Pho Akok negar Võ Thị Ánh Xuân, harei kabroi hu mbaok di Harei Jum pataom taong abih bangsa haong bhap bini palei Bà Chăng A, xã Châu Thới, huyện Vĩnh Lợi, tỉnh Bạc Liêu. Brei panuac di harei pataom, Akok negar caong khin mikva patui bruk paglong jalan sahaneng jum pataom yam tapa kan kandah, pataom tame ngak mbang patagok kinh tế, klak rabha, daong gauk dalam raidiuk; patagok ilamu siam gheih meng kan saong prein khang jum pataom taong abih bangsa, dak padang labik bhap bini dak harei dak kaya meda, ilamu hadah krah, salih birau. Tapa nan, Pho akaok negar Võ Thị Ánh Xuân alin 16 baoh sang Jum pataom daong ka baoh sang kan kathaot di tỉnh Bạc Liêu; alin 200 trieu dong brei Kadung jien daong uranaih tỉnh Bạc Liêu, alin pandap ka Mban Công tác Mặt trận palei Bà Chăng A.

Dah page ini, Miuyim tỉnh Bình Thuận saong UBND xã Phan Hòa, huyện Bắc Bình hu tamat Tal pato puac Ariya ka mikva bangsa Cam, hadei di 9 harei pato saong bac. Tal bac hu 27 urang bac, kayua dom nghệ nhân saong urang thau cambaih ka ilamo puac Ariya di urang Cam daok di dua huyện Bắc Bình saong Hàm Thuận Bắc pato veik. Dom urang bac hu nao pasang iek di ban sit Lạc Tánh, huyện Tánh Linh piah duah thau ka ilamo ini hu pato veik dalam raidiuk di mikva Cam. Ariya di urang Cam biak rilo janih saong hu rilo asal kadha karei di gauk. Ini lac kadha văn chương Cam brei mboh tapa kadha ariya, tráng ca, sử thi, gia huấn ca... Ariya daok lac kadung ilamo biak quý hiếm ndung bak rilo asal kadha ka bruk roh duah sajarah, akhan vak panuac ndem, ilamo, agama, adat cambat, pato magru di mikva urang Cam. Tapa nan rik tame bruk pasiam veik, khik ramik saong patagok dom yaom glaong ilamo meng kan siam gheih di mikva bangsa takik saong rik tame bruk cak rok patagok du lịch di bhum palei.

Jeng di tỉnh Bình Thuận, harei kabroi, Muyim tỉnh pambuak haong UB bhap bini xã Đông Giang, huyện Hàm Thuận Bắc peih tal pato ilamu daoh tamia ragu ragam bhap bini di urang K’ho. Dalam 10 harei tal bac peih tabiak, dom nghe nhan tacei pato 20 urang bac dom ilamu daoh ragu daoh bhap bini, dom kadha tamia saong ma-in dom janih alat ragam meng kan yau: kèn bầu, lục lạc, kong chieng, hagal… Bruk khik ramik saong patagok  dom janih ilamu  di bhap bini bangsa K’ho oh lac ngak brei kaya meda jang ilamu bhap bini, rik daong paglong ilamu ngak tui ialmu meng kan di bhap bini, pabak bruk ngak adat cambat di bhap bini bo daok rik tame yaih khan bhum taneh saong anek manuac Binh Thuan tal ayut sahabat saong tuai dulich.  

Mintri Ilamo - Thể Thao saong Du lịch hu brei ba Bruk ngak hadang thu di tỉnh Cà Mau tame angan Inem krung ilamo oh maong mboh pakat negar. Tui panuac khan di rahra Cà Mau, meng kan, kaya tasik pak ini hu biak rilo, urang taong mek hadang mai mbang oh abih nan ye tuk tagok blaoh bluh thu, piah mbang suai. Thun 2021, “Hadang thu Cà Mau” hu tame tốp 100 angan je piah alin pandap Việt Nam. Tỉnh Cà Mau, urak ini hu 280 ribau ha taneh raong hadang. Bruk ngak hadang thu hu cak rok patagok di dom huyện hu prein khang raong hadang mala halui glai yau ye: Ngọc Hiển, Năm Căn. Hadang thu hu pandar dalam sang, abih di nyu nan lac, pabak dalam tuk Tết Nguyên Đán. Langiu di bruk ngak hadang thu, tỉnh Cà Mau daok hu bruk ngak “Gác kèo ia hani danko” saong “ngak ba khía” lac bruk ngak meng kan hu pok brei angan lac Inem krung ilamo oh maong mboh pakat negar.

Piah pamong tal bruk patrun kan kathaot khang kajap, patagok kinh te- xa hoi bhum urang bangsa takik saong dak padang palei pala birau, Jabat LĐTB saong XH ban sit Tịnh Biên, tỉnh An Giang hu duah labik daong bruk ngak ka urang kumei bangsa Khmer  dalam palei, daong adei sa-ai hu bac bruk ngak saong duah hu bruk ngak. Ban sit Tịnh Biên hu peih 11 tal pato bruk ngak ka 330 urang bac bruk ngak nong saong langiu bruk ngak nong. Ralo, adei sa-ai  kumei lac urang bangsa Khmer hu mbaok tame dom tal bac jhik , tacei pato duah bruk ngak tani tanat ka  baoh sang. Gam haong bruk patao pakai bruk ngak, duah bruk ngak  ka urang kumei Khmer hu karja palei sangka. Dalam mbang giao dich bruk ngak meng blaoh, rilo urang kumei lac bangsa Khmer duah hu bruk ngak, tani tanat raidiuk.

Tổng thống Mỹ Joe Biden harei kabroi hu mbang ginum biai haong Tổng thống Indonesia Joko Widodo di Nhà Trắng. Tapa nan,, dua taneh ia hu paglaong talei pambuak gauk tagok jeng Pambuak bruk praong abih gah. Brei panuac dahlau di tuk tame ginum biai, Tổng thống Joe Biden brei thau lac bruk paglaong talei pambuak gauk di dua taneh ia di taong abih gah dalam nan hu gam bruk paglaong pambuak gauk dalam gah an ninh, abih di nyu nan lac an ninh gah hàng hải jang yau padang sa chuỗi pabak salamat, khang kajap pambuak gauk dalam bruk pacang caga haong sarau kadau bruk langik tasik. Di gah drei, Tổng thống Widodo ndem lac Mỹ lac sa dalam dom gah pambuak bruk hu makna di abih pak Indonesia saong bruk pambuak gauk di gah kinh tế lac bruk njauk brei ngak dahlau di abih, dalam nan hu dom bruk pambuak tal chuỗi pabak.

Dom urang ilamu Mỹ daok peih bruk roh duah dom bruk ngak jhak tal alam moi truong ia ala dom blah pin ia harei. Nyaom roh duah di Đại học Cornell di bang New York, Mỹ brei palao ndon jaik 400 blah pin ia harei  di 3 danao di Labik thí nghiệm Cornell, jaij mblang kapal haok Ithaca. Ini hu maong lac tukvak camereip  di danak dak roh duah he sinh thai nang luong tai tao – sa roh duah  ka bruk patagok nang luong tái tạo,  hệ sinh thái saong anek manuac. Tuk camereip dom urang roh duah caong khin  duah thau  cambaic laic jang ka  bruk pambuak tal sinh thái di bruk peih ngak nang luong ia harei angaok mbaok ia di Mỹ. Danak dak ini meda patak pataom hu 5 trieu hecta taneh saong pabak hu 10% bruk pandar điện di Mỹ.

Rilo urang roh duah ilamo di Bangladesh daok buh tabiak rilo vaktu piah roh duah ka jamaok, ngan haong hatai caong meda duah tabiak jalan langyah lagaih piah daong pacang caga jit ruak pandiak tabiak darah biak trak damak abih meng nan mai daok tamuh tabiak di negar ini. Jaik 1.500 urang metai kayua ruak pandiak tabiak darah di Bangladesh dalam thun ini, glaong jang 5 mbang dut saong thun dahlau. Dom sang iek ruak daok glaih glar haong bruk dom urang ruak dak harei dak tagok rilo. Tui dom urang roh duah ilamo brei thau lac urak ini ka oh hu vắc xin atau jru taong ruak lagaih piah taong ruak pandiak tabiak darah, min bruk duah mboh avar jang saong sangka iek glang y tế lagaih meda ngak trun manieng bruk metai lahik trun daok mala 1% dom urang njauk ruak./.