Danak dak ba tabiak bruk padang ngak 1 trieu ha taneh ngak padai asar siam saong takik ngak nerak gam peih bruk pala drak tui chuoi gia tri hu peih ngak di 12 tỉnh, ban bhum taneran kraong Cuu Long (langiu Bến Tre). Vaktu 2024 -2025, Danak dak pataom tame  pakajap 180 ribau ha padai meng Danak. Mbiah tal thun 2030, taneh ngak padai asar siam saong takik ngak nerak hu 1 trieu ha; taong abih taneh brei ngak tui takik abih di nyu lac sa quy trình pala drak khang kajap.

Tal abih bilan 11, bruk peih jien ka đầu tư công di TP. Hồ Chí Minh hu labaih 45%. Yaom lac daok biar jang duk haong bruk ba tabiak, min mboh siam lagaih di labik lac hu labaih 30.000 tỷ đồng đầu tư công hu ban peih brei jien, glaong jang 2 mbang duk haong tukvak ini thun blaoh, dalam nan hu rilo quận, huyện hu ngak salah bruk. Patui jalan jhul patagok bruk peih jien đầu tư công meng ini tal jhung thun, karja ban raya Hồ Chí Minh daok peih bruk pakacah "60 harei melam" piah jhuk samar bruk ngak, pasiam parilo jang bruk peih brei jien. 

Ban Cần Thơ birau peih Bruk pok meyaom 100 urang yau kareih camin naih gheih hu rilo bruk ngak rik tame  dak padang saong patagok ban Cần Thơ, vaktu 2004 - 2024. Ini lac dom urang yau kareih camin hadah, lac urang hu rik daong ralo ka bruk jak ba  gauk pakacah di ban dak harei dak hu tame dalam, siam lagaih. Di nyaom biai, Bí thu Thành ủy Cần Thơ Nguyễn Văn Hiếu caong khin dom urang naih gheih hu meyaom nan brei patui bruk kham merat, lao dong ngak tabiak pandap pandar, kham merat, oh padeih yam tagaok, ngak hu rilo bruk jak jeng siam mekre jang, daong hu rilo bruk ka ban, njauk saong angan lac kareih camin ka urang pasang tame, ngak tui.

Dalam thun ini, urang hu angan je di tỉnh Sóc Trăng hu jak ba, rik daong jien padai labaih 28 tỷ đồng padang ngak palei pala bahrau saong bruk an sinh xã hội, pato megru…di puk palei. Meng hu yau nan bo sang ilamu bhap bini, dom jalan palei, jalan ia thủy lợi hu ngak brei mbaok meta palei pala salih bahrau, bhap bini nao mai hu mbuan lagaih, pandap panda hu pajeng ba, pablei salih siam, raidiuk di bhap bini hu glaong tagok. 

Tỉnh Trà Vinh urak hu 239 pandap mek hu angan OCOP. Piah patui bruk paglong asar siam, ba mbuan lagaih ka dom pandap đặc thù di bhum palei, tỉnh Trà Vinh brei daong phun jien piah ka dom đơn vị paglong asar siam. Tui  nan, daong 50% phun jien blei mac jamraih saong pandap panda, ngak tabiak pandap ka dom labik ngak bruk dalam palei pala hu pandap OCOP. Meng dom sarak ini, dom pandap OCOP dak harei dak brei mboh di darak pasar, dalam nan hu rilo pandap hu pablei tapa Mỹ, Nhật Bản, Anh…Tapa nan, daong  dauh bruk ngak, paglong jien mek tame  ka bhap bini palei  pala.

Di harei negar pacang caga pablei salih menuac mbang ka 17 peih tabiak di ban ine Phnom Penh, hu mbaok di 3.000 menuac, Phó Thủ tướng Sar Sokha, Akaok UB negar ka pacang caga pablei salih menuac di Campuchia hu panuac ieu dom gah chức năng Campuchia patagok bruk pambuak gauk haong dom taneh ia piah pakhang bruk mesruh pacang cakak kol duas biak jhak ini. Bhap bini njauk paglaong hatai sangka, ba gauk tame pacang caga bruk pablei salih menuac. Gam haong nan, hu sanya patui jalan khik caga, daong ka urang gaok bala di bruk pablei salih menuac. 

Cảnh sát Thái Lan chap mek 50 trieu asar matuy tong hop jaik di labik taphia negar Myanmar. Ini lac matuy tong hop praong abih bhian hu chap khik di taneh ia ini meng dahlau mai mbiah tal ini. Matuy nan hu caik dalam rilo kadung bao tải praong, padauk di radaih tải saong njauk cảnh sát chap khik tuk pajeng ba angaok jalan.  Ini lac mbang chap khik matuy ralo mbang ka 2 châu Á chap hu, dang hadei mbang chap mek 55 trieu asar matuy di tỉnh Bokeo di Lào  thun  2021.

Cty pabak bruk viễn thông praong abih Ukraine, Kyivstar, jeng sa labik njauk bala di sa bruk taong tame mạng praong ngak ka yaok triệu urang pandar oh tame hu saong oh pandar hu dom dịch vụ di động saong internet. Kol hacker Killnet di Nga taduan lac drei ngak bruk nan, min kol ini oh ba tabiak sa kadha halei brei mboh cambaih ka bruk ngak di drei./.