Meng harei ini (1/4) tal harei 30/4, Tổng cục yaok pataom (Mintri Kế hoạch saong Đầu tư) peih bruk pataom mek khau tin bruk pasang iek duah thau rahra saong sang danaok di kreih mbang di 63 tinh, ban di Trung ương. Pasang iek duah thau rahra saong sang danaok di kreih thun 2024 meda pataom mek khau tin ka 7 asal kadha praong lac khau tin ka dom urang dalam sang; Khau tin ka bruk di cu; Khau tin ka pato magru; khau tin ka bruk tok gauk; khau tin ka sajarah manek di urang kumei meng umo 10 – 49 thun; Khau tin ka manuac lahik di dalam sang; Khau tin ka sang daok saong bruk diukrai di sang. Bruk pasang iek duah thau nan hu khan brei thau di bilan 11-12/2024.

TP.HCM bahrau hu UNESCO pok brei angan lac thành viên kapul nyaom ban bac megru dunya. Yau nan, TP.HCM lac sa dalam 2 ban di Việt Nam hu UNESCO pok brei angan ini dalam abih  64 ban di 35 taneh ia. Tapa ini brei mboh bruk iek prong di dunya ngan saong dom sarak, dom sanya, dom kham merat di Việt Nam jeng yau di TP.HCM dalam bruk khik kajap pato megru siam, samu gauk, abih gah, jhul patagok bruk bac megru luac rai ka taong abih menuac sia.

Sở Ngak nong saong patagok palei pala tỉnh Bình Thuận bahrau peih bruk palao labaih 60.000 drei ikan pajaih ia taba dom janih trun binek Sông Lũy, huyện Bắc Bình piah parilo veik janih ikan dalam binek. Kapul hadang Bình Thuận jeng peih bruk palao 600.000 drei hadang sú,ikan tasik, bau hương di bhum tasik pak Labik khik ramik tasik Hòn Cau, huyện Tuy Phong. Bruk ngak ini jeng piah patagok bruk pathau khan, paglaong hatai sahaneng ka urang jakar, công chức, urang dalam kapul saong rahra dalam bruk khik ramik saong cak rok patagok kaya tasik.

Di tỉnh Hậu Giang, dom po bein pala phun ma-mbat daok bui sambai kayua dom harei tapa yaom baoh ma-mbat tagok jang 2 mbang duk haong tukvak ini thun blaoh. Urak ini urang blei salih tame tal bein blei baoh ma-mbat janih 1 yaom 32.000- 33.000 đồng/kg. Hu thau, yaom phun di yaok kilo baoh ma-mbat lac 10.000 đồng, nan ye tui yaom pablei yau ini, saong yaok  công bhian paik hu meng 2,5-3 tấn baoh ma-mbat, po bein laba hu meng 30 triệu đồng tagok.

Dom mbang ia mbak njaom tame tagok glaong di bhum gah maraong negar tui kuhria rahtabiak di dalam bilan 4-5/2024. Độ mbak glaong abih di dom bilai bhian rahtabiak di tanut glaong jang độ mbak glaong abih dalam bilan 4/2023. Tanut mbang dalam di ia mbak lac 4‰ dalam tukvak ini tui kuhria lac: Bruk njom ia mbak di dom kraong Vàm Cỏ Đông, Vàm Cỏ Tây lac 75-90km; kraong Cửa Tiểu, Cửa Đại lac 50-62km; kraong Hàm Luông lac 60-65km... Anak bruk nan, dom bhum palei njauk caga jalan khik piah ia taba tuk ia tagok bier pabak ka bruk ngak mbang pala drak saong raidiuk, gam tui di nan jeng patakik pruh ia piah trun manieng khat lahik ka bruk ngak, pala drak.

Dalam harei lễ Phục sinh di urang Cơ đốc giáo,  Giáo hoàng Francis hu panuac ieu dunya pacang mesruh metak. Giáo hoàng payua panuac tadhau ayuh tal dom urang tui agama Thiên chúa di mblang bein Thánh Peter di Vatican hadei di tuk dang ngak Thánh lễ Phục sinh. Ong jeng hu panuac ieu dom urang dang akaok di dunya, oh padeih kham merat pacang cakak bruk pablei salih menuac. Lễ Phục sinh lac sa dalam dom harei lễ praong abih dalam thun di dom urang Cơ đốc giáo. Lễ Phục sinh bhian rah tabiak di harei adit  puac bilan 3 akaok bilan 4 piah hadar veik bruk chúa Jesus diuk veik hadei di tuk njauk peng paku di mangaok mbaik Thánh giá.

Hu dua urang metai saong 22 urang njauk rambuac hadei di tuk sa sruh radaih jeepney ginuh tame phun kayau tapen jalan pak tỉnh Batangas, gah barak ban ine Manila, Philippines. Radaih Jeepney pajeng tuai lac janih radaih bhian randap abih di Philippines. Tui kuhria mboh di rajaei negar ini, urak ini hu labaih 160.000 radaih jeepney nduac di dalam taneh ia.

Gah y tế Thái Lan daok caga peih sa pasak ngak bruk samar drah (EOC) piah pasang iek bruk COVID-19 di sang guk tỉnh Prachuap Khiri Khan – labik daok hu bruk njaom mbak. Urak ini sang guk ini hu 79 urang njauk COVID-19. Anak bruk tamuh khang jit COVID-19 di sang guk, dom gah pambuak tal daok caga padang pasak ngak bruk samar drah EOC piah pasang iek jit ruak saong pacang cakak bruk njaom mbak di virus. Meng harei 17 - 23/3, dalam taneh ia Thái Lan hu 630 urang bahrau njauk COVID-19, dalam nan hu 5 urang matai./.