Biar harei kabroi, ban uy Ban raya HCM peih bruk brei thau sarak di Mentri Chinh tri  ka bruk urang jakar. Tui nan Mentri Chinh tri ba urang nao ngak bruk, jao bruk ngak ka ong Nguyễn Văn Được, Uy vien Trung uong Ndang, Bi thu Tinh uy, Akok  HĐ bhap bini tinh Long An hu mbaok tame BCH, Mban Thuong vu  saong ngak Pho Bi thu Thành ủy TPHCM, vaktu 2020 -2025. Brei panuac jao bruk ngak, Bí thư Thành ủy TPHCM Nguyễn Văn Nên Mentri Chinh tri sahaneng kuhria tani tanat dahlau ba ong Nguyễn Văn Được tame ngak bruk nan. Ini lac urang jakar hu ilamo bac da-a hadah krah, hu pasram patia yam tapa dom kan kandah meng pakat palei pala tagok; naih joi ngak siam bruk hu jao brei; thau ilamo peih ngak tui dom jalkan tacei ba, sarak karja; caong khin ong Nguyễn Văn Được hu patagok siam dom jalan diukrai piah rik daong tame Ban raya HCM rilo jang dalam tuk vak anak tal.

UBMT Negar Viet Nam Quan 8, TPHCM birau peih ngak danak dak alin hadiah pandap ka 170 baoh sang  urang bangsa Cam uan raok bulan Ramadan thun ini. Hu mbaok di danak dak, Pho Thủ tướng Thường trực dahlau diah lac ong Trương Hòa Bình payua panuac ayuh gam thau dhar phol biak ralo tal UBMT Negar Viet Nam Quan 8 saong dom urang ngak pahala. Ini lac danak dak oh tok hu makna dalam raidiuk bhap bini, bo daok brei mboh bruk jum pataom sang klak rabha anit ranam gauk, rik tame  peih ngak siam dom sarak bangsa di Dang saong Karja.

So Pato megru tinh Dak Lak daok kham merat ba tame pandar ngak bruk salih tapa taka so saong tri tue nhan tao AI piah pato bac jeng yau khik iek bruk ngak gak pato megru, tapa nan paglong bruk pato saong bac dalam tinh. Tui ong Đỗ Tường Hiệp, Pho Yam ndoc So Pato megru Dak Lak, bruk jhul pakhang pandar taka so dalam pato pakai oh lac daong paglong bruk pato saong bac,  bo daok ngak brei sumu gauk jang dalam bruk pato saong bac di dom bhum, abih di nyu nan lac dom bhum atah bayah, bhum ceik car, bhum urang bangsa takik.

Kapol Menyek Viet Nam birau payua 250 trieu dong ka Mban jak ba urang rik Kadung jien “ Daong urang kathaot” tinh Gia Lai piah daong huyen Mang Yang saong Đak Đoa padang 5 baoh sang Jum pataom ka urang kathaot, jaik kathaot. Mban jak ba urang rik Kadung jien “ Daong urang kathaot” tinh Gia Lai jeng hu payua 150 trieu dong ka UB MTTQ Việt Nam huyện Mang Yang padang ngak 3 baoh sang “ Jum pataom” ka 3 po sang di palei Đak Bêt, xã Đak Trôi. Yaok baoh sang hu daong 50 trieu dong. Ini lac bruk ngak hu makna dalam raidiuk di Kapol Menyek Viet Nam ba tangin tame jum gauk ngak brei abih baoh sang oh daok taik tahak.

So KH saong Dau tu tinh Binh Thuan birau mbaok harak danak dak padang ngak Sang bac mau yao Hàm Cần, huyện Hàm Thuận Nam. Kuhria abih tih jien buh tame ngak labaih 4 ti dong, pandar jien meng bruk xo so kien thiet. Hàm Cần lac xã bhum ceik  di huyen Hàm Thuận Nam hu jaik 1.300 baoh sang, ralo lac urang bangsa Raglai. Bruk buh jien tame ngak sang bac nan piah hu labik bac da-a, pabak ka bruk paglong pato saong bac ka uranaih mam non pak ini.

Sarak padeih bruk daong negar langiu di Tong thong My Donald Trump birau ini ba tal rilo urang ilamo y te brei panuac kakei dahlau lac anak tal hu yaok trieu urang metai kayua HIVS/AIDS - abih di nyu lac ngak biak jhak tal chau Phi. Oh lac padeih di nan,  bruk kurang jien daong daok ba tal dom bruk roh duah ka ruak nan njauk padeih. Dom urang y te daok ngak bruk tapak haong urang ruak di chau Phi khan lac rilo labik y te brei kareik pambang kayua kurang jien.

Yaom ameh dunya saong dalam taneh ia tagok glong ba tal rilo urang caong blei, ngak veik dom ameh cuh ngak mekre di Trung Quoc. Rilo urang dak tui gauk talei atah di labik pablei ameh cang blei atau ngak veik dom ameh tuan angaok rup. Dom urang roh duah kakei lac, yaom ameh meda tagok glong, yau nan ye urang blei njauk sahaneng hadah krah tuk blei amek cuh atau blei ameh piah. Urang blei ameh hadar  brei palih ruah njauk labik  piah hu ameh siam saong njauk yaom di nyu.

          Dom urang ngak praong di Brazil khan lac ban Rio de Janeiro birau gaok langik pandiak glong tal 44 do C. Ini lac pandiak glong abih bhian mboh kuhria meng tuk hu panuac kakei lac langik pandiak dahlau di ini jaik 10 thun. Karja ban Rio de Janeiro hu kakei ka bruk pandiak  catang di dom harei anak tal, gam peih ngak sa jalan pacang caga langik pandiak catang yau ngak brei la-ar saong pabak ia di grauk labik pak ban ini./.