Rajaei bahrau pok tagok Ủy ban Thường vụ Quốc hội jalan ngak jao labaih 2.500 tỉ đồng ka Tập đoàn Điện lực Việt Nam meng phun jien di kadung jien kanja pakat negar piah peih ngak danak dak pabak dien meng talei dien negar ka huyện Côn Đảo, tỉnh Bà Rịa - Vũng Tàu. Jalan ngak di Rajaei hu ndem cambaih, kayua bruk pandar dien di Côn Đảo dak harei dak glaong, dien nduac meng manjek diesel pak di labik oh pabak ginup. Bruk pabak dien tani tanat saong salamat ka jalan talei dien di angaok pulao, piah pabak hu dom bruk cak rok patagok kinh tế - xã hội di huyện Côn Đảo, rik daong khik kajap siam makre quốc phòng saong khik kajap quyen ngak po tasik pulao negar drei lac bruk njauk ngak.

Dalam thun 2023, di TP.HCM saong 4 tỉnh Đông Nam bộ lac: Bình Dương, Tây Ninh, Bà Rịa - Vũng Tàu, Đồng Nai saong 2 tỉnh bhum ĐBSCL lac Tiền Giang, Long An hu 14.520 bruk ngak duas gah trật tự xã hội, samu jaik 25% abih dom bruk ngak duas sron mbon salamat dalam taneh ia. Ta-eng dalam TP.HCM hu labaih 11% dom bruk dalam taneh ia. Daok bruk ngak duas gah kinh tế, chức vụ, tham nhũng, công an 7 labik hu khởi tố 740 bruk, gam tal abih tih  914 urang. Gah công an hu tagok angan 14 băng, nhóm tội phạm piah cap mek, hu pasang iek, duah thau, ngak brei cambaih labaih 10.100 bruk. 

Tui Mban khik ramik Danak dak buh jien tame padang ngak ban Cần Thơ, jalan nduac samar Châu Đốc - Cần Thơ - Sóc Trăng danak dak binah 2 nao tapa ban Cần Thơ atah labaih 37 km, ngan haong yaom phun jien buh tame abih tih labaih 9.700 tỷ đồng, daok gaok kan kandah kayua kurang cuah piah lam. Mban khik ramik danak dak buh jien tame padang ngak daok cang UBND tỉnh An Giang pabak harak piah brei kuac cuah pabak ka danak dak. Min, mo cuah hu adat kuac di An Giang lac labaih 2,2 triệu m3, tok pabak hu hatai caong dalam thun ini. Ngan haong dom cuah daok kurang di danak dak jaik 5 triệu m3 daok cang bruk daong di dom tỉnh Tiền Giang, Vĩnh Long.

UBND huyện Nhơn Trạch, tỉnh Đồng Nai hu khan brei thau cambaih jalan bayar jien, daong ka labaih 500 bruk urang brei taneh piah ngak danak dak binah 4, di jalan Vành đai 3 - TP. Hồ Chí Minh, labik nao tapa tỉnh Đồng Nai. Tal urak ini, yaom lac oh ka abih tukvak niêm yết min hu blaoh 28 sang mai taduan mek jien bayar tagok tal jaik 60 tỷ đồng. Tui panuac khan di UBND huyện Nhơn Trạch, bruk mek veik taneh di danak dak binah 4 gaok biak rilo kan kandah, tavak tavaiy pambuak tal bruk pandar sarak daong tani tanat raidiuk, pato pakai, salih bruk ngak saong duah bruk ngak.

Tui Sở Lao động - Thương binh saong Xã hội tỉnh An Giang, tui kuhria, tinh meda parabha brei kadung jien karja tỉnh jaik 100 tỷ đồng piah daong pabak Tết ka dom urang sarak; nao rivang, tadhau ayuh tet ka dom kapul nyaom, manuac urang. Dalam nan hu nao rivang, alin pandap tet ka dom urang jakar, công chức, viên chức, urang ngak bruk oh chuyên trách pakat xã, urang hu mbang jien bảo hiểm xã hội lac 1 triệu đồng; urang hu mbang jien daong xã hội lac 600.000 đồng; sang kathaot, sang gaok kan kandah kayua jit praong COVID-19 lac 500.000 đồng... khik tani tanat oh caik rahra halei njauk eik lipa, oh hu mbang Tết, UBND tỉnh An Giang ieu kakei Cục khik piah kanja bhum Tây Nam Bộ daong labaih 1.300 tấn brah ka 33.455 urang hu mbang jien daong xã hội, sang kan kathaot, sang jaik kathaot, sang gaok kan kandah.

Thái Lan daok ba tabiak piah pasang iek brei panuac ka adat pakauk pandar cần sa brei ka bruk me-in sambai, jeng yau dom jalan taong phạt trak menuac ngak suan tui sa dự luật bahrau piah duah jalan palahik abih labik wang huan di adat hukum hadei di tuk taneh ia ini jeng taneh ia camereip abih di châu Á brei adat pandar cần sa. Tui dự luật hu ba tabiak piah pasang iek brei panuac, urang halei njuk cần sa dalam dom bruk me-in sambai njauk tong phạt tagok tal 60.000 baht (1.720 USD). Dom menuac pablei cần sa atau dom janih ngak tabiak meng nyu piah ma-in sambai meda njauk cap caik guk 1 thun atau phạt tiền 100.000 baht, atau taong phạt gam abih 2 bruk nan. 

Sa roh duah pakat dunya kayua Australia ba tabiak brei mboh lac nhiet do di dunya tagok glaong abih dalam thun 2023 ngak brei trak damak jang bruk pandiak bhang, ia dauk ia sua saong khuah glai di grauk labik di dunya. Dalam thun 2023 hu tal 77 taneh ia hu gaok bruk nhiet do kuhria rah tapa yaok thun glaong abih dalam takik di nyu 45 thun. Gam haong nan, dunya hu mboh dom mbang hangin khang rahtabiak ngak brei metai lahik praong saong dom mbang pandiak bhang jeng daok bhian mboh jang.

Tui panuac khan di Viện roh duah kinh tế di Đức, 2 bilan jhung thun 2023, pablei salih di dunya trun 1,3% kayua dom bruk taong tame di gah brok tagok pamaong tame dom kapal gilai pablei salih di Biển Đỏ ba tal dom pandap panda pajeng ba di labik ini trun khang. Bruk salih jalan nao piah njaik bruk taong tame nan, ngak ka jalan pajeng ba angaok tasik di dom pasak ngak tabiak pandap di châu Á saong menuac blei pandar di châu Âu suai jang 20 harei./.