Kapol Urang nong pakat negar Viet Nam birau peih nyaom ginum biai kuhria pataom iek veik taong abih bruk di Kapol saong bruk jak ba Urang nong thun 2023 kum pakacah ka 5 dom tỉnh Tay Nam Bo. Kum pakacah ka 5 Kapol urang ngak nong hu 11 tỉnh, ban lac: Cà Mau, Bến Tre, Trà Vinh, Đồng Tháp, Sóc Trăng, Kiên Giang, Hậu Giang, Bạc Liêu, An Giang, Cần Thơ, Vĩnh Long. Dalam thun tapa, Kapol urang nong dom pakat dalam kum brei caik hatai  tacei pato, jak ba urang hoi, urang ngak nong dak padang  dom bruk kinh te tui kapol nyaom, dhar kapol nyaom, to nyaom bruk ngak, hu rilo urang ngak nong naih gheih, bruk pala drak mek hu kein laba glong. Bruk jak ba  Urang ngak nong pakacah gauk ngak mbang pablei salih naih joi, jum pataom daong ba gauk ngak kaya meda saong trun kan kathaot khang kajap cakrok patagok veik.

Di mbang taom gaok, ndom biai nao mai di urang pan akaok tỉnh Bà Rịa - Vũng Tàu haong doanh nghiệp saong urang buh jien tame ngak mbang dalam tỉnh di harei 7/11, ong Nguyễn Văn Thọ, Chủ tịch UBND tỉnh Bà Rịa – Vũng Tàu brei thau: Tỉnh tuk halei jeng nao gam haong doanh nghiệp lang talaih kan kandah, ba mbuan lagaih di abih ka bruk ngak mbang, pablei salih piah dui pachreih urang buh jien tame ngak. Gam haong nan, hu khan lac, brei parabha pakat, parabha quyền ka dom Sở, ngành saong karja palei piah lang talaih dom tavak tavaiy, kan kandah di doanh nghiệp, di urang buh jien tame ngak mbang dalam tukvak samar darah di abih, caong khin taduan hu rilo panuac pato pahadar di dom doanh nghiệp.  

Jabat Bangsa pambuak saong Jabat Tư pháp huyen Tri Tôn, tỉnh An Giang daok peih bruk pathau khan, pambak praong bruk pato hukum “ Patrun patakik bruk lakhah tuk umo daok sit saong lakhak dalam but pajaih sa darah haong gauk  di bhum urang bangsa takik saong bhum ceik” brei ka mikva  lac urang bangsa Khmer. Tapa nan, mikva hu pang  dom asar kadha Hukum lakhah saong baoh sang, duah thau ka bruk lakhah tuk umo daok sit, tok gauk dalam but pajaih jaik; langiu di  nan, hu pabak ilamu saong bruk iek glang prein yawa  kumei tuk ndih tapui, ndih tapui anek tui hukum karja. 

Dalam 10 bilan tapa, dalam tỉnh Hậu Giang hu 149 mbang bala angaok jalan radaih, ngak brei 93 urang matai, 91 urang njauk rambus. Duk haong tukvak ini thun blaoh, dom bala angaok jalan radaih rilo jang 50 mbang saong dom menuac njauk rambus  rilo jang 73 urang. Piah dui patrun bala angaok jalan radaih, mBan An toàn giao thông tỉnh ieu Công an tỉnh patagok parilo mbang nao pasang iek, abih di nyu lac di dom jalan mbuan hu bala radaih ginuh gauk, samar langyah catang dom bruk ngak suan. Gam haong nan, brei rami ramik bruk urang pablei salih lih mek takai jalan.

Meng akaok thun tal ini, tỉnh Tiền Giang hu jaik 5.200 mbang urang ruak tangin, takai, cambuai saong lac tinh hu urang ruak dang dhi 5 dalam 20 tỉnh, ban gah Meraong. Anak bruk nan, gah y te dom bhum palei dalam tỉnh pakhang bruk  tacei pato, pachreih bhap bini brei ngak tui  dom jalan  piah pacang caga  jit ruak; tui iek  jit ruak di dom sang khik uranaih, sang bac mau giao dalam bhum, samar  duah thau urang ruak saong hu jalan pacang sumu.

Hội đồng Bảo an Liên Hợp Quốc sa mbang tra oh njauk gauk ka sa Sarak pambuak tal bruk mesruh gauk di Israel - Hamas. Kapul E-10, hu 10 taneh ia oh thường trực di Hội đồng Bảo an, dahlau di nan hu ngak sa sarak ieu "padeih cuh ngak pahla" piah ba pandap daong ngak pahla tame Gaza saong pacang cakak bruk menuac metai dak harei dak tagok rilo. Min Mỹ saong Anh, dom taneh ia thường trực hu quyền phủ quyết, tah klaak dự thảo ini. Hu thau, hu takik di abih lac 10.000 menuac di bhum taneh ini metai lahik kuhria meng di tuk patuh tabiak bruk mesruh gauk di Israel – Hamas.

Dom urang jakar lien bang Mỹ daok peih praong duah thau bruk mbuan njom nerak meng chì dalam pandap mbang. Puac adit blaoh, 7 uang daok di 5 bang  mboh prein yawa oh karo hadei tuk mbang dom baoh kayau chrai klik dreih yau njauk jru mek kayua chì. Jabat Khik iek Pandap mbang saong Jru  tavao ( FDA) khan brei urang pandar meyah mbang gaok dom pandap njom chì meda ba tal “njauk jru mek chip”. Njauk jru mek chì dalam tukvak katut panak meda ba tal dom ruak yau pandik akok, pandik tian, glaoh ta-ok saong kurang darah.

Dom urang dalam sruh Thần Châu -16 di Trung Quốc bahrau ngak iek bruk pala njam angaok bilai vũ trụ Thiên Cung haong dua pandap ngak karei ka bruk pala ini. Dalam mbang camereip pala rau diếp di bilan 6 saong mbang pala patui di nan di bilan 8 pala traong ndaiy, lasun hala haong dom janih phun karei. Bahrau ini,  4 mẻ rau diếp “langiu vũ trụ” hu paik mek. Bruk pala njam angaok quỹ đạo jak jeng piah taong yaom ilamu pala drak dalam không gian, meng nan ba tabiak jalan ka dom roh duah praong dalam jang bruk langik tasik di anak tal./.