Tui harak pathau khan, kinh te Bhum taneran Kraong Cuu Long siam veik khang kadang dalam thun 2022 min suai damuai veik dalam thun 2023. Njauk caik hatai bruk lahik bruk ngak, kurang bruk ngak di Bhum taneran Kraong Cuu Long glong abih dalam negar, nan ye jien mek tame kuhria tui yaok urang di Bhum taneran kraong Cuu Long  tuk halei jeng biar jang dalam negar. Harak pathau khan  jeng hu tacei tabiak, sa bhum taneh hu rilo prein khang yau Bhum taneran kraong Cuu Long min daok kadun likuh dut saong bruk patagok kinh te di taneh ia. Hu thau, dua pluh thun dahlau, Bhum taneran kraong Cuu Long hu rik tame labaih 16% GDP di taneh ia  ye urak ini, bruk nan tok daok 12%.  

Di Nyaom biai peih bruk pablei salih, peih praong darak pasa blei tame, pablei tabiak bhum Đông Nam bộ ngan haong kadha “Pambak tame kein lagaih – khang takai yam tagok bahrau” kayua Mintri Công thương pambuak haong UBND tỉnh Bình Dương peih tabiak brei mboh kim ngạch pablei tabiak, blei tame pandap panda di dom bhum palei dalam bhum Đông Nam bộ mek hu labaih 200 tỷ USD. Yaom lac tagok ka oh glaong dut saong dom thun dahlau min bruk pablei tabiak praong hu daong khik kajap labik dang di bhum dalam bruki ba jalan dalam bruk pablei tabiak pandap panda di Bhum. Tal urak ini, pandap panda dalam bhum hu mbaok di jaik 200 taneh ia saong bhum taneh.

Tỉnh ủy Trà Vinh birau peih bruk jao brei giải thưởng ka 15 anek saih mek hu giải glong dalam “ Mbang pakacah Bí thu chi bo naih joi pakat tỉnh thun 2023”. Tui Phó Bí thư Thường trực Tỉnh ủy Trà Vinh Kim Ngọc Thái, nyaom pakacah lac mbang ngak bruk chinh tri hu makna biak praong dalam urang jakar, đảng viên di taong abih đảng bộ. Nyaom pakacah  ini piah pabak, paglong  ilamu, ky nang, bruk ngak nong saong bruk khik iek bruk ngak, langyah dom bruk rah tabiak  jeng lac piah Mban thường vụ Tỉnh ủy saong pakat ủy  dom pakat taong yaom kapol cơ sở Đảng saong dom urang jakar pakat ủy, abih di nyu lac bi thu chi bo saong caga urang jakar piah ngak bruk dalam tukvak anak tal.

Meng harei 15-12 tal 29-2-2024 Công an tỉnh Đồng Nai meda peih mbang tabung glaong pataom tame pagui mek kol toi pham, khik kajap siam makre  sron mbon di tuk dahlau, dalam saong hadei di Tết Nguyên đán. Dalam nan, pataom prein, radaih saong dom ilamu ngak bruk piah pagui mek kol toi pham, kol brei masaiy mek laba glaong, kol toi pham jalan mbak, co blah drap ar,  pajeng ba, pablei salih ma túy… meng nan pasang iek, patakik veik, oh caik tamuh tabiak bahrau tội phạm hình sự saong tệ nạn xã hội. Công an tỉnh Đồng Nai jeng pataom prein tame pasang iek, duah thau dom duas trak, pasang iek langyah tui hukum dom bruk ngak suan adat peih radaih di jalan mbak, pacang khuah padam khuah, cuh phao bingu suan adat hukum.

Festival Hadang Cà Mau saong Nyaom biai Pambuak pandap OCOP ĐBSCL 2023" hu tamat blaoh di melam kabroi 13/12. Ini lac kadha praong saong hu peih ngak rilo bruk ilamu nghe thuat, kinh te, dulich…chreih chrai, ba mai ka bhap bini rilo bui sambai, thau tal rilo jang ka anek manuac jeng yau bhum taneh Mũi Cà Mau. Gam haong nan, Festival Hadang Cà Mau piah pok meyaom dom urang raong hadang; dom urang rik daong ba pandap di tỉnh gah Meraong negar  nao tal dom taneh ia angaok dunya. Ini lac panuac  thau dhar phol ngan haong urang blei pandar kayua jia tame asar siam di hadang Cà Mau.

Trung Quốc brei klaak bruk pakauk blei tame ngan haong klau gah ngak ralaow limo, ralaow pabo praong abih di Australia. Gah Australia brei thau, ini lac bruk bui sambai ka urang nong saong gah ngak  ralaow. Saong hu panuac lac, bruk siam makre veik talei pambuak gauk pablei salih ba kein lagaih biak praong ngan haong gah ngak nong, kayua Trung Quốc lac gah pambuak bruk pablei salih praong abih di Australia. Dahlau di nan, Trung Quốc  brei padeih bruk blei tame ralaow bhong meng 11 gah ngak tabiak di Australia meng thun 2020.

Tui harak pathau di Cục Dự trữ Liên bang Mỹ, gah urang padang ngak sarak dalam UB Darak pasar peih lien bang brei khik tamo jien laba mbang ka 3 patui veik. Gam haong bruk brei khik tamo jien laba, Cục Dự trữ Liên bang Mỹ hu brei cakak trun jien laba takik abih di nyu 3 mbang dalam thun 2024. Bruk nan yam tapa bruk caong khin dalam dom mbang khan brei thau di urang ngak praong di Mỹ dahlau di nan min takik jang dut saong  bruk kuhria mboh dahlau di doanh nghiep ngan haong 4 mbang cakak trun. Tui kuhria, mbang cakak trun akaok meti meda hu peih ngak di bilan 3 thun anak tal.

Ceik apui Marapi di Indonesia pruh rilo mbang thur mur glaong meng 500 tal 600 mét. Thaot binguk hu dom mạng xã hội pak nan ba tagok brei mboh lac, dom tal dhur mun thur mur par bak di mangaok tabung ceik di pulao Tây Sumatra. Adit dahlau,  ceik apui ini jeng pruh rilo mbang thur mur praong ngak ka 23 urang metai. Indonesia, bhian hu ieu lac “Vành đai apui” di Thái Bình Dương, hu labaih 100 baoh ceik apui daok ngak bruk khang./.