Mentri Ngak nong saong Patagok palei pala brei thau, 2 bilan akok thun ini, kuhria taong abih jien pablei kaya ikan dalam ia di Viet Nam tabiak negar langiu hu jaik 10 tỷ USD, tagok labaih 50% dut saong tukvak ini thun dahlau. Jien pablei pandap tabiak negar langiu hu jaik 2,7 tỷ USD, tagok jaik 2,9 mbang. Njauk caik hatai lac jaik abih dom janih pandap kaya nong kaya ikan di taneh ia mek hu yaom pablei tabiak negar langiu tagok glong dut saong tukvak ini thun dahlau, yau: brah, caphe, amriak kalu, cao su saong te.

Akaok UBND tỉnh Vĩnh Long bahrau tabiak harak ieu dom sở, ngành, puk palei patagok dom jalan ngak pacang caga mbang tabung glaong pandiak bhang, kurang ia saong ia njaom mbak, oh caik brei kurang ia pandar, oh ngak kan kandah tal bruk pala drak dalam dom bilan daok veik di bilan thu thun ini. Akaok UBND tỉnh Vĩnh Long ieu dom Sở Tài nguyên & Môi trường pataom tame tacei pato, tui iek catang bruk langik tasik saong bruk ia, samar khan brei thau bruk bhang, pandiak, kurang ia, ia mbak njaom tame saong jalan nduac angaok dom kraong praong nduac tapa tỉnh piah hu dom jalan pacang caga haong bruk kurang ia, pabak ia pruh ka phun pala saong ia pandar yaok harei.

Tỉnh đoàn Dak Lak saong Hiệp hội Durian tỉnh Dak Lak pambuak haong dang tabiak peih ngak số hóa jaik 10 ribau phun durian tagok ban do phun kayau di xã Chư Kbô, huyen Krông Buk. Ini lac danak dak ba gauk tabiak ngak Harei tabung halan hatian daong gauk padang ngak palei pala birau saong Harei Adit hijao thun 2024 kayua T.Ư Đoàn peih ngak. Danak piah jhul pakhang bruk nao dahlau di dam dara dalam bruk pandar số tame ngak nong, padang ngak, patagok khang kajap phun durian di Dak Lak ; duah labik pablei tani tanat saong paglong yaom phun durian ngan hoang darak pasar dalam saong negar langiu, lang talaih kan kandah bruk pablei dahlau tuk paik baoh.

Piah khik ramik, patagok yaom glaong ilamu hadah krah di urang Cam, yaih khan dom rija roya, dom adat cambat di urang Cam An Giang, meng harei 17 tal harei 19/4 tal, di Sang pakacah huyện Châu Thành hu peih Harei pataom ilamu, thể thao, du lịch urang bangsa Cam tỉnh An Giang, mbang ka 10 thun 2024. Hu mbaok tame harei pataom, hu dom nghệ nhân, nghệ sĩ, urang daoh, tamia, urang me-in the thao lac urang Cam daok dalam tỉnh. Di harei pataom, daok hu daoh tamia, parang iek khan ao ngui cuk meng kan, dom bruk yaih khan ka du lịch, thể dục - thể thao.

Sở Tài nguyên saong Môi trường tỉnh Đồng Nai birau hu harak van ban payua Tổng Kong ty Mblang kapal haok Viet Nam ka bruk nyom nerak dhun mun di danak dak Mblang kapal haok dunya Long Thành(mblang kapal haok Long Thành). Gah chức năng tỉnh Đồng Nai taong yaom, Kong ty Mblang kapal haok Viet Nam oh ka hu jalan pasang iek taong abih bruk pambuak tal bruk pruh ia di lien danh po thầu nan ye bruk pruh ia, oh hu sumu gauk, oh ginup di dom labik ba tal dhun mun par bak.

Bruk lakhah caga di Hàn Quốc tagok hasit di thun blaoh, dalam tuk bruk ndih tapui anek di taneh ia ini jeng daok biar abih di dunya, kayua urang kamei daok kuhria ka bruk ngak saong daok huac ka jien raong anek. Dahlau di nan, dom bruk takik brei ngak kayua jit praong Covid-19 ba tal bruk lakhah caga trun jaik 10% di dom thun 2020 saong 2021. Jaik abih urang Hàn Quốc ndom lac jien pah sang daok glaong  lac jalan pacang praong abih ka bruk khin gauk, tok gauk.

Jabat chức năng kaoh pulao dulich Bali di Indonesia kakei dom kong ty dulich jeng yau tuai damuai brei caik hatai sangka anak bruk langik oh lagaih daok rah tabiak di labik ini. Tui nan, dom kong ty dulich saong tuai damuai njauk brei duah thau ka langik tasik di dom labik rivang ma-in danei angan dahlau di tuk nao rivang. Langik tasik kan kandah bo Bali daok gaok kayua hangin khang, ribuk nhiet ndoi rah tabiak di labik ini. Langik hajan prong, hangin khang daok ngak ka Bali dang anak yaok rituh tấn hareik theik tame takai tasik, ngak njom nerak moi truong.

Rajaei Campuchia bahrau ndom veik jalan sahneng ka bruk jhul tagok, peih praong bruk hu mbaok di dom taneh ia dalam bhum tame Công ước pakauk mbom mìn, pamaong tal sa bhum Thái Bình Dương oh daok mbom mìn di thun 2025. Campuchia lac sa dalam dom taneh ia hu menuac metai kayua mbom mìn glaong abih dunya. Jaik 1 triệu urang Campuchia jeng daok diuk dalam dom labik njom nerak mbom mìn./.