Page ni, di sang Quoc hoi, Akok negar Lương Cường, Akok Quoc hoi Trần Thanh Mẫn gam haong urang ngak praong Quoc hoi, dom urang lambaok Quoc hoi nao rivang labik Parang iek kadha “Nhat bao Quoc hoi haong Tổng tuyển cử mbang akaok meti (06/01/1946)”. Bruk Tong tuyen cu akok meti di Quoc hoi lac bruk sajarah praong, peih akaok la bruk dak padang karja dan chu birau di negar drei. Bruk ngak hu jak jeng di bruk Tổng tuyển cử lac bruk jum pataom, mesruh metak anh dũng, hy sinh di taong abih Bhap bini rahra Viet Nam saong rik tame oh lac sit di gah Harak mbao chi Cach mang dalam bruk pathau khan jak ba bhap bini, dalam nan hu blah mbao yaok harei di Quoc hoi. Yaom lac tok tabiak hu 15 taka saong ngak bruk dalam 21 harei, min harak mbaok harei di Quoc hoi hu rik tame biak praong ka bruk pathau khan  ka bruk Tong tuyen cu.

Tui So Ngak nong saong Patagok palei pala Ba Ria – Vung Tau, tukvak tapa dom jabat chuc nang pataom tame pasang iek kapul gilai ikan angaok tasik saong angaok ar, daong ka mikva nao gilai ngak salah harak bi-ar ka gilai ikan “3 oh” saong gilai ikan oh ka hu ginup harak adat brei pandar. Piah pasiam veik kakei dahlau thẻ kanyik di Uy mban Chau Au (EC), UB Bhap bini tinh Ba Ria - Vung Tau ieu dom tinh hu tasik, So Ngak nong saong Patagok palei pala samar drah pasang iek, brei thau bruk ngak suan, langyah samar drah, gam haong bruk gilai ikan lahik bruk pambuak ndom meyai ala di 10 harei. 

UB bhap bini huyen Ea Kar, tỉnh Đắk Lắk birau peih bruk Pakacah Urang ndoan dam dara dom bangsa takik di nyaom bangsa daok gaok rilo kan kandah duah thau hukum ka lakhah paga, tuk diuk tok pasang tuk oh ka tal umo thun saong tok gauk dalam but pajaih di bhum urang bangsa takik saong bhum ceik. Hu mbaok tame Nyaom pakacah hu 14 kapol, labaih 210 urang daoh tamia, urang pathau khan mai meng dom xã, ban sit di bhum urang bangsa takik saong bhum ceik. Kapol pakacah rik tame brei trun bruk takik lakhah tuk oh tal umo thun saong lakhah dalam  but pajaih, abih di nyu lac nyaom uranaih, dam dara lac urang bangsa takik di huyen.

Daong urang bangsa Xơ Đăng pala phun jru, dalam dom thun tapa karja dom huyen Đăk Glei, Kon Plông saong Tu Mơ Rông di tinh Kon Tum sangka, padang hu bein bam, sarak daong pajaih, phun jien, ilamo pala phun ka rahra. Taphia nan dom doanh nghiep hu angan jia ngak jru, pablei salih jru jeng ba tangin tame daong rahra. Amuk Hoàng Thị Thuỳ Dung, Phaok Yam ndok Pasak yit vu ngak nong huyen Tu Mơ Rông brei thau: Haong asal kadha lac urang jakar haong rahra ba gauk ngak pala phun jru, hu bruk salih karei dalam bruk pandar  khoa hoc ky thuat tame bruk pala phun jru di mikva.

Dom harei jiak ini, di tỉnh Tiền Giang gam gam rah tabiak hajan praong suai atah ngak jhak tal bruk pala drak. Abih di nyu lac bruk pala bingu Tet daok gaok kan kandah, birau tame pala ye njauk khut khat. Urang  pala bingu gam lahik jien njuk tathuak ia gam abih jien blei jru caga ruak ka phun bingu. Oh lac bingu Tet khut lahik bo bein phun mbang baoh, njam patam di tỉnh Tiền Giang jeng dauk hadei langik hajan. Tui kuhria mboh di jabat gah langik tasik, dalam dom harei puac bilan 10 ini, hajan ribuk daok rah tabiak sraw kadau, yau nan ye urang ngak nong njuak brei hu jalan pacang caga, palik khat lahik kayua bala meng langik tasik.

Trung Quốc ngak tabiak hu “kiak Ia Bulan” brei mboh veik piah ngak iek angaok langik, piah pamong tal bruk  pandar pandap panda di labik dalam bruk padang balai angaok Ia Bulan. Dom baoh “kiak Ia Bulan” akaok meti hu dom urang roh duah Trung Quốc patagok jak jeng meng sa pandap panda hu dom janih yau nan. Dom baoh kiak ini khang kajap tagok 3 mbang dut haong dom baoh kiak bhian, samu yaok cm2 taneh meda pandon trak hu labaih 1 tấn. Balai roh duah Ia Bulan dunya kayua Trung Quoc ba tabiak jalan ngak hu padang ngak dalam thun 2028 – 2035.

Yawa langik di ban ine New Delhi, Ấn Độ harei kabroi mboh trun biak jhak. Gam haong nan, rilo bhum taneh di New Delhi  hu taginum jhuk me-om pacang kapal, kan mong mboh. Dom urang jakar  Ấn Độ hu kakei ka dom bruk jhak meda rah tabiak ka prein yawa bhap bini, abih di nyu lac dom urang njom ruak jalan suan yawa. Bruk njom nerak hu kuhria mboh lac glong dalam 6 harei anak tal. Bhap bini hu kakei brei plaik njiak dom bruk ngak dhur mur saong juai cuh hareik langiu langik.

Tui panuac ndom di Bol lin pan phao kraong di Patao Maroc, bol lin tasik negar ini daong hu 38 urang salih labik daok jaik Sahara langiu di tasik Đại Tây Dương dalam harei kabroi. Panuac ndom brei thau, sruh gilai pajeng 38 urang salih labik daok min gaok bol lin tasik pacang cakak gilac hu brei mboh lac daok nao tal kapul kaoh pulao  Canary, sa kapul kaoh pulao di Tây Ban Nha, langiu di tasik pai barak Chau Phi, tapa jalan tasik kan kandah piah nao tal chau Au./.