng Nai lac bhum palei hu parabha jru vaccine rilo dalam negar. Tukvak tapa, kayua kurang vaccine  nan ye Mentri Y te  oh hu ginup vaccine piah pabak ka dom bhum palei. Suai labik, dom urang ilamu huac lac bruk ini ngak tamuh dom  jit ruak  dalam tukvak anak tal kayua bhap bini oh hu klauk jriu ginup.

Yaom lac daok tame bilan thu, min dom urang njauk ruak pandiak tabiak darah di Lào jeng daok tagok rilo. Kuhria tal harei 20/12, Lào hu 35.128 urang njauk ruak pandiak tabiak darah, 20 urang matai. Gah y tế Lào hu panuac ieu bhap bini patui bruk khik ramik dom jalan ngak piah pacang caga pandiak tabiak darah, khik hacih sa-at sang danaok, pruh jru pametai jamaok saong jah tak dom mbu kayau piah patrun patakik labik jamaok caih mebaoh. Di thun 2013, Lào hu labaih 44.000 mbang urang njauk ruak pandiak tabiak darah, dalam nan hu 95 urang matai.

Thun 2023 hu tal jaik 400 mbang đình công padeih ngak bruk dalam negar Mỹ hu mbaok di abih tih labaih 500.000 urang ngak ginup bruk. Dalam 10 thun tapa ye thun 2023 lac thun hu rilo abih dom bruk đình công padeih ngak bruk praong ngan haong labaih 1.000 urang ngak hu mbaok tame. Dom bruk padeih ngak bhian lac urang ngak khin tagok jien bilan, gimum biai veik harak pambuak bruk ngak ka nyu lagaih jang. Bruk pandiak hatai saong pambak praong meng dom mbang padeih ngak daok dui pachreih rilo urang tame, gam ngak jeng bruk khik caga kein laba di taong abih dom urang ngak.    

Di Tây Ban Nha dalam dom harei jaik tal Noel, menuac urang ba gauk nao blei vé số hu angan ieu lac "El Gordo", haong yaom jien thưởng abih tih lac 2 tỷ,590 triệu euro (samu 2 tỷ ,830 triệu USD). Bruk xổ số El Gordo di Tây Ban Nha hu peih tabiak di thun 1892. Hu jeng bhian randap, di tuk Noel, menuac urang di Tây Ban Nha chreih chrai ba gauk nao blei dom blah vé số yaom 20 euro piah alin hadiah ka gauk atau khik veik ka drei. Dalam thun blaoh, menuac sia taneh ia ini kuhria rah tapa hu buh tabiak 67,11 euro piah blei vé số El Gordo. Yaom jien mek tame meng pablei vé số hu rik tame 1 tỷ euro ka kadung jien karja Tây Ban Nha yaok thun./.