Dah page harei ini (11/10), Ủy ban Thường vụ Quốc hội (TVQH) hu peih mbang nyaom ka 27. Hu peih tabiak dalam 4 harei mateh, Ủy ban TVQH brei panuac tame rilo asal kadha hu makna praong, bruk njauk mayai nan lac, di dalam mbang nyaom ini, Ủy ban TVQH meda brei panuac ka bruk caga mek harak jia tame ngan haong urang daok khik bruk kayua Quốc hội pok tagok atau brei ngak di mbang nyaom ka 6, Quốc hội mbang 15. Brei panuac ka dom jak jeng peih ngak jalan cak rok patagok kinh tế - xã hội thun 2023, tui kuhria Jalan cak rok patagok kinh tế - xã hội 5 thun 2021 - 2025; taong yaom kreih tukvak ka bruk rami ramik veik gah kinh tế tukvak 2021-2025.

Ong Phan Văn Mãi, Chủ tịch UBND TP.HCM, akaok kapul urang QH TP bahrau taom gaok tapak cử tri Quận 7 saong taom gaok online haong cử tri Quận 4, huyện Nhà Bè. Tapa taom gaok nan, cử tri hu rilo panuac ka peih ngak Sarak 98, bruk jalan mbak, pacang ia dauk… Hadei di tuk caik hatai tui pang panuac di dom cử tri, ong Phan Văn Mãi hu panuac ieu dom gah pambuak tal, langyah tui bruk di drei, pok panuac tagok pakat glaong jang, tui iek bruk, ba gauk langyah kayua raidiuk di bhap bini. Daok bruk pacang dauk 10.000 tỷ đồng, ong Phan Văn Mãi brei thau, ini lac sa dalam dom bruk daok tavak tavaiy bo TP daok pataom biak rilo prein yava piah lang talaih.

UBND tỉnh Đồng Nai jeng hu peih Adit salih số thun 2023 ngan haong kadha “peih ngak dữ liệu số piah ngak tabiak kein laba”. Adit salih số mbang ini hu peih tabiak piah bac megru ilamu, taong yaom dom jak jeng ngak hu di bruk salih số dalam tukvak tapa. Ini jeng lac tukvak piah ka urang jakar, công chức, viên chức saong rahra dalam tỉnh Đồng Nai hu roh duah, paglaong hatai sahaneng ka bruk salih số.

UBND tỉnh Kiên Giang bahrau peih bruk taduan mek Harak inem krung ilamu oh mboh di mata pakat negar "Lễ hội Đình thần Nguyễn Trung Trực – TP Rạch Giá" saong pahadar 155 thun AH bangsa Nguyễn Trung Trực ndih trun, var klaak rup drei (1868-2023). Ong Nguyễn Thanh Nhàn, Phaok Chủ tịch UBND tỉnh Kiên Giang brei thau: Lễ hội Đình thần Nguyễn Trung Trực hu Mintri Ilamu, Thể thao saong Du lịch ba tame angan inem krung ilamu oh mboh di mata pakat negar, lac tuk piah ka kol drei  brei mboh hatai thau dhar phor dom kham merat joa kandang, khang kajap di bol bhap rahra, di dom rai nghệ nhân saong yaok rahra dalam bruk khik ramik, patagok yaom inem krung, piah ka inem krung hu pok angan daok hu hadah miat dalam sajarah, ilamu di bangsa.

Harei Ka tê thun ini di urang Cam Ahier di 2 tỉnh Ninh Thuận saong Bình Thuận hu peih tabiak dalam dom harei 13, 14 saong 15/10. Di tỉnh Ninh Thuận, Kate hu peih ngak sa tukvak haong gauk di Bimon Pô Klong Garai (pak ban Phan Rang - Tháp Chàm), bimon Pô Rômê saong bimon Pô Inư Nưgar (huyện Ninh Phước). Pak tỉnh Bình Thuận, harei Kate hu peih tabiak di danaok kakuh Pô Nit, danaok Pô Klaong Mơ Nai (huyện Bắc Bình) saong bimon Pô Sah Inư (ban Phan Thiết). Taphia di dom adat cambat meng kan, thun ini dom bhum palei daok peih ngak rilo kadha ma-in meng kan, dom bruk pahat rup, ilamo daoh tamia ndung mbak ilamo meng kan di bangsa Cam.

Mbang hajan ia sua meng kreh bilan 9 tal ini ngak kan kandah tal 11 tỉnh di Campuchia, ngak brei takik di abih 3 urang matai, jaik 2.000 sang hu ba nao daok di labik salamat. Tui Mintri kaya ia saong langik tasik Campuchia, meng harei 10 - 12/10, tui kuhria mboh dahlau, dom tỉnh Tây Bắc taneh ia ini hu hajan mbiah tal hajan praong di 70 - 80% mbaok taneh, gam haong grum jakala saong hangin khang. Dalam tuk nan, ban ine Phnom Penh saong dom tỉnh karei meda hu hajan sit tal hajan mbiah di 40 - 60% mbaok taneh, hu gam jakala saong ngin khang.

Bruk pandiak tagok di dunya lac makna praong ba tal dom mbang langik pandiak biak khang yau pui cuh di Nam Mỹ dalam dua bilan 8 saong 9 meng blaoh. Tui roh duah di dom chuyên gia mai meng grauk labik di dunya hu khan brei thau di harei 10/10, nhiet do di bhum Nam Mỹ tagok jang 4,3 độ, tagok tal 40 độ C di rilo labik dalam dom taneh ia Brazil, Paraguay, Bolivia saong Argentina di tukvak daok lac puac bilan la-ar saong akaok bilan Xuân di bhum gah maraong bán cầu. Langik pandiak sarau kadau jeng ngak ka rilo urang metai dalam bhum.

Yaok triệu janih phun kayau oh ka hu angan ieu daok dang anak bruk mbuan si lahik abih. Dom urang roh duah di Bein phun kayau Kew di London (Anh) hu ba tabiak panuac khan ini dalam sa roh duah bahrau ini. Kapul roh duah hu pasang iek nao mai harak angan dom janih phun kayau mbuan lahik abih but di kapul khik ramik langik tasik pakat dunya. Tapa nan mboh lac 75% dom janih phun oh ka hu angan ieu meda lahik abih. Gam haong nan, jak 45% janih phun hu bingu jeng mbuan lahik abih but./.