Thủ tướng Rajaei bahrau brei pabak 4.000 tỷ đồng meng phun jien caga di kadung jien kanja trung ương thun 2023 ka dom tỉnh bhum ĐBSCL peih ngak danak dak pacang caga glut jaleih takai kraong, takai tasik. Thủ tướng Rajaei ieu kakei suai di abih tal harei 31-12-2024 ngak salah danak dak tui njauk adat, peih ngak danak dak tui njauk adat di hukum, oh caik rahtabiak bruk palai pajoa, tham nhũng, dom bruk oh siam.

Taong Liên đoàn Lao động Việt Nam bahrau peih bruk pok mayaom 33 kapul nyaom saong 46 urang naih gheih di Danak dak “ 1 trieu sahaneng duah bahrau – kham marat yam tapa kan kandah, khang hatai jayah jit praong COVID-19". Danak dak hu peih tabiak meng thun 2021 dalam tuk kinh tế - xã hội gaok kan kandah kayua jit ruak COVID-19. Tui Tổng Liên đoàn Lao động Việt Nam, tal tukvak tamat danak dak lac harei 31/8/2023, hu labaih 2,4 triệu sahaneng duah bahrau hu payua mai ka danak dak, haong yaom laba ngak hu tui kuhria lac labaih 33.000 tỷ đồng.

 Danak dak tatua Mỹ Thuận 2 daok di mangaok jalan Roya 1 pambuak tỉnh Vĩnh Long saong Tiền Giang di Danak dak jalan nduac samar barak – maraong daok hu jhul samar bruk ngak, tui kuhria meda pambuak haong gauk dalam bilan 10 saong brei nduac radaih di puac thun ini. Tatua Mỹ Thuận 2 saong jalan ba dua tatua atah labaih 6 km; tatua praong atah labaih 1,9 km, hu ngak 6 jalan radaih, prein nduac 80 km/h. Abih tih phun jien buh tame lac labaih 5.000 tỷ đồng. Danak dak Tatua Mỹ Thuận 2 hu makna biak praong ngan haong dom tỉnh Tiền Giang, Vĩnh Long, abih di nyu nan lac di bhum ĐBSCL.

Tỉnh Sóc Trăng kham marat tal thun2025 mek hu jaik 234.000 tấn hadang ia mateh mbak mateh taba, haong yaom jien pablei tabiak negar langiu khik hu di tanut 1 tỷ USD. Yaom lac bruk raong hadang ini dak harei dak tagok, min oh ka biak khang kajap tuk bruk raong sit sot daok hu rilo, takik pandar ilamo kỹ thuật, kurang phun jien, kan kandah dalam pasang iek chat luong hadang pajaih,… nan ye kein laba ka oh glaong. Kayua yau nan ye, brei hu padang danak dak patagok bruk raong hadang ia mateh mbak mateh taba di tỉnh Sóc Trăng. (VOV)

Meng harei ini tal harei 20/11 anak tal, Công an tỉnh Bình Thuận meda salih gauk pasang iek, langyah urang manyum alak mbia blaoh peih nduac radaih di dom bhum palei dalam tỉnh. Tuk hu dom urang ngak suan, mayah lac urang jakar, urang đảng ye payua pathau khan tal jabat, kapul nyaom labik urang jakar, urang đảng daok ngak bruk. Bruk pasang iek catang bruk manyum alak mbia piah ngak brei bruk hu salih karei siam jang, yam tal bruk ngak pajeng bhian randap, ilamo “manyum alak mbia lac oh peih radaih”. Công an Bình Thuận brei thau lac, bruk pasang iek, langyah dom urang nduac peih radaih hu manyum alak mbia lac “oh hu bhum pakauk, oh hu urang oh langayh”. 

Dalam pathau khan bahrau abih bahrau hu ba tabiak, urang jakar ngak praong di Ấn Độ brei thau, hu takik di nyu 77 urang metai dalam bala ia sua ia dauk di gah Đông Bắc taneh ia ini di adit blaoh. Ia dauk ia sua ngak khut tayah labaih 1.200 sang di bang Sikkim, rilo jalan, tatua jeng jaleih khut ngak ka yaok ribau manuac daok gar di labik kreih ia sua nduac khang. Gah daong duah manuac gaok bala hu daong ka labaih 2.500 urang daok gar dalam labik ia sua. Urak ini, bruk ba manuac tabiak truh labik ia sua gaok rilo kan kandah kayua jalan, tatua khut jaleih kayua ia sua, jalan talei phone jeng klaih klaoh oh ieu hu.

Jabat Y tế Israel brei thau lac hu labaih 700 rahra negar ini metai saong 2.200 urang njauk rambuac dalam mbang taong praong di kol  Hamas, taong tame gah maraong negar Israel dah page 7/10. Rilo taneh ia dalam bhum daok hu panuac ieu dom gah njauk sabar veik, plaih ngak catang tagok bruk mesruh gauk. Dom taneh ia, yau ye Ai Cập, Saudi Arabia, Thổ Nhĩ Kỳ… brei thau lac halain hatain  dang tabiak pambuak talei langyah piah brei padeih mesuh metak saong padang veik bruk saron mbon di dalam bhum. Danak dak pandap mbang dunya di Liên Hợp Quốc ieu kakei samar drah padang dom jalan ngak pahla piah ba pandap mbang tame Gaza.

Melam kabroi, Bruk Tamat Harei pataom The thao chau A – ASIAD mbang 19 hu peih ngak di mblang pakacah Pasak The thao Olympic ban Hàng Châu (Trung Quốc). ASIAD thun ini peih tabiak meng harei 23/9 tal 8/10 ngan hoang labaih 12.000  urang pakacah mai meng 45 taneh ia saong bhum taneh. Trung Quốc dang kaok ngan saong abih tih 201 HCV, 111 HCB saong 71HCĐ;  dang labik glaong abih lac 199 HCV bhian mek hu di ASIAD Quảng Châu 2010. Kapol Thể thao Việt Nam angan dang dhi 21 kuhria abih tih hu 3 HCV, 5 HCB saong 19 HCĐ./.