Dalam thun ini, 2 tỉnh Bình Dương saong Bình Phước meda peih ngak jalan nduac samar  TP.HCM – Thủ Dầu Một - Chơn Thành saong jalan nduac samar Gia Nghĩa - Chơn Thành. Danak dak jalan nduac samar TP.HCM – Thủ Dầu Một - Chơn Thành atah labaih 70km. Tui kuhria, meda hu peih ngak di harei 2/9/2024, ngak salah di puac thun 2027. Daok di Bình Phước, piah samu ka bruk peih ngak jalan nduac samar TP.HCM - Chơn Thành saong jalan nduac samar Gia Nghĩa - Chơn Thành dalam thun ini, UBND tỉnh daok jhul samar bruk ngak piah ngak salah dom harak gar tui adat hukum.

Tỉnh đoàn Bạc Liêu pambuak bruk haong Báo Người Lao động saong UBND huyện Phước Long bahrau peih pakak Danak dak "Jalan dok taneh ia" atah labaih 20km tại huyện Phước Long. Tui panuac di Bí thư Tỉnh đoàn Bạc Liêu Phạm Tuấn Tài "Jalan dok taneh ia" oh lac ngak brei mekre ka jalan bo daok pato pakai hatai anit ranam taneh ia ka yaok menuac urang. Anak tal, Tỉnh đoàn Bạc Liêu brei pambuak bruk haong dom gah pambuak tal peih ngak saong ngak brei salah dom danak dak "Jalan dok taneh ia" daok veik piah jao brei ka dom puk palei.

Tỉnh Trà Vinh hu 8/9 huyện mek hu tanut chuan palei pala bahrau. Abih tih 85/85 xã hu pok brei angan palei pala bahrau; 40 xã mek hu tanut chuan palei pala bahrau paglaong kiểu mẫu. Min tuk ba tame pandar dom asal kadha tukvak 2021-2025 ye hu 11 xã ka oh ngak hu. Kayua yau nan, meda ngak salah bruk padang ngak palei pala bahrau dahlau di thun 2025, tỉnh Trà Vinh daok pataom prein tame paglaong dom asal kadha tui adat bahrau, gam tui di nan jeng kham marat peih ngak salah 3/8 asal padang ngak palei pala bahrau bo tinh ka oh ngak hu.

Công an tỉnh Ninh Thuận bahrau mai ravang, alin hadiah pandap ka dom halau janeng, dom urang pan bruk agama, urang hu angan je dalam bhap bini di tỉnh Ninh Thuận, di tuk caga tame bilan Ramưwan di urang Cam Bani saong lac bilan Ramadan di urang Cam Islam. Di dom labik nao tal, Yam ndok CA tỉnh hu payua panuac tadhau ayuh siam mekrte di abih tal dom halau janeng saong gauk gar, tame bilan Ramưwan siam mekre, salamat. Thun ini, urang Cam Bani haong urang Cam Islam tame bilan eik  Ramadan meng harei 11/3.

Mintri Ngak nong saong patagok palei pala brei thau, urak ini daok tame tukvak kreih bilan thu 2023-2024, tabung glaong di langik pandiak saong njom ia mbak. Tui kuhria mboh dahlau,  ia tuh mai Bhum taneran Cửu Long dalam bilan 3 jeng daok bier, ba tal bruk njom ia mbak jeng daok tanut glaong, ngak kan kandah tal bruk ngak mbang saong pala drak. Langiu di nan, dom pabah kraong karei yau ye kraong Vàm Cỏ tukvak njom ia mbak jeng dui atah jang meda tal labaih kreih bilan 4. Ong Nguyễn Mạnh Hùng, Akaok Jabat Khik ramik peih pandar saong pruh ia, Jabat Thủy lợi njauk caik hatai, dom bhum palei bhian patui iek dom khau tin kuhria dahlau ka langik tasik, gam tui di nan jeng khik piah ia taba siam lagaih saong pandar ia patak pataom.

Mintri Jalan mbak – Pajeng ba Malaysia khan lac taneh ia ini daok jhul patagok sa bruk roh duah bahrau ka sruh kapal haoh MH370 di Hãng kapal haoh Malaysia Airlines, hadei di jaik 10 thun sruh kapal haoh ini lahik. Thun 2017, Malaysia, Trung Quốc saong Australia brei padeih bruk roh duah mala ia dui atah dalam 2 thun bo oh duah mboh hu hagait. Sruh kapal haoh MH370 pajeng 227 tuai saong 12 urang lac menuac peih saong duh bruk angaok kapal haoh, nyu par lahik angaok jalan meng ban ine Kuala Lumpur tal Bắc Kinh, Trung Quốc di harei 8/3/2014. 

Bilan pandiak thun ini di Ấn Độ meda pandiak jang yaok thun, abih di nyu nan lac dalam tukvak camriep tuk bruk El Nino daok rahtabiak veik. Tui kuhria mboh dahlau di Cục Khí tượng Ấn Độ, negar ini meda gaok langik nhiet do glaong jang di tanut yaok harei dalam tukvak meng bilan 3 tal bilan 5 saong dom harei pandiak glaong jang tanut kuhria yaok thun. Meng di tuk El Nino tamat, bruk La Nina meda rahtabiak saong bhian nao gam haong hajan siam dalam bilan hangin pak Ấn Độ dui atah meng puac bilan 6 tal bilan 9.

Gah Y tế Dunya saong sa kapul dom urang roh duah pakat dunya brei thau lac labaih 1 tỷ menuac di mangaok dunya urak ini lamek labaih kilo, lac sa bruk hu pambuak tal rilo kadha oh siam di prein yava. Tui kuhria, jien ka bruk iek ruak lamek labaih kilo lac sa rabau tỷ đô la di thun 2030, nan ye, dom taneh ia oh ginup jien piah bayar saong abih di nyu lac dom taneh ia hu jien mek tame biar jang./.