Dah page ini, di Hà Nội, Jabat Akaok negar peih họp báo brei thau Lệnh di Akaok negar ka 7 hukum bahrau hu Quốc hội mbang XV brei tapa di mbang nyaom ka 6. Dalam họp báo, Phaok Chủ nhiệm Jabat Akaok negar Phạm Thanh Hà brei thau Lệnh di Akaok negar ka 7 hukum bahrau hu Quốc hội mbang XV brei tapa di mbang nyaom ka 6. Tui nan, 7 Hukum bahrau hu Quốc hội brei tapa, lac: Hukum kaya ia; Hukum Sang daok. Hukum Căn cước; Hukum Viễn thông; Hukum khik ramik, khik caga danak dak quốc phòng saong labik quân sự; Hukum Pablei salih taneh riya, sang danaok saong Hukum Kapul dom urang hu mbaok tame khik caga siam makre di labik cơ sở.

Jeng dalam mesup ini, di Pasak Nyaom biai Pakar negar Mỹ Đình, ban ine Hà Nội, 995 urang hu mbaok dalam Nyaom roya pakat negar urang ngak nong Việt Nam mbang ka VIII, vaktu 2023 - 2028 yam tame harei ngak bruk camereip. Nyaom roya hu pang harak caga Pathau khan pasang iek veik di mBan Chấp hành Kapul urang ngak nong VN pakat negar mbang ka VII; pang harak khan ka bruk pasiam, pabak Điều lệ Kapul urang ngak nong Việt Nam saong dự thảo Điều lệ Kapul urang ngak nong Việt Nam pasiam veik, pang pathau khan Sarak brei padang dom Pasak ginum biai saong tacei pato ginum biai. Hadei di nan, Nyaom roya pataom tame ginum biai dom asal kadha, văn kiện di Nyaom roya di 11 Pasak ginum biai tui adat hu tacei pato blaoh. 

Thun Du lịch negar 2023 ngan haong asal kadha “Bình Thuận – Pataom veik hijao” meda tamat di harei 27/12 anak tal. Harei tamat meda peih tabiak di labik tasik Ocean Dunes di phường Phú Thủy, ban Phan Thiết ngan haong danak dak ilamo praong saong siam gheih. Mban peih bruk brei thau lac, danak dak ilamo hu dom hệ thống ia harei pambuak haong kong nghe hu ramik ngak tui sap ragu ragam, dom kadha parang iek pambuak haong truac video hiệu ứng, parang iek ia harei laser. Gam tui di nan, danak dak hu ramik ngak di tasik, parang iek ilamo màn hình ia yaih khan labik mekre,, ilamo, anek manuac Bình Thuận... 

Công an TP. Long Xuyên, tỉnh An Giang cap mek hu sa urang daok angaok jalan nao pablei pháo patuh labaih 3.300 baoh pháo thaik yau baoh blong. Di jabat Công an, Nguyễn Văn Thuận, ndih tapui thun 1994, sang daok di huyện Giang Thành, tỉnh Kiên Giang, khan lac: dom pháo nan Thuận daok angaok jalan ba nao TP. Long Xuyên pablei duah laba, min oh ka tal labik pablei ye njauk cap mek. Nao pasang iek labik daok di Thuận, gah Công an daok hu mbaoh saong cap mek gac jaik 1.000 baoh pháo yau nan. Công an hu ngak harak gar cap mek piah pasang iek, duah thau, ngak brei cambaih laih bruk nan. 

Công an ban Thuận An, tỉnh Bình Dương  pambuak haong dom gah pambuak tal, pasang iek tapak, duah thau bruk ba tal apui khuah di sa Cty jhik di phường An Phú. Hu thau, di tuk maong 12 meteh kreh melam blaoh, rahra mboh apui khuah tagok di labik bồn khik piah manjek, lò hơi pandar piah njom khan bai di công ty nan ye samar drah khan tal gah chức năng. Taduan hu panuac khan, Jabat Cảnh sát Pacang khuah padam khuah hu ba rilo sruh radaih padam khuah, radaih kanjar, labaih 60 urang jakar mai tal labik piah padam khuah. Tal maong 2 meteh dah page, apui meng hu padam abih. Bruk khuah nan oh hu menuac halei njauk hagait min labik lò hơi khuah, khut rilo jamraik mac moc. 

Bruk nao du lịch dalam mbang padeih puac thun di Mỹ daok tagok glaong di puac adit blaoh tuk langik siam saong bruk klaak mbang par biar jang. Tapa nan brei mboh bruk peih mbaok siam mekre ka bilan du lịch padeih lễ jar var abih dalam thun. Mbang padeih lễ puac thun ini, dom hãng kapal haok Mỹ daok kuhria mboh dahlau lac sa bilan padeih lễ rilo tuai. Gah kapal haoh Mỹ jeng bak hatai jia ka prein langyah bruk gar tavak di dom mblang kapal haoh hadei di tuk pah pabak tame yaok rabau phi công, tiếp viên, plaih bruk suai damuai yau di mbang padeih thun blaoh. Dalam dom harei camereip di mbang padeih jhung thun ini, dom hãng kapal haoh di Mỹ bahrau klaak 1,2% dom mbang par, lac biar di abih kuhria dalam 5 thun tapa, min langik oh siam tuk halei jeng ngak kan kandah tal bruk ravang me-in,  du lịch. 

Dự thảo Hukum Y tế saong Pasang iek jit ruak di jalan tapen negar di Trung Quốc hu payua tagok Ủy ban Thường vụ Quốc hội negar ini pasang iek di harei ini. Dự thảo rilo meng lac brei adat ka 5 gah, dalam nan hu bruk pok glaong bruk pan akaok di ndang ngan haong dom bruk ngak y tế saong bruk pasang iek jalan tapen negar; ngak brei siam jang dom bruk ngak yaok harei di gah y tế saong pasang iek jit ruak di jalan tapen negar, pabak bruk ngak di abih tih dom gah, paglaong bruk pambuak gauk; ngak salah dom jalan langyah piah pacang caga samar drah di pabah mbang negar ngan haong dom janih ruak njom pambak dalam taneh ia atau di negar langiu daok tamuh tabiak atau njom pambak; paglaong dom jalan langyah khik tani tanat y tế, pasang iek jit ruak di jalan tapen negar; ngak salah dom adat bruk ngak hukum pambuak tal, tantu cambaih laih dom bruk ngak suan tal adat hukum njauk langyah, taong phat.

Tapon nyaom bol pan phao kraong Philippines daok caga ka rilo mbang pasram mesruh, nao khik iek rilo jang di biển Đông haong dom taneh ia ayut sahabat. Ini lac sa binah dalam bruk salih jalan ngak, meda salih meng sanya gauk 2 gah di urak ini yam tapa khik iek haong rilo gah di thun 2024 saong dom thun anak tal. Urang brei panuac di Tapon nyaom bol pan phao kraong Philippines brei thau, bruk salih karei nan nyu pambuak tal bruk “padang tagok, patagok talei pambuak bruk haong dom gah piah jhul tagok prein khang di dom tapon nyaom bol pan phao kraong piah khik kajap kein laba di Philippines, khik caga sron mbon, tani tanat dalam bhum”.