Di Nyaom biai peih ngak Danak dak “Patagok khang kajap sa trieu hecta pala sa janih padai asar siam glong saong patakik tathuak nerak, pambuak saong bruk patagok hijao Bhum taneran kraong Cửu Long mbiah tal thun 2030” peih tabiak harei kabroi, di tỉnh Kiên Giang, Akok Mentri Ngak  nong saong Patagok palei pala Lê Minh Hoan khan lac: piah pasiam veik bruk parabha hamu padai sit sot, palih, ngak tui hatai ta-eng dalam bruk ngak mbang pala drak, pablei salih padai brah di bhum taneran kraong Cuu Long, Danak dak thau lac: “ ngak brei palagaih rilo padai brah”, tapa bruk padang kapol urang ngak nong chuyen nghiep, pabak ilamu, bruk gheih ngak di urang nong, paglong ilmau khik iek, bruk pambuak di dom kapol urang  ngak nong, HTX ngak nong, ginup prein pambuak kajap haong doanh nghiep.

Ong Nguyễn Duy Thuận, Taong Yam ndok Tập đoàn Lộc Trời brei thau, Việt Nam bahrau njauk pok thầu pablei brah tapa Indonesia labaih 400.000 tấn. Ini lac kadha bui sambai ka bilan padai đông xuân hu yuak hadei meng Tết blaoh. Thun ini, Indonesia daok kuhria blei tame 3 triệu tấn brah, samu haong Philippines. Bruk taneh ia drei njauk thầu pablei labaih 400.000 tấn hu daong patrun yaom padai dalam tukvak jaik ini, caong lac mikva jeng daok njauk padai, pablei hu yaom dalam thun bahrau.

Tổng cục Khik piah di Karja birau jao bruk ka dom Cục Khik piah Karja dalam bhum buh tabiak jaik 12.800 tấn brah meng gilang khik piah pakat negar piah daong ka jaik 850 ribau bhap bini mbang Tet thun nasak Girai saong tuk jaik si yuak padai thun 2024. Tui nan, hu jao cục khik piah dom bhum samar buh tabiak, pajeng ba saong jao brei labaih 10 ribau tấn brah meng gilang brah piah caga pakat negar daong ka bhap bini di 17 bhum palei:  Sóc Trăng, Kon Tum, Hà Giang, Bắc Kạn, Gia Lai, Bình Định, Cao Bằng, Nghệ An, Đắk Lắk, Đắk Nông, Bạc Liêu, Ninh Thuận, Bình Phước, Quảng Ngãi, Kiên Giang, An Giang, Tây Ninh.

Harei ini, di ga Biên Hòa, Tong LĐLĐ Việt Nam peih bruk palao urang ngak daok ngak bruk di tỉnh Đồng Nai nao palei mbang Tết di gah brak saong bhum kreh negar. Dah paguh, di mblang kapal haoh Tân Sơn Nhất, Tổng LĐLĐ Việt Nam peih bruk palao urang ngak daok ngak bruk di TPHCM saong dom tỉnh gah meraong nao palei mbang Tết di gah barak saong Bắc Trung bộ. Ini lac dom urang ngak hu raidiuk kan kandah, hu công đoàn daong taong abih atau daong meneing jien harak vé kapal haoh nao tui danak dak “Mbang par công đoàn Xuân 2024”.

Dom harei jaik Tết, bingu kieng hu parang pablei angaok rilo jalan, bein  bingu, darak bingu di TPHCM haong yaom pablei mbiah. Yau nan min, urang takik blei bingu Tết. Mboh di dom labik pablei yau: Bein bingu Lê Văn Tám (Quận 1), bein bingu Gia Định (quận Phú Nhuận), bein bingu Bến Bình Đông (Quận 8),... janih bingu kieng Tet thun ini biak ralo, yaom tok labaih 70 -80% dut saong dom thun dahlau. Yau nan min, urang mai blei oh hu rilo yau hatai caong khin. Dom urang pablei salih bingu kiểng thei jeng sahaneng huac pablei oh  bih tuk mboh takik manuac blei.

Ấn Độ urak ini jeng oh ka sahneng tal bruk pasang iek veik dom adat brei takik pablei brah tabiak negar langiu hu ba tabiak tukvak tapa. Nan lac panuac khan bahrau abih di rajaei Ấn Độ, dalam tuk yaom brah di taneh ia ini jeng daok tagok 15% di darak pasar. Tapa nan ngak brei bruk kurang brah di dunya mbuan tgaok khang. Ấn Độ hu panuac ieu taong abih dom urang pablei salih praong, sit, dom sang mac chai padai di taong abih dom bang, khan brei thau hadom brah di drei daok hu urak ini.

Urang metai kayua apui khuah glai di Chi -lê tagok tal 122 urang. Dalam tuk nan dom urang gah daong padam apui khuah saong daong duah urang gaok bala daok drah samar piah padam apui saong duah yaok rituh manuac daok lahik. Urang ngak praong di Chi-lê hu tabiak bruk giới nghiem di dom labik rah tabiak bala trak abih. Urak ini, hu 165 labik apui daok khuah dalam negar ini kuhria mboh labaih 14.000 baoh sang khut tayak.

Meng rilo harei tapa, biak rilo menuac di Gada dang jeng talei atah piah taduan mek brah di drei di sa labik ngak pahla daok di gah meraong Rafah, jaik taphia jalan tapen negar Ai Cập, labik pabak pandap mbang biak takik. Bruk daong ngak pahla ka Gada biak takik, kuhria meng tuk bruk mesruh gauk di Israel haong gah Hamat patuh tabiak di bilan 10/2023. Rajaei Israel tah klaak 70% bruk daong pandap mbang tame ka gah brak Gada. Liên hợp quốc brei thau lac labaih 2 triệu menuac daok dalam bhum taneh ini daok laik tame eik lipa, oh hu pandap mbang biak trak damak./.