Harei kabroi (28/12), Akaok negar Võ Văn Thưởng hu payua harak uan umo thun taha tal 1.025 urang hu umo 100 thun saong umo mangaok 100 thun di 10 tinh, ban di dalam taneh ia lac dom tỉnh: An Giang, Vĩnh Long, Bắc Ninh, Quảng Ngãi, Hà Giang, Bắc Giang, Điện Biên, Đắk Nông, Trà Vinh saong Phú Yên.

Melam blaoh, di bến Ninh Kiều, TP. Cần Thơ rah tabiak Danak dak Pahadar 20 thun padang quận Ninh Kiều saong Peih mbaok “Harei pataom Du lịch – Melam Gom bingu Ninh Kiều, Cần Thơ”. Ini lac sa dalam dom bruk ngak piah pahadar 20 thun TP. Cần Thơ daok dalam Trung ương saong 20 thun padang quận Ninh Kiều. Dalam 20 thun padang tabiak saong patagok, Đảng bộ saong bhap bini quận Ninh Kiều tuk halei jeng thau jum pataom gauk, tui jalan cách mạng di dom rai dahlau, yam tapa yaok kan kandah, tavak tavaiy, ngak siam bruk cakrok KTXH, mek hu rilo jak jeng praong di taong abih gah. Dalam nan njauk ndom tal di abih lac kinh tế dak harei dak tagok, paglaong prein meriak gauk di gah kinh tế.

Tết thun ini, Ban raya Hồ Chí Minh hu 2 labik cuh phao bingu, lac 1 labik cuh glaong di jalan lubang kraong Sài Gòn, ban Thủ Đức saong 1 labik cuh bier di Mblang bein ilamo Đầm Sen, Quận 11. Tukvak meng maong 12, tal maong12- 15 minit melam 01/01/2024. Gam haong danak dak cuh phao bingu, TP. Hồ Chí Minh daok peih rilo danak dak ilamo uan raok thun bahrau. Dalam nan, danak dak Countdown (yaok kaduan) hu peih tabiak di melam 31/12 di Mblang bein rup patau Chủ tịch Hồ Chí Minh saong jalan Nguyễn Huệ, Quận 1. Langiu di nan, di dom quận, huyện saong ban Thủ Đức, dom sang bac đại học, cao đẳng, trung cấp chuyên nghiệp, ký túc xá sinh viên, dom Labik chế xuất – Labik ngak kong… jeng hu peih ngak dom danak dak parang me-in daoh tamia salam uan thun bahrau.

Ngan saong urang Khmer, baoh paha oh njauk lac labik piah pok kakuh, ngak bruk agama bo paha daok jeng dom pasak khik ramik, pato pakai dom janih ilamu, daoh tamia, rija roya…Urak ini, dalam tỉnh Trà Vinh hu 143 baoh paha Khmer, jeng hu pabak dom alat ragam, dom janih gah ragam ragu piah ngak bruk ilamu, daoh tamia. Langiu di nan, daok hu 112 kapul phleing ngũ âm, 95 kapul ginang Chhay-dăm, 35 kapul tamia chằn, kara, labaih 100 kapul ragu ragam bahrau, 40 kapul taong valei, 8 kapul ghe ngo, 1 kapul daoh tamia Khmer Ánh Bình Minh... duh pamere ka bhap bini saong tuai damuai tuk mai tal Trà Vinh.

Bier harei kabroi, di xã Hòa Phú, ban Buôn Ma Thuột, Sở Ilamo, Thể thao saong Du lịch Đắk Lắk peih bruk tabiak mbaok kalup kapul pato ilamo meng kan di bangsa Thái. Lac sa dalam dom bangsa panduan mai daok di Đắk Lắk, urang Thái pak Hòa Phú rilo meng lac mai meng dom tỉnh Tây Bắc yau ye: Sơn La, Lai Châu... Urak ini xã Hòa Phú hu jaik 600 sang urang Thái ngan haong labaih 2000 urang. Dom thun jaik di ini, raidiuk, mbang ngui di mikva dak harei dak hu tani tanat saong daok khik hu dom ilamo siam gheih di bangsa drei dalam dom harei rija, roya, harei tết. kalup kapul bhap bini bangsa Thái hu jaik 30 urang hu hatai anit ranam ilamo bhap bini meng kan.

Padang ngak bahrau baoh blong hadah pui di Mblang bein Thời đại, ban New York, Mỹ bahrau hu khan brei thau tuk dunya jaik yam tame thun 2024. Baoh blung praong ini hu sahneng tabiak meng baoh nơ, sa janih brei mboh ka Mblang bein Thời đại. Baoh blong hadah pui praong 12 feet (samu 3,6 mét) hu labaih 2.600 candaih pha lê pagam vil val. Bruk palao baoh blong hadah pui di mblang bein Thời đại hu jeng sa bruk piah uan raok thun bharau di Mỹ meng thun 1908. Tui thun bilan tapa saong tui bruk cakrok di ilamu kỹ thuật, blaoh blong hadah pui hu rilo salih karei, meng hu ngak meng pasei saong kayau di tuk camereip tal baoh blaong nhôm saong harei ini lac baoh blong trak 6 tấn hu tauk pagam pha lê.

Jabat du lịch Hồng Kông (Trung Quốc) brei thau meda peih bruk yaok kaduan melam palao thun klak raok thun bahrau praong abih kuhria meng kan mai ka rahra saong tuai du lịch meng grauk labik di dunya di melam 31/12. Ngan haong kadha “thun bahrau, Huyền thoại bahrau”, ini lac mbang parang iek cuh phao bingu saong ragu ragam yaok kaduan praong abih saong suai atah abih di pabah lamnge Victoria, atah abih tih 1.300 mét, dui atah dalam 12 minit. Phao bingu meda hadah tagok meng labik Pasak tal Vịnh Causeway saong hu cuh tagok gam gam meng 5 sà lan saong 16 tatua phao tui 4 bilan, ba rahra saong tuai damuai tapa dom bilan Xuân, Hạ, Thu, Đông. Di tabung 3 baoh sang ndung ba thaot bingu di kaoh pulao Hồng Kông jeng meda cuh phao 4 sambo mau, yau brei mboh ka bruk bui sambai, prein yava, haniem phul saong trei sir. 

Kapul ngak kong praong di Trung Quốc lac Xiaomi bahrau tabiak mbaok sruh radaih điện camereip abih di drei saong khan lac daok pamaong tal bruk jeng sa dalam lime hãng ngak ô tô dang akaok dunya. Sruh radaih điện bahrau di Xiaomi hu angan ieu lac SU7, tui kuhria, hu ngak dalam bruk tacei ba haong dom janih phone tangin daok hu ngak rilo di kapul ini. Yaom lac di dunya daok kandaong labaih rilo radaih ô tô điện, Xiaomi jeng daok kuhria ngak tabiak 200.000 sruh radaih sa thun./.