Tui Mintri Lao động - Thương binh saong Xã hội (LĐTB-XH), 2 bilan akaok thun ini hu 23 ribau 200 urang ngak negar Việt Nam tabiak negar langiu ngak bruk. Nhật Bản daok lac darak pasa ka 1 tuk taduan raok labaih 17 ribau urang ngak. Tui kuhria thun ini, ba meng 125.000 urang ngak negar Việt Nam nao ngak bruk di negar langiu tui harak pambuak bruk. Dalam taneh ia hu labaih 500 doanh nghiệp jit vu hu harak adat brei ba urang ngak nao ngak bruk di negar langiu tal labaih 40 taneh ia saong bhum taneh. Kuhria rah tapa, yaok thun hu 120.000 - 143.000 urang nao negar langiu ngak bruk.

Mintri ngak nong saong patagok palei pala bahrau hu panuac ieu akaok UBND dom tỉnh, ban patagok tacei pato, pasang iek, pachreih ba, peih ngak dom jalan pacang caga ruak gila dalam tỉnh ban di drei. Gam haong nan, ba tabiak jalan padang ngak bhum salamat jit ruak gila di athur. Langiu di nan, dom tinh ban brei pasang iek, ramik veik dom danak dak, jalan ngak pacang caga ruak gila piah khik ka nyu lagaih. Dalam nan, brei parabha ka nyu ginup menuac piah  ngak hu siam dom jalan pacang caga ruak gila di puk palei, tinh ban. 

Dalam tỉnh Ninh Thuận hu 152 pandap OCOP mek hu 3 patuk saong 30 pandap mek hu 4 patuk; hu 2 pandap hu prein khang tagok 5 patuk lac ia masin CaNa 32 saong 42 độ đạm. Tỉnh kham marat tal thun 2025, hu meng dua tal klau pandap hu  prein tagok 5 patuk pok likau Trung ương taong yaom, pok brei angan pakat negar. UBND tỉnh Ninh Thuận pato tacei dom bhum palei ba tabiak 15 nyaom bruk ngak saong hu jalan langyah piah dui pachreih, daong ka dom hợp tác xã, doanh nghiệp, labik ngak pandar ilamo kong nghe bahrau ba tame ngak piah paglaong chat luong, yaom glaong pandap OCOP…

Mban Thường vụ Tỉnh đoàn Đồng Tháp bahrau tabiak mbaok Bilan dam dara thun 2024 ngan saong kadha “Dam dara Đồng Tháp ba akaok nao dahlau, halan hatian ka raidiuk bhap bini”. Bilan dam dara thun ini, dom pakat Đoàn, Hội dalam tỉnh Đồng Tháp pataom tame ngak 14 bruk praong. Dalam nan, khik ramik, paglaong siam mekre ka takik di abih lac 600 bein pabam pajaih, pala bahrau takik di abih 600.000 phun hijao, phun mbang baoh. Hu takik di abih lac 6.000 hatai sahneng duah bahrau di urang đoàn, dam dara, daong 93 urang đoàn, dam dara patagok kinh tế; padang ngak 12 mbaik tatua nao mai di palei 

Tui kuhria mboh di Jabat tui iek bruk langik tasik, ia mbak njaom tame, pandiak bhang daok rahtabiak sarau kadau, tanut njom mbak 4 mangaok ribau meda njom tame atah di pabah kraong meng 45-65km; tabung glaong lac meng urak ini tal bilan 4 meda ngak kan kandah tal ia pandar, ia pala drak di rahra, doanh nghiep dalam bhum ĐBSCL. Kayua yau nan ye, kanja saong rahra dalam bhum oh brei eik lap, njauk hu jalan patui veik pacang ia mbak, khik ia taba, nao gam haong bruk pandar ia patak pataom, siam lagaih, kein laba piah yam tapa mbang njom ia mbak, trun manieng dom kan kandah saong dom khat lahik kayua bala meng langik tasik.

Hãng Thông tấn Trung ương Triều Tiên (KCNA) brei thau, Chủ tịch Quốc vụ Triều Tiên Kim Jong Un hu nao pasang iek bruk pasram tapak di sa căn cứ quân sự daok di gah Pai taneh ia. Brei panuac di pak ini, Chủ tịch Kim Jong Un ndom lac bol lin Triều Tiên brei patagok prein caga mesruh, lagaih haong bruk di urak ini.

Danak dak Pandap mbang Dunya (WFP) hu panuac brei thau, bruk mesuh gauk di Sudan, ngak brei yaok trieu manuac metai dahlau daih saong ba tal bruk  di cu praong abih, daok mbuan ba tal bruk eik lipa praong abih di dunya. WFP oh ginup pandap mbang piah daong samar drah ka dom rahra daok gaok bruk kurang pandap mbang pak Sudan, dom urang daok gar dalam bruk mesuh gauk kayua taong paoh saong bruk ba tangin tame di dom gah mesuh gauk.

Dom urang ilamu ndom lac, bruk glut jaleih saong ia tasik tagok glaong mada ngak ka labaih 1.300km2 taneh riya di Mỹ dauk dalam 3 pluh thun tal, ngak kan kandah tal raidiuk di 55.000 - 273.000 menuac saong yaok ratuh rabau drap ar. Nan ye dom urang ilamu kakei lac njauk patrun bruk duah mek ia njar, rami ramik veik dom bruk ngak kong saong patrun khí tathuak tabiak piah trun biar dom kan kandah di khí hậu hu suai lavik. Gam haong nan, brei padang veik đầm lầy saong glai dauk ia mbak jeng lac dom jalan ngak kein lagaih brei hu kuhria tal./.