Page ini, Quoc hoi brei tapa Hukum Căn cước ngan haong 431 urang lambaok vakil brei yer tangin njauk hatai. Hukum Căn cước hu 7 danak dak, 46 paka, brei ba tabiak ngak tui meng harei 1/7/2024. Dalam nan njauk caik hatai lac bruk brei pandar angan iew “ thẻ căn cước” salih ka “ thẻ căn cước công dân”. Khaw tin hu in tagok thẻ căn cước oh hu akhar huroh “ palei” saong “inem tangin”. Bruk salih birau nan piah ba mbuan lagaih jang ka bhap bini dalam bruk pandar căn cước; dom khaw tin căn cước di bhap bini meda hu khik piah, pandar, tapa chip dien tu angaok the căn cước…

Pho Thủ tướng Trần Hồng Hà bahrau mbaoh tangin brei tapa bruk quy hoạch tỉnh Ninh Thuận vaktu 2021-2030, pamaong tal thun 2050. Tui nan, quy hoạch tỉnh Ninh Thuận vaktu 2021-2030, pamaong tal thun 2050 hu asal kadha lac cak rok patagok samar pambuak gam bruk duah jalan salih bahrau, pandar ilamo kong nghe, cak rok patagok gah kinh te so, kinh te hijao, kinh tế tuần hoàn, kinh tế carbon pamaong tal bruk ba tathuak nerak mai tak tanut zero. Pamaong tal jalan cak rok patagok Ninh Thuận - "bhum taneh pataom rilo dom prein khang, kein lagaih biak karei” meda jeng lac tinh cak rok patagok parilo gah, samar saong khang kajap, gah kinh te parilo janih. Kinh te tasik rik tame labaih 55% abih tih dom pandap panda dalam taneh ia.

Di dom tỉnh gah Meraong negar, ruak jalan suan yawa di uranaih daok rah tabiak sraw kadau. Di dom sang iek ruak Nhi dong di Ban raya HCM hu mboh dom mbang urang ruak kayua viem phe quan, viem phoi, viem tieu phe quan, nhiem trung jalan suan yawa… daok tagok rilo. Yaok harei, dom sang iek ruak uranaih hu taduan tame, daok veik piah jru ruak meng 200 - 280 uranaih njom ruak jalan suan yawa mai meng dom tỉnh, ban karei. Anak bruk nan, Sở Y tế Ban raya HCM kakei langiu bruk klauk jru caga ginup tukvak, bhap bini njuak brei kaluk jru vaccine kum, phe cau ka uranaih meyah hu jien. Uranaih hu ruak dahau njauk brei tui iek, jru ruak piah trun takik jeng ruak trak tuk ruak viem jalan suan yawa.

Dalam danak dak dom bruk ngak Adit “Jumpataom gauk dom bangsa – inem krung ilamo Việt Nam” thun 2023, di Palei Ilamo - Du lịch dom bangsa Việt Nam (pak Sơn Tây, Hà Nội) hu peih tabiak danak dak Harei pataom gauk ba drei tame ilamo dom bangsa. Dalam nan, harei pataom ba drei tame ilamo dom bangsa Tây Nam Bộ hu peih tabiak di labik palei bangsa Khmer. Di pak ini, mikva Khmer hu parang iek dom kadha tamia ndung bak ilamo siam gheih di bangsa drei yau ye kadha tamia Rô băm, Lăm leo, tamia Khỉ... dom kadha tamia biak bui sambai, chreih chrai, brei mboh bruk siam gheih, chreih chrai di tangin, takai tui yaok kadha alak ragam.

Di tỉnh Tiền Giang daok peih Le hoi Ilamu – Dulich palei meng kan Đông Hòa Hiệp thun 2023 di xã Đông Hòa Hiệp, huyện Cái Bè. Ini lac bruk ngak ilamu hu karja palei khik ngak tui piah pachreih tuai damuai mai rivang iek, muyim dom ilamu siam gheih di bhum kraong ia Cái Bè. Palei meng kan Đông Hòa Hiệp, di huyện Cái Bè urak ini hu 7 baoh sang umo meng 150 - 220 thun saong 29 baoh sang umo meng 80 - 100 thun. Ini lac sa dalam 3 palei meng kan di Viet Nam hu Tổng cục Dulich negar Viet Nam saong Gah Pambuak dunya Nhật Bản pilih ruah piah buh jien tame patagok bruk dulich palei pala.

Meng harei 1-12 anak tal, Malaysia meda pandar bruk miễn thị thực tame negar dalam 30 harei ka tuai mai meng Trung Quốc saong Ấn Độ, hadei di tuk pandar blaoh sarak ini ka dom taneh ia Trung Đông, Thổ Nhĩ Kỳ, Jordan. Bruk ngak ini di Malaysia tui jalan ba tabiak lac piah dui pachreih 25 trieu tuai negar langiu. Dahlau di nan, Trung Quốc jeng pathau khan meda lac brei ka rahra di 6 taneh ia dalam nan hu Malaysia tame negar ini bo oh njauk thị thực. Gam tui di nan jeng meda brei ka tuai du lịch, doanh nhân saong dom baoh sang meng dom taneh ia nan daok veik Trung Quốc miễn thị thực rilo abih lac 15 harei.

Tame akok bilan lakhah yaok thun hu peih tabiak grauk bhum palei di negar Ấn Độ, taneh ia danei angan hu dom adat lakhah biak praong, rilo jien ndo. Dalam bilan lakhah meng harei 14/11 tal harei 14/12, hu labaih 3,2 trieu ndam lakhah hu dui blaoh, daok ngak saong meda peih tabiak anak tal dalam praong prang di grauk taneh ia. Jien ngak lakhah kuhria mboh dahlau labaih 3.750 tỷ Rupee (45 tỷ USD) buh tabiak blei pandap piah caga ndam lakhah saong dom bruk duh ka ndam lakhah. Thun blaoh, labaih 2,5 trieu ndam lakhah peih ngak dalam bilan lakhah saong abih labaih 36 tỷ dola Mỹ.

Hãng Thông tấn negar Somalia (SONNA) brei thau lac, dom urang metai kayua bala hajan ia sua di negar ini tagok tal 96 urang, ngak ka labaih 700.000 urang njauk panduan ba nao daok di labik karei. Somalia hu gaok dom mbang hajan khang oh padeih meng bilan 10 kayua gaok kan kandah di bruk El Nino saong Lưỡng cực Ấn Độ Dương ngak tabiak. Di negar jaik taphia Kenya, hajan ia sua jeng ngak ka 76 urang metai./.