Dang kaok mbang nyaom biai haong dom mentri pambuak tal ka jalan parabha brei phun jien di karja pakat negar thun 2023 ka dom danak dak pacang, caga glut jaleih taneh takai kraong, takai tasik di bhum Taneran kraong Cuu Long peih ngak di melam 5 bilan 10, Pho thu tuong Lê Minh Khái caong khin Mentri Ke hoach saong Dau tu, Mentri Ngak nong saong patagok palei pala pambuak haong dom mentri, jabat  hu pambuak tal samar ngak brei salah jalan daong, phun jien  daong cambaic laic ka dom danak dak, peih ngak ginup bruk tacei ba di Thu tuong Rajaei. Bruk parabha brei phun jien sumu tukvak, siam lagaih, pataom tame, hu makna praong dalam, oh caik rah tabiak bruk khat lahik, palai pajua.

Di tỉnh Bến Tre daok peih tabiak rilo bruk ngak Harei pataom salih bahrau sahneng duah bahrau tỉnh Bến Tre thun 2023 ngan haong kadha “sahneng duah bahrau meng hatai – yam tal tasik praong”. Tapa bruk ini, tỉnh Bến Tre caong hu ndem mayai nao mai, klah raba dom ilamo cambaih laih, bac magru dom ilamo siam gheih piah ngak salah dom sarak, jalan ngak dui pachreih, daong ba saong jhul tagok bruk padang mbang ngui duah jalan ngak bahrau di tỉnh, rik tame bruk cak rok patagok di taneh ia. Tapa dom danak dak hu peih ngak di Harei pataom, tỉnh Bến Tre yaih khan ka hệ sinh thái peih bruk padang mbang ngui salih bahrau bak prein khang di tỉnh dalam dom bruk ngak biak chreih chrai di dalam taneh ia. 

UB bhap bini tỉnh Kiên Giang brei padang kapol nyaom pasang iek taong yaom bruk peih ngak tui dom tacei pato di UB bhap bini chau Au ( EC) ka bruk brei thau dahlau taong phạt thẻ vàng. Ông Lê Quốc Anh - Pho Akok UBND tỉnh Kiên Giang khan lac: Kiên Giang  daok patui veik bruk brei sanya catang pacang caga taong chap kaya ia tasik suan hukum, oh khan brei thau, oh tui njauk bruk ba tabiak ( IUU), padang hu hatai jia saong kham merat  di tỉnh dalam bruk pacang taong chap kaya ia tasik IUU jeng yau  dalam bruk salih meng bruk taong chap ikan di bhap bini tapa chap mek ikan thau sahaneng ka bruk ngak di drei saong patagok khang kajap. Tỉnh Kiên Giang urak ini hu labaih 9.800 gilai ikan meng 6m tagok, dalam nan gilai ikan atah 15m tagok taong chap ikan labik tasik atah hu jaik 4.000 sruh.

Piah patakik bruk manyum alak mbia tuk peih radaih di mangaok jalan mbak, UBND ban Mỹ Tho, tỉnh Tiền Giang hu harak pakauk biak catang bruk manyum alak mbia tuk peih radaih di mangaok jalan mbak. Dalam nan ieu kakei urang jakar, công chức, viên chức saong urang ngak peih ngak biak catang adat, manyum alak mbia blaoh lac oh peih radaih di jalan mbak. Urang dang akaok dom kapul, dom bhum palei njauk taduan bruk ngak di drei mayah caik ka urang jakar, công chức, viên chức di jabat, labik ngak bruk di drei ngak suan dom bruk ini.

Bruk bala biak trak di tỉnh Đồng Nai kayua radaih tuai di Thành Bưởi ginuh tame radaih pajeng tuai 16 ghe di subuh page 30/9 di jalan roya 20 ngak brei 9 urang metai ngak haduh hatai rilo manuac sia. Tui Sở Jalan mbak pajeng ba Ban raya HCM, dalam 9 bilan tapa, radaih Thành Bưởi peih radaih samar suan tui tanut ba tabiak yaok ratuh mbang. Nan ye,  Sở Jalan mbak pajeng ba Ban raya HCM brei padang kapol nyaom pasang iek ralo bruk, dalam nan hu bruk khik brei salamat  angaok jalan mbak, bruk ngak mbang pablei salih di D.N Thành Bưởi. 

Dom urang kumei cảnh sát meda dang ngak dom bruk praong dalam khik kajap sron mbon saong peih bruk pilih ruah dalam mbang tổng tuyển cử anak tal di Indonesia. Ini lac panuac khan di ong Rahmat Bagja, Akaok Jabat pasang iek Tổng tuyển cử  Indonesia, tuk taneh ia ini daok caga bruk sron mbon ka mbang tổng tuyển cử di bilan 2 thun hadei. Urang kumei cảnh sát jeng meda hu mbaok tame dom bruk paglaong hatai sahaneng, pathau khan urang kumei ka bruk pilih ruah, jhul khang bruk hu mbaok tame di urang kumei dalam mbang pilih ruah. Gah cảnh sát Indonesia daok hu caik dalam  bruk sron mbon biak catang piah khik kajap sron mbon ka bruk pilih ruah anak tal.

Mentri Quoc phong Syri brei thau sa bruk taong tame meng kapal haok oh hu manuac peih  tame học viện bolin di tỉnh Homs, bhum kreh negar taneh ia ini di harei 5/10 ngak brei 100 bhap bini saong urang lin metai, 125 urang njauk rambuac. Mbang taong tame nan tuk học viện daok peih bruk ngak dat tamat bac. Dalam panuac khan di drei, Mentri Quoc phong Syria ndem lac dom nyaom “khủng bố” pandar kapal haok oh hu manuac peih hu ba tui phao patuh piah taong tame nan.

Quyen Thủ tướng Tây Ban Nha, ong Pedro Sanchez bahrau hu panuac ieu EU jum pataom ngan haong bruk urang tame nefar dalam tuk menuac tame negar daok tagok biak rilo dalam tukvak tapa. Gam tui di nan jeng brei thau lac, tame negar lac bruk di EU saong kapul ini njauk ba tabiak sa jalan langyah taong abih gah, lagaih, mayah oh hu bruk an sinh xã hội di dom taneh ia dalam kapul meda oh ndua naong hu anak dom bruk catang tagok di dom urang tame negar. Tui kuhria, dalam harei ini (6/10), nyaom biai Di kapul chính trị châu Âu jeng meda ginum biai ka bruk urang tame negar di nyaom ini./.