Thành Đoàn, Kapul Sinh viên, Pasak daong anek saih, sinh viên TP.HCM pambuak haong gah daong, bahrau peih ngak harei palao sinh viên gaok kan kandah nao palei mbang Tet meng “sruh radaih pui bilan xuan”. Sruh radaih pui bilan xuan lac peih mbaok ka bruk pajeng sinh viên gaok kan kandah nao palei mbang tet thun 2024, haong abih tih harak ve radaih pui, harak ve radaih oh mek jien lac 2.200 vé. Taeng radaih pui oh mek jien di harei 28/1 lac 150 vé. Langiu di nan, dalam tukvak urak ini, Pasak daong anek saih, sinh vien Ban raya pambuak haong dom kapul mayaih khan 4.000 bruk ngak dalam tuk Tet ka sinh vien, alin pandap ka 2.000 anek saih, sinh viên gaok kan kandah.

Di mbang pakacah pilih ruah anek saih THPT thun bac  2023-2024 naih  joi pakat negar, tỉnh Tiền Giang dang akaok bhum ĐBSCL ka dom anek saih mek hu giải. Tinh ini hu 83 anek saih tame pakacah haong 9 môn pakacah, lac: Toán, Vật lý, Hóa học, Sinh học, Tin học, sap Anh, Ngữ văn, Lịch sử, Địa lý. Bruk njauk biai nan lac di taong abih dom môn pakacah, anek saih Tiền Giang jeng hu giải thưởng. Piah hu siam mekre yau nan, mai meng hu dom sang bac THPT di tỉnh Tiền Giang paglaong bruk pato saong bac, sangka pato pasram paglaong ilamu ka anek saih naih joi, pachreih ba saong daong palgaih ka dom adei hu mbaok tame dom mbang pakacah anek saih naih joi dom pakat.

Dom harei bahrau blaoh, mikva dom bangsa takik di 4 xa bhum ceik glaong pak huyện Bắc Bình, tỉnh Bình Thuận peih bruk uan raok Tết akaok padai. Tết akaok padai kak kajap haong adat pok kakuh padai amaik, lac sa janih padai angan je pala di taneh puh di mikva Raglai, K’ho. Yaok thun, tuk yuak padai blaoh, mikva peih ngak dom adat, brei mboh hatai thau dhar phol saong hatai jia tame padai amaik saong pok likau ka bilan ngak padai hu siam makre, rilo padai brah. Tuk camriep, tết ini tok hu peih ngak sit sot dalam sang, dui atah luac dua bilan. Min urak ini, Tết akaok padai hu jeng harei roya di rilo mikva bangsa brei mboh bruk jumpataom gauk,, anit ranam gauk di mikva pak ini.

Tỉnh An Giang bahrau peih bruk taom mbaok dom urang hu angan je, urang pan bruk agama, bangsa dalam tỉnh salam uan thun sak ine girai 2024. Thun 2023, dom agama, urang hu angan je dalam bangsa hu jak ba urang dalam agama di drei saong bol bhap rahra, hu mbaok tame dom bruk pakacah gauk anit ranam taneh ia, patagok KT, ilamu, kuhri kuhria ka raidiuk bhap bini, yau ye: daong padang ngak sang anit ranam, alin hadiah pandap Tết ka urang kan kandah, raong pato uraniah metui, daong jien padai prein yava tame ngak jalan… rik daong tame bruk padang ngak palei pala bahrau. 

Huyện palei pala bahrau Mỹ Xuyên, tỉnh Sóc Trăng bahrau tabiak harak pok angan xã Đại Tâm lac xa hu labaih 86% mikva Khmer mek hu tanut chuan palei pala bahrau kieu mau ka ilamo, du lịch. Ini lac sa dalam dua xa camriep di tỉnh Sóc Trăng hu pok brei angan lac mek hu tanut chuan palei pala bahrau kieu mau. Tal urak ini, jien mek tame tui kuhria yaok thun di rahra pak xã Đại Tâm hu labaih 76 triệu đồng. Xã hu bruk padang ngak ấp thông minh, ấp ilamo palei pala bahrau; xa oh daok saiy kadaong padang ngak cơ bản, oh srau kadau gah an ninh trật tự; bruk njauk hatai di rahra lac labaih 99%.

Kapal du lịch praong abih di dunya bahrau peih mbang nao camereip abih. Kapal angan “Biểu tượng di tasik” tabiak nao meng Miami, Mỹ. Kapal atah 365m, atah jang duk haong glaong di tháp Eiffel, trak 250.000 tấn, praong jang 5 mbang kapal Titanic. Kapal pajeng hu 8.000 tuai di mangaok 20 boong. Kapal nduac meng khí đốt tự nhiên hóa lỏng. Yau nan min, khí đốt tự nhiên hoá lỏng mbuan hu rilo khí mê-tan tathuak tabiak. Nan ye kapul khik caga alam môi trường huac lac meda hu bruk tathuak khí mê-tan jhak tame khí quyển.

Di rilo labik pak negar Cộng hoà Séc hu peih Harei pataom hoá trang Shrovetide piah palao bilan laar. Dom urang hu mbaok tame harei ini, hu cuh tagok rup  dom blah khan ao hadah tanyak, bak sambo mau saong ngak jeng dom urang cuk mặt nạ. Hadei di nan, dom urang ini nao meng sang ini tapa sang karei, meng bruk brei adat di po sang, peih ngak sa ragam tamia ngak adat piah caong ka bilan yuak kuak siam makre, ginup meda. Ini lac sa dalam dom  harei pataom meng kan bui sambai abih saong biak hu caong maong di Séc kayua ba bilan xuan biak siam makre mai tal pabah mbang

Gah lin tasik Sri Lanka brei thau, kol blah tasik Somalia blah nao sa sruh kapal taong ikan Sri Lanka saong cap mek 6 urang angaok kapal, di bhum tasik atah Somalia jaik 840 hải lý nao gah Đông Nam. Bilan dahlau, kol blah tasik Somalia nyu blah mek kapal pajeng pandap tual hala dok Malta, lac kapal di Bulgaria. Dom bruk meblah di langiu tasik Somalia tagok tal tabung glaong di thun 2011, haong dom bruk blah rah tabiak atah di takai tasik Somalia saong Ấn Độ Dương tal 2.000 hải lý, dahlau di tuk trun khang dalam dom thun jaik ini./.