Hu mbaok tuk peih bruk brei thau quy hoạch tỉnh Bình Thuận tukvak 2021-2030, pamaong tal thun 2050 hu peih tabiak di dah page ini, Phó Thủ tướng Trần Hồng Hà ndem lac, Quy hoạch tỉnh hu batabiak khan brei thau lac bruk peih mbaok ndung bak jalan kuhria ngak ka bruk cak rok patagok dalam bruk pambuak gauk di dom tinh dalam dom bhum sit Duyên hải Nam Trung Bộ, bhum Bắc Trung Bộ saong bhum Duyên hải miền Trung jang yau dom tinh, ban di Đông Nam Bộ saong Tây Nguyên. Thun 2023, GRDP di Bình Thuận tagok 8,1%, dang ka 14/63 tỉnh, ban dalam taneh ia.

Biar harei kabroi, di jabat Rajaei, Phó Thủ tướng Trần Lưu Quang hu taduan raok kapul urang lambaok dom halau janeng, dom urang pan bruk agama bhum urang Cam tỉnh Ninh Thuận. Tapa nan, Phó Thủ tướng ndom lac, urang Cam di Ninh Thuận lac sa binah oh neh tabiak hu di bruk jum pataom bangsa, rik daong praong ngak jeng bruk hu rilo ilamu di bhap bini dom bangsa Việt Nam. Phó Thủ tướng caong khin dom urang dalam kapul, meng bruk ngak saong angan je di drei, patui bruk jak ba dom halau janeng, dom urang pan bruk agama, dom menuac tui agama, ngak siam dom sarak di Đảng, hukum di Karja.

UBND TPHCM bahrau patabiak jalan pasang iek dom baoh sang kathaot, sang jaik sia kathaot di dalam ban raya. Tui jalan ngak ini piah pabak bahrau dom baoh sang tui kuhria lac sang kathaot, sang jaik sia kathaot tui tanut chuan rilo gah pakat negar saong tanut chuan kathaot rilo gah dalam TPHCM, plaih nyaih bruk klaak tapa dom sang kathaot tui danak dak patrun kan kathaot khang kajap di dalam ban saong peih ngak dom sarak, jalan langyah patrun kan kathaot, sangka siam makre ka rahra. UBND TPHCM ieu kakei bruk pasang iek njauk hu peih ngak tantu cambaih laih, njauk tui adat, njauk urang, plaih bruk ba kein laba mai ka drei.

Di rilo labik tapen tasik di tỉnh Sóc Trăng, yaom lac hu caga dahlau bruk ia mbak njom tame min rilo labik bhap bini jeng daok ngak tui hatai, trun pajaih padai Đông Xuân muộn di bhum mbuan njauk ia mbak njom tame, ngak ka bruk khik caga  siam mekre ka pala drak gaok rilo kan kandah. Pagap yau di huyện Long Phú hu jaik 6 rabau ha padai Đông Xuân muộn hu trun pajaih, tagok rilo jang jaik 2 rabau ha duk haong thun blaoh. Urak ini daok labaih 2 bilan meng tamat bilan pala ngak, dalam tuk ia mbak daok njaom tame dalam, nan ye mbuan ba tal khat lahik biak praong.

Sở Y tế tỉnh Cà Mau bahrau khan brei thau ka sa urang ruak daok di xã Định Bình, ban Cà Mau medil lac ruak đậu mùa khỉ. Urang ruak daok hu taong ruak ngoại trú di Sang iek ruak kalik Cần Thơ saong daok cang bruk dut iek di Viện Pasteur TP.HCM. Urang ruak hu mboh dom ruak lac pandik labik lakei saong hu mun ia hu laneh nan ye nao iek ruak saong taong ruak di bilik iek ruak đa khoa tư nhân. Urak ini Sở Y tế Cà Mau hu pasang iek y te ngan haong 5 urang gauk gar di urang ruak, gam tui di nan jeng hu jalan pato tacei langyah ngak hacih dom pandap panda di urang ruak tal tuk halei hu bruk dut iek ruak oh mboh njauk hagait.

Thun 2023, bruk ndih tapui anek di Hàn Quốc, trun tal tanut biar di abih ka oh bhian mboh, yaom lac Rajaei taneh ia ini hu buh tabiak yaok tỷ đôla piah pasiam veik bruk ini. Thun 2023, tanut kuhria rah tapa di sa urang kumei ndih tapui anek dalam luac rai trun daok 0,72 duk haong 0,78 di thun 2022. Rajaei Hàn Quốc daok caong ngak brei tagok veik bruk ndih tapui anek saong hu sanya ba tabiak dom jalan ngak praong piah langyah bruk nan di puac thun ini. Dom đảng chính trị praong di Hàn Quốc dahlau di tuk bầu cử thun ini, jeng hu sanya brei ngak rilo jang dom sang daok công cộng saong pacadu bruk brei mesraiy piah pacang cakak bruk patrun manuac sia.

Rahra di rilo labik pak ban ine Jakarta-Indonesia daok dang patui gauk jeng talei atah piah blei brah di rajaei daong pabak, dalam tuk mbang pandiak bhang khang di thun blaoh ngak patakik bruk pala drak saong ngak ka brah tagok yaom biak glaong di grauk labik dalam taneh ia. Dom labik darak hu daong trun yaom kayua Jabat pataom blei pandap mbang di Indonesia padang ngak, hu parabha labaih 300.000 tấn brah meng bilan 1 tal urak ini. Jabat pataom blei pandap mbang hu jalan padang ngak veik yaok ratuh darak karei piah daong brah. Indonesia lac taneh ia blei brah tame glaong abih meng di thun 2023, hu parabha hạn ngạch pabak 1,6 triệu tấn.

Peru hu tabiak panuac ka bruk samar drah gah y tế kayua pandiak tabiak darah dak harei dak tagok khang. Tui Mintri Y tế Peru, dom menuac njauk ruak pandiak tabiak darah meng akaok thun ini glaong jang 2 mbang duk haong tukvak ini thun 2023, lac labaih 31.000 urang njaom ruak. Bruk samar drah gah y tế hu brei adat ka rajaei payua jien samar drah jang tal dom labik njauk ruak saong hu brei ba bác sĩ saong y tá nao tal dom labik nan. Dom labik njauk kan kandah meng jit ruak pandiak tabiak darah lac 20 dalam 24 tỉnh di taneh ia ini./.