Brei panuac di nyaom meyai online rajaei haong 63 tinh ban piah taong yaom bruk kinh tế - xã hội bilan 3 saong quý I/2024, ba tabiak bruk ngak dalam bilan 4 saong Quý 2/2024 hu peih tabiak di dah page ini 3/4. Thủ tướng Phạm Minh Chính brei thau, meng bruk hu mbaok tame ngak khang di abih hệ thống chính trị, bruk kinh tế - xã hội daok hu siam tagok, abih gah; bruk ngak hu dalam bilan 3 glaong jang bilan 1 saong bilan 2, dalam quý I thun ini cak rok siam lagaih jang quý I/2023 di abih tih dom gah. Kayua yau nan ye, Thủ tướng Phạm Minh Chính ieu kakei, peih ngak glaong di abih, siam di abih, kham maray ngak hu saong yam tapa dom bruk ba tabiak dalam thun 2024. Khang hatai ngak hu bruk patagok 6,5% tui jalan ngak lac “thun khang hatai”, “thun khik tani tanat” saong “thun jhul khang”.

Cần Thơ gam gam njauk glut jaleih, rilo baoh sang jaleih trun kraong. Mesup ini (3/4), takai kraong Trà Nóc jaleih di labik sang laik 54, 56, 58, 60 Lê Thị Hồng Gấm, khu vực 2, phường Trà An, quận Bình Thủy, ngak brei 7 baoh sang daok tapen gauk mbaih ra-ai saong mbuan jaleih gac dom baoh sang jaik taphia nan. Daok di ribaong Cần Thơ Bé, phường Thuận Hưng, quân Thốt Nốt mesup ini jeng hu bruk glut jaleih ngak brei  3 baoh sang laik trun ribaong. Dahlau di nan, harei 2/4 angaok jalan Rạch Chanh, phường Long Hưng, quận Ô Môn jeng rah tabiak bruk glut jaleih atah 25m, ngak ka  jalan mbak di palei kan nao mai.

Kapul Du lịch Bhum taneran kraong Cửu Long bahrau jao Harak brei ka “Labik du lich angan je ĐBSCL thun 2024” ka 4 labik du lich, lac Labik du lich mbuan Tức Dụp - An Giang, Labik ghe gilai Mỹ Tho - Tiền Giang; Labik du lịch sinh thái pambak tame rahra Cồn Hô - Trà Vinh saong Miuyim Ilamo bangsa Khmer Trà Vinh. Dalam nan, Miuyim Ilamo bangsa Khmer Trà Vinh hu 5 bilik parang iek saong labik parang iek ghe Ngo, ngan haong rilo pandap panda saong inem krung di raidiuk mikva Khmer. Yaok thun, Miuyim taduan raok labaih 40.000 mbang tuai dalam saong langiu taneh ia mai rivang iek, ba drei tame.

UBND tỉnh Cà Mau bahrau patabiak jalan peih ngak danak dak pambuak gauk patagok du lịch di Cà Mau haong TPHCM saong dom tỉnh, ban bhum ĐBSCL. Tui kuhria, tỉnh Cà Mau caga hu mbaok tame ginum biai pambuak bruk patagok du lịch bhum TPHCM saong bhum ĐBSCL mbang ka 3 thun 2024; danak dak pilih ruah labik nao ravang me-in dui pachreih di TPHCM saong bhum ĐBSCL; labik pambuak gauk gah du lịch di TPHCM saong bhum ĐBSCL; pambuak gauk padang ngak danak dak patagok pandap du lịch pambuak gauk TPHCM saong bhum ĐBSCL.

Dom harei tapa di Labik khik caga janih athur – mbaok mata glai Phú Mỹ (huyện Giang Thành, tỉnh Kiên Giang)  hu 9 drei sếu akaok bhong hu mai saong duah mbang di labik khik ramik. Tui Mban khik ramik labik ini, 9 drei sếu akaok bhong di 3 sang. Labik tapol sếu duah pandap mbang daok dalam labik joa lange saong hu rilo janih pandap mbang. Tapon sếu bahrau mai duah pandap mbang, oh ka daok veik. Labik khik ramik janih athur – mbaok mata glai Phú Mỹ praong labaih 2.700ha, lac bhum sinh thái dauk ia, pak ini njom ia lakhur trak, rilo hữu cơ, phun kayau lagaih haong langik pak ini rilo meng lac phun hareik bàng. Ini lac labik di cu bhian randap di dom janih sếu akaok bhong.

Mbang megei baoh taneh khang labaih 7 độ di langiu tasik huyện Hoa Liên, pulao Đài Loan mesup ini (3/4) ngak brei takik abih 4 urang matai, 97 urang njauk rambus, 26 sang glaong praong rilo tal tayah jaleih, labaih meteh di Hoa Liên, haong jaik 20 urang daok gar gah dalam. Tui dom urang ilamu gah địa chấn học Đài Loan, ini lac mbang megei baoh taneh khang abih di baoh pulao ini kuhria dalam 25 thun tapa, hadei di mbang megei 7,6 độ ngak ka labaih 2.400 urang matai di thun 1999.

Gah papar binguk negar Triều Tiên KRT brei thau, negar ini cuh iek hu jak jeng sa tên lửa biak samar glaong mbaih saong par atah rai bahrau pandar janih nhiên liệu khang. KRT hu ba tabiak sa đoạn video mek thaot binguk Akaok negar Triều Tiên Kim Jong Un pasang iek bruk cuh tên lửa, gam tui di nan jeng brei thau  ini lac janih vũ khí chiến lược brei mboh “siam di abih” dalam bruk pacang caga di Triều Tiên.  

Ban ine Moscow di Nga hu langik pandiak oh ka bhian mboh tuk harei lac 18 độ C, daok tuk malam lac 9,3 độ C. Ini lac tanut glaong abih kuhria meng dahlau mai dalam sa harei akaok bilan Xuân. Langik di ban ine Moscow dalam bilan 4 hu kuhria mboh dahlau lac samu langik pandiak bilan Hè dalam bilan 6. Langik thu saong rilo pandiak. Dalam tuk nan, harei 31/3 meng blaoh, urang vakil dom labik pablei pandap điện tử gia dụng di Moscow brei thau lac menuac sia di ban ine ba gauk nao blei mac li-an, caga ka sa bilan Hè biak pandiak pa-uh./.