Thun ini, Cảnh sát tasik Việt Nam brei padang Sở Chỉ huy tiền phương ngak bruk pacang cakak taong chap ikan tasik suan hukum oh khan brei thau saong oh tui sarak IUU. Jabat ngak bruk padang di ban Phú Quốc, tỉnh Kiên Giang. Dalam thun 2023, dom gah di  Cảnh sát tasik hu pasang iek, duah mboh saong chap khik, langyah 6 bruk ngan haong 7 gilai taong ikan suan hukum IUU. Dalam nan, hu sa gilai ikan ba tuai 64 jamraih pasang iek kayua dom gilai ikan karei payua.

Akaok UBND tỉnh Bình Thuận bahrau mbaoh tangin tame harak payua ka dom jabat dalam tinh ka bruk patui veik paglaong siam lagaih di bruk pacang caga tham nhũng, dom bruk kanjak jhak. Dahlau di nan, Thanh tra Rajaei brei thau điem taong yaom bruk pacang caga tham nhũng thun 2022 saong tỉnh Bình Thuận mek hu 61.31/100 điểm, tagok 1.41 điểm min trun 10 tanut dut saong thun 2021. Kayua yau nan ye, akaok UBND tỉnh ieu kakei dom jabat, bhum palei samar drah eng drei pasang iek dom asal kadha di Paok asal kadha piah ba tabiak dom jalan ngak pasiam veik dom bruk daok takik, daok kurang. Abih di nyu nan lac, dom asak kadha oh mek hu tanut điểm atau điểm bier jang dalam bruk chấm điểm pacang caga tham nhũng thun 2022 bahrau hu brei thau.

Meng phun jien jak ba hu, dalam thun blaoh, tỉnh Sóc Trăng hu daong padang ngak 1.710 baoh sang jum pataom ka baoh sang kathaot, kuhria tui jien labaih 100 tỷ đồng. Kuhria ta-eng Mentri Công an hu jak ba saong daong 1.200 baoh sang, yaok baoh sang yaom 63 trieu dong. Tal urak ini, dom baoh sang hu jao blaoh ka urang kathaot, urang kan kathaot oh hu sang daok dalam tỉnh. Meng hu bruk nan daong ka mikva hu sang daok tani tanat, sahanang hatai ngak mbang, pala drak, paglong raidiuk, kham yam tapa truh kathaot.

Sở Ngak nong saong patagok palei pala tỉnh An Giang pambuak haong UBND huyện Chợ Mới saong Công ty TNHH Thương mại dịch vụ pablei salih tame tabiak negar Vina T&T bahrau pablei tabiak lô pa-aok tượng kalik hijao camriep di An Giang tapa darak pasa Australia saong Hoa Kỳ. Ong Đoàn Thanh Lộc, Phó akaok UBND huyện Chợ Mới brei thau, ini lac bruk ngak camriep hu kein lagaih biak praong ngan haong gah ngak nong pak ini, oh lac ba kein lagaih kinh te praong bo daok daong jhul khang thaot binguk, angan je di kaya nong An Giang di mangaok darak pasa dunya.

Tui kuhria mboh, yaok thun Viet Nam hu labaih 26.000 urang ruak ung thu phoi,  njauk caik hatai lac hu 23.000 urang metai yaok thun tuk njauk ruak nan. Di Viện Ung bướu saong y học hạt nhân – sang iek ruak Quân y 175 hu tal meteh  dom urang ruak ung thư daok taong ruak ung thư phổi. Rilo urang ruak ung thư phổi di tukvak puac. Dom urang metai kayua ung thư phoi ralo kayua jaik abih dom urang nan mboh ruak tuvak puac.

Jabat An ninh mạng negar Thái Lan hu ieu kakei dom sang bac đại học negar ini pato 10.000 urang ngak an ninh mạng piah ngak bruk ka dom jabat rajaei. Dom urang hu mbaok tame meda oh njauk patakik kayua umo thun jang yau oh iek lap urang likei atau kumei. Min, dom urang di kapul caga nao lin oh tapa umo labaih 35 thun. Urang jakar Thái Lan ndem lac, Thái Lan njauk pasiam veik bruk an ninh mạng piah pacang caga dom kol tin tặc.

Kinh te negar Đức tui kuhria mboh dahlau meda tagok suai veik dalam thun ini. Tui harak pathau khan birau di Pasak Roh duah Kinh te saong Pablei salih, Đức meda laik trun labik kinh te praong dang dhi ka 4 kuhria tui jien USD, caik labik nan veik ka Ấn Độ di thun 2027. Bruk Đức trun labik dang biar jang  dalam dom angan kinh te praong di dunya lac kayua taneh ia ini pambak tame năng lượng di Nga piah jhul patagok bruk ngak tabiak pandap panda dalam taneh ia.

Kanja tỉnh Vendée di France hu mboh sruh jit cum manuk adat hu jru mek glaong di yaok rabau drei ada di var raong ada. Abih tih dom drei ada ini hu klauk vaccine pacang caga ruak tui panuac ieu kakei di Rajaei France thun blaoh. Jit cum manuk ada ngak klaih klaoh gah pabak ralaow saong baoh manuk ada, jhul yaom ralaow patagok di dom labik di dunya, kayua yau nan ye bilan 10/2023 France hu peih danak dak klauk jru vaccine pacang caga cum manuk ada di rilo labik ngan haong ada, lac janih athur mbuan njauk ruak abih kayua virus.