Brei panuac di mbang nyaom ka bruk kinh tế - xã hội quý I; bruk ngak, jalan langyah praong dalam quý II thun 2024 ini hu peih tabiak di harei 2/4, Akaok UBND TP.HCM Phan Văn Mãi taong yaom lac, maong rah tapa, bruk kinh tế - xã hội di quí I mboh hu siam. Min, bruk patagok di gah brei masaiy jien, bruk gah jien laba tal bruk pasiam veik saong patagok lac ka oh  glaong; dom doanh nghiệp tabiak truh darak pasa glaong dut saong tukvak ini thun blaoh, dom bruk daok kandaong veik, abih di nyu nan lac dom danak dak taneh riya, sang danaok, darak pasa taneh riya, sang danaok ka oh siam veik. Tui ong Phan Văn Mãi, dom bruk yau nan brei mboh, prein yava di kinh te Việt Nam saong kinh te di ban raya siam veik oh ka khang.

Mban Trị sự Giáo hội Phật giáo Việt Nam tỉnh Sóc Trăng hu taduan paha Ante Kosêy Sirêy Labach lac labik di Giáo hội Phật giáo Việt Nam daok dalam bruk khik ramik di mBan Trị sự Giáo hội Phật giáo Việt Nam tỉnh Sóc Trăng. Paha Ante Kosêy Sirêy Labach padang ngak tui ilamu Khmer, daok dalam labik praong 3.000m. Paha hu: labik kakuh praong di mbaok gah anak, sala, tăng xá…lac labik caik ka ong bhik saong dom phật tử dalam palei hu mbuan lagaih dalam bruk ngak adat di ugama saong dom rija, roya di urang Khmer.

Di dalam phường Long Hưng, quận Ô Môn, ban Cần Thơ bahrau rahtabiak bala glut jaleih taneh atah labaih 25m, ngak kan kandah tal jalan mbak nao mai dalam palei. Mbang glut jaleih taneh oh hu urang halei njauk hagait min ngak kan kandah tal jalan mbak nao mai, mbuan cakak bruk nao mai di rahra. Dom thun jaik di ini, bruk glut jaleih di Cần Thơ rahtabiak srau kadau, kan kandah, rilo labik kraong hu dom labik glut jaleih biak khang, ngak jaleih sang danaok, jalan mbak nao mai di palei.

Kapul ngak bruk di UB Kiểm tra Trung ương hu ngak bruk haong Tỉnh ủy Đồng Nai ka bruk amuk Nguyễn Thị Giang Hương, akaok UBND huyện Nhơn Trạch njauk lah pachot lahik labaih 171 tỷ đồng dalam tài khoản… Tuk camereip gah công an mboh lac, kol pachot nyu pandar công nghệ glaong saong mek angan lac menuac di jabat khik caga adat hukum. Hadei di nan, kol nyu ndom lac amuk Hương hu pambuak tal bruk ngak suan adat hukum. Kol pachot nyu ieu  amuk Hương peih tài khoản piah payua jien blaoh samar tame dalam tài khoản di amuk Hương piah mek jien. Hu thau, amuk Hương njauk kol pachot nyu mek labaih 171 tỷ đồng.

Meng akaok thun tal urak ini, gah CS jalan mbak dom pakat pak tỉnh Tiền Giang hu duah mboh, langyah labaih 5.400 urang peih radaih tuk manyum alak mbia, pandar jru phin, cap khik labaih 5.400 sruh radaih saong phat jien labaih 26 tỷ đồng. Dalam nan hu 28 urang lac urang jakar công chức, viên chức, urang ngak bruk njauk taong phat kayua manyum alak mbia tuk peih radaih di mangaok jalan mbak. Tukvak anak tal, gah CSGT daok ngak catang dom adat hukum, peih ngak siam lagaih jang bruk khik kajap siam makre dalam rahra, salamat jalan mbak. Abih di nyu nan lac, gah CSGT khang hatai ngan haong jalan ngak lac “oh ngoại lệ, oh hu bhum pakauk” ngan haong dom urang ngak suan.

Dalam bruk pambuak gauk ngak camereip abih gah adat hukum di cảnh sát Trung Quốc saong Myanmar, abih tih 807 kol pambuak tal bruk pachot angaok viễn thông tapa dom negar njauk cap mek. Dalam nan hu 352 urang Trung Quốc. Công an Trung Quốc khan lac brei khik dom bruk cap mek kol pachot angaok viễn thông, patagok bruk pambuak gauk ngak bruk tapa negar haong dom taneh ia saong bhum taneh pambuak tal, peih ngak rilo bruk cap mek haong gauk, jeng yau khang hatai khik caga bruk salamat saong kein laba njauk adat hukum di bol bhap rahra.

Tổng thống Nga Vladimir Putin brei thau lac, dom jabat an ninh di Nga khang hatai duah mek menuac dang akaok bruk khủng bố sang daoh Crocus City bahrau ini ngak ka takik di nyu 144 urang metai, labaih 550 urang karei njauk rambuac. Brei panuac di mbang nyaom haong dom urang pan akaok Mintri Nội vụ Nga, Tổng thống Putin ndem lac: “Bruk praong di kol drei lac duah thau taong abih dom talei pambuak gauk di dom kol pan akaok hu kein laba meng bruk ngak biak kanjah jhak ini. Oh daok medil hagait veik tra, kol drei meda cap mek hu kol nyu”.

Takik di abih 29 urang matai saong jaik 10 urang njauk rambus dalam mbang khuah khang di sa labik chat tamia me-in sambai melam di pasak ban Istanbul, Thổ Nhĩ Kỳ. Pui khuah tagok tuk urang daok ngak pasiam 2 tal mala abih di sa baoh sang chung cư glaong 16 tal. Gah chức năng daok duah thau piah ngak brei cambaih laih makna di bruk khuah saong hu cap mek takik abih lac 5 urang pambuak tal bruk nan./.