Page ini (10/10), Mban Chấp hành Đảng bộ Ban raya HCM mbang XI tukvak 2020 – 2025 hu peih Nyaom biai mbang ka 23. Brei panuac Nyaom biai, Ủy viên Mintri Chính trị, Bí thư Thành ủy Ban raya, ong Nguyễn Văn Nên ndom lac: “Nyaom biai njauk ginum biai, brei thau tantu cambaih laih dom jalan ngak ginup khang, meda ngak hu piah ngak salih bahrau bruk ngak saong mek hu jak jeng 3 bilan puac thun; ba tabiak, padang ngak dom nyaom jalan langyah piah caga ka thun 2024 piah patagok, caga ngak salah dom bruk ngak, jalan ba tabiak di Sarak Nyaom roya XI di Đảng bộ TPHCM. Dalam nan, bruk praong lac peih ngak hu siam lagaih di abih Sarak ka 98”, Bí thư Thành ủy TPHCM brei thau lac, ngan haong bruk đầu tư công, mBan Thường vụ meda peih nyaom biai ka bruk nan dalam bilan 10 piah ginum biai dalam jang ka asal kadha ini. 

Mintri Ilamu - Thể thao saong Du lịch bahrau brei thau Sarak peih pato, khik ramik bruk ngak thủ công meng kan di dom bangsa takik bhum taneran kraong Cửu Long. Ini lac bruk ngak siam piah khik ramik, patagok ilamu meng kan di dom bangsa takik pambuak haong cakrok du lịch di dom puk palei, abih di nyu lac dalam tuk bruk ngak thủ công meng kan daok lahik nao. mBan peih bruk hu peih pato pasram saong paglaong ilamu khik ramik 2 bruk ngak thủ công meng kan lac “Ngak muot saong ngak mặt nạ di bhap bini  Khmer” di tỉnh Trà Vinh saong “Menyim khan di bangsa Cam” daok di tỉnh An Giang.  

UBND tỉnh Đồng Nai meda panduan ba ba nao caik di labik karei taong abih 260 lồng, bè raong ikan daok di mangaok kraong Cái (sa binah di kraong Đồng Nai) jalan phường Hiệp Hòa ngak kan kandah tal bruk suai padang ngak tatua Thống Nhất, ban Biên Hòa. Dahlau di nan, hadei di tuk dom báo chí brei thau, lac hu labaih 20 baoh sang raong ikan dalam bè ngak kan kandah tal bruk peih mbaok jalan piah padang ngak tatua Thống Nhất, ngak ka bruk padang tatua suai veik, Thủ tướng Phạm Minh Chính hu panuac tacei tỉnh Đồng Nai langyah. Phó Akaok UBND tỉnh Đồng Nai Võ Văn Phi brei thau lac, bruk raong ikan di pak ini lac suan adat hukum.

Rilo bein pala thanh long di tỉnh Bình Thuận daok iek glang  thanh long karei bilan di tukvak baoh hijao. Urak ini, Bình Thuận daok pala rilo 2 janih thanh long ralow mbong patih saong ralow bhong mariah. Tukvak karei bilan meng bilan 10 tal bilan 3 thun hadei, dom sang bein truac gom saong iek glang ka thanh long tabiak baoh yau hatai caong. Dom bilan meng blaoh, langik pandiak khang, gam haong hajan rabuk nan ye ngak kan kandah tal bruk iek glang thanh long. Tỉnh Bình Thuận lac sa dalam dom bhum pala thanh long rilo abih dalam taneh ia, haong taneh pala praong jaik 30.000ha.   

Pambuak tal bruk urang ame am cuh sang pak palei Lạc Sơn 2, xã Cà Ná, huyện Thuận Nam, tỉnh Ninh Thuận, gauk gar di urang njauk bala brei thau lac hu veik sa urang metai. Nan ye, tal urak ini hu 3 urang metai dalam bala rahtabiak di melam 8/10. Dahlau di nan, uranaih umo 1 bilan metai dalam bala apui khuah, urang likei mek to pametai rup drei eng, hu rahra ba nao cấp cứu min oh tapa truh. Makna hu brei thau lac kayua diuk pasang kamlah gauk, nan ye ong Lâm Xuân Hòa mek xang eng drei cuh duk ndih.

Thái Lan cuh hu vệ tinh ka 2 tui iek baoh taneh (THEOS-2) tagok langik meng bhum Guiana di Prang. Dom urang ngak praong Thái Lan brei thau, baoh vệ tinh nan hu nduac iek dalam 3 bilan dahlau di tuk hu ba tame ngak bruk tui iek Baoh taneh. Vệ tinh ini hu pabak khau tin ka gah ngak nong, khik ramik ia, quy hoạch đô thị saong khik ramik kaya pandap meng langik tasik. Ini lac sa takai yam tagok praong dalam bruk  pacang caga di Thái Lan anak dom bruk samar drah meng pandar khau tin bahrau, tantu, cambaih laih hu pataom mek meng dom dịch vụ cảm biến meng atah.

Singapore daok dang anak mbang tamuh bahrau di jit ruak COVID-19. Tui kuhria meda hu veik rilo urang gaok ruak saong tame sang iek ruak di dom adit anak. Tui yaok pataom brei mboh, dom urang ruak ruak COVID-19 yaok harei di Singapore tagok meng 1.000 urang atah di ini klau adit, urak ini tagok 2.000 urang sa harei. Dom urang njom ruak lac kayua dua biến thể EG.5 saong janih phụ di nyu lac HK.3. Akaok Mintri Y tế Singapore hu kakei rahra, abih di nyu nan lac urang taha saong urang hu ruak dahlau dalam rup njauk patui veik klauk jru vaccine takik di nyu lac sa thun sa mbang, cuk pataik pacang mbaok di labik hu rilo manuac.

Enam urang Đài Loan (Trung Quốc) saong 2 urang Peru njauk cap kreik kayua ba menuac suan hukum meng taneh ia langiu tame Peru ngak bruk pachot tapa dom mạng viễn thông. Malaysia jeng brei thau, 43 urang di taneh ia ini hu daong paklah tabiak di Peru harei 7/10 hadei di tuk laik tame tangin kol pablei salih menuac. Hu thau, yaok ratuh menuac Malaysia njauk lah pachot ba nao ngak bruk di dom taneh ia yau Myanmar, Thái Lan, Campuchia saong Lào. Dom bruk urang nan njauk ngak lac pachot menuac pandar Internet piah ieu urang buh jien tame ngak mbang gah jien kỹ thuật số./.