Dalam dom harei tapa, dom tỉnh gah kreih negar saong bhum Tây Nguyên rilo mbang rahtabiak hajan khang ngak dauk ia di rilo labik, glut jaleih, hajan ia sua, khat lahik ka manuac saong drap ar di rahra. Piah trun manieng dom khat lahik kayua hajan ia sua Thủ tướng Rajaei hu harak ieu kakei akaok UBND dom tỉnh, ban peih bruk pasang iek, caga dahlau bruk panduan ba rahra nao daok di labik salamat; hu jalan daong ka labik daok tạm, pandap mbang, pandap pandar yaok harei ka rahra njauk panduan ba nao daok di labik karei, tani tanat raidiuk ka rahra; caga dahlau bruk pato tacei peih ngak tani tanat salamat ka gru pato, anek saih, labik pato magru di dom labik rahtabiak ia ndauk.

Melam ini (13/10) di Hà Nội, hu peih bruk “Pok meyaom saong brei angan urang nong Viet Nam naih gheih abih thun 2023; pok meyaom 63 Hợp tác xã ngak nong hadah krah”. Tui kapul urang nong Việt Nam pakat negar, dalam 100 urang nong naih gheih abih hu pok meyaom thun ini, hu 42 urang nong ngak laba hu labaih 3 tỷ đồng sa thun. Meyah thun 2022, urang nong naih gheih abih hu jien mek tame glaong abih lac 70 tỷ đồng, ye thun ini urang nong naih gheih abih hu jien mek tame glaong abih lac 140 tỷ đồng. Ini lac thun ka 2 gam gam, Kapul urang nong Việt Nam pakat negar peih bruk pilih ruah 100 urang nong Việt Nam naih gheih abih dalam thun, abih di nyu lac mbang camereip 63 hợp tác xã ngak nong hadah krah pakat negar hu pilih ruah piah pok meyaom.

Uan salam Harei mbang Katê di mikva Cam Ahier, lambaok urang pan akaok tỉnh Bình Thuận hu padang rilo kapul nao rivang, alin pandap saong tadhau ayuh mikva bangsa Cam saong dom halau janieng tui agama Bàlamôn, urang hu angan je saong sang sarak kanja di huyện Bắc Bình saong Tuy Phong. Urang pan akaok tỉnh taong yaom glaong hatai pambuak gauk, padang ngak khang kajap talei jumpataom gauk di bangsa dalam mikva bangsa Cam haong haong dom bangsa karei di dalam ban. Abih di nyu nan lac, dalam dom thun tapa, dalam mikva bangsa Cam hu rilo bruk ngak gheih rik tame bruk dak padang cak rok patagok kinh tế - xã hội di bhum palei, abih di nyu nan lac halain hatain hu mbaok tame danak dak praong, yau ye Ba gauk padang ngak palei pala bahrau…

 Harei ini, urang Khmer Nam Bộ chreih chrai uan raok Sene Dolta. Tui bruk ini, dom urang dang akaok tỉnh Trà Vinh hu padang rilo kapul nao ravang, tadhau ayuh saong alin hadiah pandap ka dom baha Phật giáo Nam tông Khmer, dom sang sarak karja, urang jakar padeih hưu lac urang Khmer hu angan je dalam tỉnh. Di dom labik nao ravang, dom urang pan akaok tỉnh hu panuac tangi sua, tadhau ayuh dom halau janeng saong mikva  urang Khmer; payua panuac tadhau ayuh tal taong abih mikva urang Khmer dalam tỉnh uan raok Sene Dolta dalam bui sambai, trei sir. Tỉnh Trà Vinh hu labaih 1 triệu menuac, dalam nan urang Khmer hu jaik 32%.    

Peih ngak danak dak pakacah “Jak ba gheih” tukvak 2021-2023, dom urang lin  quân hàm hijao tỉnh Kiên Giang hu rilo bruk ngak gheih di dom gah raidiuk, mbang ngui. Danak dak jak ba hu labaih 4 tỷ đồng; dalam nan, urang jakar, bol lin hu rik tame labaih 2.000 harei ngak bruk piah daong ka rahra hu mbaok tame padang ngak palei pala bahrau. Dom bruk ngak rik tame khik kajap hatai rahra, pabak talei pambuak gauk di Đảng saong rahra, bol lin saong rahra, patagok prein khang di talei jumptaom gauk di rahra dalam bruk khik ramik, khik caga quyen ngak po jalan tapen negar, paglaong raidiuk di rahra.

Hãng thông tấn Triều Tiên KCNA ba panuac urang ngak praong negar ini tah klaak panuac lac dom phao ndao hu asal Triều Tiên hu kol Hamas di Palestin pandar dalam mbang taong tame Israel bahrau ini. Triều Tiên ndom lac, dom bruk hu báo chí saong chuyên gia quân sự Mỹ ba tabiak lac suan, oh biak. Dahlau di nan, javap jalei panuac di gah báo chí ka bruk dom chuyên gia quân sự Mỹ lac, bệ phóng tên lửa di Hamas meda mai meng Triều Tiên, urang brei panuac di Hội đồng An ninh Negar Mỹ brei thau, Mỹ oh ka cambaih laih hu ka bruk ini 

Mbang nyaom di Akaok Mintri Ngoại giao saong Akaok Mintri Quốc phòng Nhật Bản saong Australia (daok hu ieu lac dua pagam dua) meda hu peih tabiak di Nhật Bản di adit anak. Di mbang nyaom, dom akaok Mintri meda ginum biai ka rilo bruk dunya yau ye mesuh metak di Nga-Ucraine, bruk daok catang tagok di Trung Đông... Min, asal kadha praong di abih lac meda pataom tame langyah, taoh talaih dom bruk di bhum Ấn Độ Dương - Thái Bình Dương bo njauk ndem di abih lac bruk peih praong di Trung Quốc tabiak tasik, paglaong bruk pambuak gauk di dua taneh ia piah pacang caga haong bruk ngak di Trung Quốc.

Urang dang akaok gah rilo menuac jang di Hạ viện Mỹ Steve Scalise klaak bruk pakacah tame ngak Chủ tịch Hạ viện sa harei hadei di tuk taduan hu panuac ba tabiak pakacah di đảng Cộng hòa. Ong Scalise tabiak truh bruk pakacah tame ngak Chủ tịch Hạ viện tuk dak harei dak hu rilo nghị sỹ Cộng hòa lac oh buh phiếu ka ong. Dom urang dalam Cộng hòa di Hạ viện mesup ini 13/10 (tui mon Mỹ) ginum biai bruk pilih ruah sa urang bharau tame labik urang dang akaok Hạ viện./.