Kapul Chữ thập đỏ tỉnh Tiền Giang daok jhul khang bruk jak ba dom gah pachreih tui piah padang pok jien, pandap alin hadiah daong ba danak dak "Tết anit ranam” thun 2024 tal 30.000 baoh sang kan kathaot, urang gaok kan kandah, urang mbuan gaok kan kandah dalam tuk Tết Nguyên đán sak inegirai jaik tal. Tui kuhria, abih tih phun jien dalam tuk ini lac 15 tỷ đồng; yaom yaok paok pandap takik di nyu meng 100.000 đồng tagok. Dahlau di nan, dalam thun 2023, Kapul jak ba hu labaih 72 tỷ meteh, daong ka labaih 189.000 sang kan kathaot, sang kan kandah dalam tỉnh.

110 tấn pandap khik tani tanat yaom kaom, yaom jaik 5 tỷ đồng lac pandap công nghệ, hóa mỹ phẩm, pandap pandar, khan ao saong pandap that hu ba tabiak 7 xã pulao kaoh di dom huyện Kiên Hải, Kiên Lương saong TP. Hà Tiên, tỉnh Kiên Giang piah pablei ka mikva dalam tuk Tết Nguyên đán sak inegirai thun 2024. UBND tỉnh Kiên Giang hu brei bruk ka dom gah pambuak tal, daong palgaih ka doanh nghiệp ngak hu siam bruk pabak pandap khik tani tanat yaom kaom darak pasar di tuk jhung thun 2023 saong Tết Nguyên đán sak inegirai thun 2024…

Meng akaok bilan 10 saka ia bilan ini mai, urang ngak nong tỉnh Bình Thuận tame tukvak tabung glaong truac gom ka baoh thanh long bilan Tết dalam hatai suh sah, huac baoh thanh long laik yaom. Tui ong Huỳnh Cảnh, Akaok Kapul Thanh long Bình Thuận, pak ini daok hu labaih 20.000ha thanh long daok truac gom, tui kuhria baoh pablei tabiak darak pasa jaik Tết lac labaih 120.000 tấn. Yaom thanh long urak ini meng 14.000-15.000 đồng/kg. Thanh long daok hu pablei tabiak negar langiu tui jalan chính ngạch tapa dom darak pasa Trung Quốc, Thái Lan, Ấn Độ… Min, gah ngak nong tỉnh Bình Thuận kakei mikva oh ba gauk pala rilo di bilan Tết, njauk pala rah tui bilan piah plaih nyaih bruk lac baoh rilo, pablei oh abih, yaom trun biak bier.

Piah pabak bruk blei pandar di bhap bini saong tuai damuai dalam tuk Tết Nguyên đán ni, urang ngak ikan saong dom labik ngak pandap pablei salih di tỉnh Ninh Thuận daok jhul khang bruk ngak tabiak dom kaya ikan thu saong pandap chế biến hacih sa-at, siam mekre. Piah khik salamat kaya pandap di tuk Tết, abih di nyu lac ngan saong kaya ikan thu, UBND tỉnh Ninh Thuận tacei pato dom gah chức năng patagok bruk pasang iek salamat pandap mbang di dom labik ngak pandap, sang pablei salih, cửa hàng, darak pasar piah samar mboh, langyah dom bruk ngak suan, khik kajap prein yava ka urang blei mbang.

Urang pametai manuac, blah mek drap ar di huyện Hóc Môn, TP.HCM njauk cap khik di tuk jala pandiak harei ini (9/1) hadei di jaik 3 harei nduac dauk di mblang hamu praong 3ha di xã Lương Hoà, huyện Bến Lức, Long An. Urak ini, urang ini hu jao ka Công an TP.HCM langyah. Hu thau, dahlau di nan, harei 6/1, rahra mehit sap preo khang gah dalam sa baoh ki-ốt pandar piah ngak quan pablei cà phê, ia manyum di jalan Roya 22 dalam xã Xuân Thới Sơn, huyện Hóc Môn, TP.HCM. Hadei di nan, rahra hu mboh sa urang likei tabiak truh quan, ndik angaok sruh radaih mac SH mode nduac biak samar. Rahra mai iek ye mboh saai N.T.H.P (umo 22 thun, lac urang ngak di quan cà phê) daok njauk rambuac trak saong metai hadei di nan. Công an pak ini brei thau lac, urang pametai menuac dalam bruk ni lac Nguyễn Thanh Tâm.

Tuyết laik kapal saong langik la-an yuh daok ngak kan kandah ka raidiuk di yaok rabau menuac di châu Âu dalam rilo harei ini mai. Di Thụy Điển, nhiệt độ trun tal tanut biar oh ka bhian mboh, lac - 43,6 độ, tuyết laik kapal meng 10 tal 20 cm. Di Đan Mạch, tuyết laik kapal labaih meteh mét, ini lac bruk oh ka bhian mboh di taneh ia ini kuhria meng thun 2011. Nhiệt độ trun - 20 độ C, ngak ka jalan mbak di rilo labik oh nao mai hu. Dom Cty bảo hiểm taduan hu jaik 2.000 mbang ieu daong samar drah dalam sa jala mesup. Langik la-an jeng ngak kan kandah tal Phần Lan tuk nhiệt độ kuhria rah tapa lac - 15 độ. Langik kan kandah jeng ngak srau kadau tal bruk nao mai saong rilo mbang par njauk klaak kayua oh par tagok hu 

Cảnh sát Nam Phi hu cap khik labaih 50.000 kol duas dalam “danak dak Shanela" hu peih ngak pataom gauk pagui mek kol duas dalam taneh ia di tuk Noel thun 2023 saong thun bahrau 2024. Gah cảnh sát hu pataom prein tame pasang iek dom labik pandiak lac abih tih dom pabah mblang kapar ahaok tame negar, dom jalan piah pacang caga dom bala saong kol tội phạm. Cảnh sát Nam Phi khan lac daok brei khik ramik saong meda brei patagok dom bruk ngak dalam Danak dak Shanela hadei di mbang padeih lễ.

Urang ngak nong di negar Đức ba gauk pacang jalan meng radaih katung dui saong radaih pajeng pandap tuk urang peih bruk trun jalan dui atah sa adit piah cagar veik bruk kuhria klaak trun yaom kak je menyek diesel. Rilo radaih tuan talei akhar haroh lac "Oh hu urang nong, oh hu pandap mbang, oh hu harei hadei". Bruk kuhria klaak trun yaom kak je menyek diesel, oh kak je ô tô ngan saong radaih ngak nong lac bruk daok kuhria ngak di Rajaei Đức piah pabak veik pok jien kurang 17 tỷ Euro dalam kadung jien karja yaok thun di taneh ia ini./.