Nyaom roya mbang ini hu ginum biai dom dom bruk brei patagok nan lac: Jhul pasamar bruk ndem meyai nao mai, kapol nyaom, bruk praong lac jien bilan, jien thuong, tukvak ngak bruk, tukvak padeih padei, labik ngak bruk hacih saat salamat. Pataom tame patagok urang đoàn, padang cong đoàn cơ sở di som doanh nghiep langiu karja…Tui Tong LĐLĐ Viet Nam, meyah peih ngak hu dom bruk nan, ye kong doan  meda patui bruk brei mboh bruk praong di drei lambaok, khik caga, kuhria  kein laba njauk lagaih, njauk di urang doan, urang ngak.

 UBND ban Thủ Dầu Một, tỉnh Bình Dương bahrau ba tame pandar Pasak rami ramik tacei jalan hadah krah (IOC). IOC di ban Thủ Dầu Một lac sa hệ thống kong nghe khau tin lac cơ sở hạ tầng, phan cung, phan mem hu kein piah mek tame, langyah dom khau tin. Meng nan, daong ka urang pan akaok ban hu jalan maong iek parilo gah, taong abih gah di kinh tế - xã hội piah ba tabiak dom sarak tacei jalan biak samar drah, samu, tantu cambaih laih. Ong Nguyễn Văn Lợi, Bí thư Tỉnh ủy Bình Dương brei thau lac, ngak IOC lac piah paglaong prein khik ramik rahra saong sangka siam jang veik ka raidiuk, mbang ngui di rahra.

Meng harei ini 1/12 mbiah tal thun 2025, jien ngak birau, salih sarak peih radaih  online hu trun meng 135.000 đồng trun daok 115.000 đồng sa mbang ngak. Tui Mentri Jien padai, bruk trun jien brei sarak peih radaih  tui jalan online piah pachreih bhap bini pandar dich vu karja. Tui nan rik tame ngak harak mbuan, takik harak ho so, patak pataom tukvak saong jien buh tame langyah hanh chinh  brei salih sarak ba-ar  peih radaih. 

UBND TPHCM bahrau ba tabiak Jalan peih dom bruk ngak uan raok thun bahrau 2024. Tui nan, danak dak cuh phao bingu nghệ thuật meda hu peih tabiak dalam 15 minit, meng maong 12, 15 minit melam harei 1-1-2024, cuh glaong abih di labik akaok jalan lubang kraong Sài Gòn saong cuh bier abih di Bein bingu ilamo Đầm Sen, quận 11. Danak dak countdown (yaok kaduan veik vaktu) uan raok thun bahrau 2024 meda hu peih tabiak di melam harei 31-12, di Bein ilamo rup patau Chủ tịch Hồ Chí Minh saong jalan nao takai Nguyễn Huệ. Taphia di nan, dom danak dak parang iek ilamo jeng hu peih ngak di ban Thủ Đức saong dom quận huyện dalam 2 melam lac melam harei 31-12-2023 saong 1-1-2024.

Mbiah tal bilan 11, gah dulich Binh Thuan ngak hu siam jang bruk ba tabiak ka tuai damuai mai rivang dulich dalam thun, tuai negar langiu tagok hu dua mbang thun blaoh. Ong Bùi Thế Nhân, Yam ndoc Sở Ilamu, The thao saong Du lịch Bình Thuận khan lac, akaok thun ini, Binh Thuan kuhria mboh dahlau brei taduan raok 8,3 trieu tuai damuai mai rivang ma-in, tagok 2,1 trieu mbang dut saong thun 2022, jien mek tame hu 19.500 tỉ đồng. Dalam nan tuai damuai dunya caong khin labaih 220.000 mbang. Hu bruk cak rok patagok nan lac meneing kayua hu dom jalan peih drah samar Phan Thiết - Dầu Giây saong Vĩnh Hảo - Phan Thiết ba tame pandar daong ka Bình Thuận hu lagaih, patagok.

Di Philippines, dom urang njom ruak HIV daok mboh tagok biak samar. Tui dom urang roh duah ilamo, makna ba tal bruk ini lac kayua bruk gaok gauk online biak mbuan jang, pato magru ilamo ka likei kumei ka oh mboh ginup saong hatai oh khin pang tui di rilo rahra ngak ka dom urang njom ruak HIV kan klah raba saong hu taong ruak. Yaom lac ka oh tal 1% dalam labaih 110 triệu rahra Philippines hu brei thau lac njom ruak HIV, min du lieu di Liên hợp quốc brei mboh, ini lac sa dalam dom taneh ia mboh bruk njom pambak ruak HIV/AIDS samar abih di dunya.

Rajaei New  Zealand  ndem lac pakauk pandar điện thoại di động dalam dom sang bac di taneh ia. Anek saih  brei payua điện thoại  tuk page harei saong taduan veik tuk tabiak nao sang. Thun 2022, dom urang roh duah di Pasak  Pato megru  ngak pahala New Zealand hu khan brei thau ka bruk “ sraw kadau” tuk mboh hu 30% dom dam dara umo 15 thun takik bac atau tavak. Dom urang roh duah  kakei lac njauk brei hu jalan ngak chip piah lang talaih dom bruk haduh hatai nan di New Zealand. Kayua Thủ tướng taneh ia ini kham pakauk anek saih pandar dien thoai di dong dalam sang bac.  

Rilo labik pak negar Anh daok rahtabiak bilan ar tuyết laik trun aval jang abih dalam 15 thun. Langik tasik oh siam ngak cagar veik dom sruh gilai saong ngak ka rilo sang bac njauk kareik pambang. Rilo labik mboh tuyết laik tapar abih dalam bilan 11 meng di thun 2007. Jabat chức năng bhum palei hu ba tabiak panuac kakei ia patau tuyết di rilo labik yau ye England, Scotland saong gah barak Ireland, ngan haong rilo bhum dalam taneh ia, tui kuhria meda hu tuyết tapar tal 10cm di harei ini 1/12./.