Bier harei kabroi, mala bruk pan akaok di Akaok Quốc hội Vương Đình Huệ, Ủy ban Thường vụ Quốc hội (TVQH) hu peih mbang nyaom brei panuac ka bruk langyah, taduan mek, ramik ngak pasiam Danak dak Hukum kaya ia (pasiam veik). Ủy ban TVQH caong hu dom jalan langyah piah ngak pasiam veik dom halau ia daok thu lagu, tachrauk nerak; njauk hu jalan ngak ka kaya ia, jien pabak quyen peih ngak kaya ia pabak ka bruk ngak nong; hiện đại hóa, chuyên nghiệp hóa bruk khik ramik kaya ia... Langyah di mbang nyaom, Akaok mintri Tài nguyên saong Môi trường Đặng Quốc Khánh brei thau lac: oh peih bruk mek jien phí thủy lợi ngan haong rahra ngak nong. Bruk mek jien thủy lợi ngan haong doanh nghiệp ngak nong jeng njauk peih ngak tui jalan saong meda roh duah ka bruk peih praong kapul mek jien.

Harei kabroi, Phó Thủ tướng Trần Hồng Hà pan akaok Nyaom biai Kapul pakat negar pato megru saong patagok menuac ngak gah jalan pakacah, pilih ruah brei tamat pakat bac THPT meng thun 2025. Rilo urang dalam kapul ndom lac, pilih jalan ngak pacap urang pakacah môn Ngữ văn, Toán saong 2 môn pilih ruah tui hatai dalam dom môn daok veik hu bac di tal bac 12 lac lagaih. Brei panuac tamat mbang nyaom, Phó Thủ tướng Trần Hồng Hà ndom lac bruk peih pakacah, pilih ruah brei tamat pakat bac THPT meng thun 2025 brei mbuan, lagaih, hu ilamu, njauk bruk ba tabiak, hu kein laba, piah taong yaom njauk prein bac, bruk bac ta-a di anek saih, bac hagait pakacah nan. Phó Thủ tướng kakei Mintri Pato Megru lac, jalan ngak halei jeng brei hu ngak yau gauk. 

Sở Padang ngak TP.HCM bahrau hu pathau khan payua UBND ban raya ka pasang iek bruk salamat pacang khuah padam khuah saong daong duah urang njauk bala ngan haong labik ngak mbang gah brei pah sang trọ, sang pacang bilik brei pah, chung cư mi ni, sang pataom rilo manuac, chung cư klak di dalam ban. Tapa yaok pataom hu 58 danak dak ngan haong abih tih dom bilik, manieng brei pah lac jaik 2.200 labik ndih (9 danak dak oh pasang iek hu kayua po sang kareik pambang). Sở Padang ngak maong mboh janih “kadung pa-aop ndih” di TP. HCM hu dom urang pataom tame biak rilo dalam sa labik sit, oh khik hu bruk pacang khuah, padam khuah, mbuan hu bala, mbuan metai lahik tuk hu bala, nduac tabiak truh labik bala.

Pasak pasang iek ruak kik tỉnh Đắk Lắk brei thau, di huyện Ea Súp bahrau hu gac sa uranaih umo 2 thun metai kayua ruak tangin takai cambuai. Ini lac uranaih ka 2 metai kayua ruak ini kuhria meng akaok thun tal ini di dalam huyen. Uranaih ruak metai lac L.V.T.E (likei, ndih tapui thun 2021, daok di xã Ia Lốp, huyện Ea Súp). Kuhria tal harei 13/11, tỉnh Đắk Lắk hu jaik 2.000 urang njauk ruak tangin takai cambuai. Dalam nan ban Buôn Ma Thuột, dom  huyện Krông Pắk, Cư M’gar, Buôn Hồ… hu menuac ruak rilo. 

Hadei di tukvak samar drah padang ngak, tal urak ini danak dak padang ngak ar pacang labik Vàm Kỳ Hôn di xã Xuân Đông, huyện Chợ Gạo, tỉnh Tiền Giang hu ngak salah. Ini lac danak dak pacang caga bruk glut jaleih, daong khik sang danaok, taneh riya di rahra, hu ngak saong yaom jien abih jaik 36 tỷ đồng. ar pacang nan atah 530 mét, glaong 2,7m. dahlau deih, bhum ini njauk glut jaleih biak trak damak kayua riyak khang, hangin khang saong radaih nao mai di pak ini biak parilo. Yaok thun, di pak ini hu labaih 0,3 ha taneh bein njauk jaleih trun kraong, rilo baoh sang di rahra oh hu salamat. Urak ini, di bhum ini daok sa gah ar jalan tapen kraong Tiền atah labaih dom rituh mét jeng daok njauk glut jaleih biak trak damak daok caong hu padang ngak ar pacang piah daong khik salamat ka rahra.

Tổng thống Mỹ Joe Biden saong Chủ tịch Trung Quốc Tập Cận Bình harei ini (15/11) hu mbang taom gaok gauk di gah langiu mbang nyaom pakat glaong abih APEC di San Francisco, Mỹ. Ini meda lac mbang taom gaok tapak camereip abih di Tổng thống Joe Biden saong Chủ tịch Tập Cận Bình kuhria meng mbang taom gaok di Ba-li, Indonesia thun blaoh gah langiu mbang nyaom pakat glaong abih G20. Nhà Trắng brei thau, dua gah meda ginum biai bruk patagok talei taom gaok nao mai saong khik ramik bruk meriak gauk dalam mbang taom gaok ini. Tui Cố vấn an ninh negar Mỹ Jake Sullivan, Tổng thống Joe Biden saong Chủ tịch Tập Cận Bình meda ginum biai dom kadha praong abih di talei pambuak bruk 2 gah Mỹ - Trung, dalam nan hu bruk patui jalan patagok talei taom gaok ndom biai nao mai saong khik ramik bruk meriak gauk piah oh ngak brei bruk meriak gauk jeng bruk mesruh gauk. Ong Sullivan jeng ndom lac bruk  ngoại giao lac kadha praong, tapa nan plaih hu dom bruk sahneng oh njauk ka gauk. 

Rajaei Nê-pan harei kabroi hu ba tabiak harak pakauk pandar ứng dụng TikTok di dalam taneh ia ini. Di gah hành chính, adat pakauk ini hu brei pandar chip. Min, di gah kỹ thuật, Nê-pan meda njauk caong hu veik tukvak piah pacang cakak haong ứng dụng parabha video katut di TikTok. Akaok Mintri Khau tin saong truyen thong Nê-pan Rekha Sharma brei thau lac, negar ini ba tabiak harak pakauk TikTok hadei di tuk dom asal kadha hu parabha tagok ứng dụng ini “ngak tabiak bruk klaih klaoh di dalam bruk pambuak gauk di rahra saong dom talei pambuak gauk karei karei”. Meng bruk ngak ini, Nê-pan jeng taneh ia bahrau abih pakauk TikTok - ứng dụng hu pacang cakak di labaih 50 taneh ia di dunya.

8# Darak Giáng sinh di Kraków, Ba Lan hu pilih ruah lac darak Giáng sinh siam abih di Châu Âu dalam thun ini. Dua ban karei di Ba Lan lac Wrocław saong Poznań, jeng hu mbaok dalam top 10, ngak ka Ba Lan jeng taneh ia duy nhất hu 3 ban dang dalam 10 bảng xếp hạng mbang ini. Ban ine Tallinn di Estonia dang ka 2, daok Budapest di Hungary dang ka 3. Bảng xếp hạng hu pilih ruah tui dom kadha lac iek tui bruk di darak pasar, tui pilih ruah di urang mangaok Instagram saong TikTok, tui mbang duah angaok Google saong tui yaom bilik padeih padei di pak nan./.