Patui veik danak dak mbang nyaom ka 6, harei ini, dom urang Quốc hội ginum biai ka bruk kinh tế-xã hội thun 2023-2024 saong taong yaom kreih vaktu peih ngak jalan cak rok patagok kinh tế-xã hội thun 2021-2025. Ginum biai ka bruk taong yaom chất lượng tapuk siphau, akaok Mintri pato magru ong Nguyễn Kim Sơn brei thau lac, meng urak ini tal thun 2024, bruk hu makna njauk ngak di abih lac taong yaom chất lượng dom tapuk siphau tal 5, tal 9, tal 12 ka biak siam, tani tanat ginup tapuk siphau dahlau di thun bac bahrau. Mintri meda taong yaom taong abih gah, siam makte ka bruk ini saong meda ba tabiak jalan langyah haong Quốc hội.

 Akaok UBND tỉnh Đồng Nai bahrau hu harak payua Thủ tướng Rajaei likau jao ka UBND tỉnh Đồng Nai ngak jabat Karja hu quyền peih ngak bruk đầu tư danak dak mblang kapal haoh Biên Hòa. UBND tỉnh Đồng Nai mboh lac, bruk samar ba mblang kapal haok quân sự Biên Hòa tame ngak bruk, hu daong peih tabiak jalan lagaih piah cakrok kinh tế - xã hội ka Đồng Nai. Ong Phạm Ngọc Sáu, urang ilamu gah jalan kapal haok, taong yaom mblang kapal haok Long Thành rilo meng lac par dunya. Nan ye mblang kapal haok Biên Hòa lac pilih ruah njauk piah ba tame pandar, hu daong patrun bruk bak katin tuai par dalam taneh ia ka mblang kapal haok Tân Sơn Nhất.          

Dah page ini (1/11), di Sang ilamo puk Bình Đức, xã Phan Hiệp, huyện Bắc Bình,  Miuyim tỉnh Bình Thuận pambuak haong UBND xã Phan Hiệp peih "Tal pato ilamo ngak lan am meng kan di urang Cam". Di tal bac, dom urang bac hu pato gam ilamo gam pato pasram pambuak tal jalan ngak, ilamo ngak lan meng kan di ong amuk pato veik. Tal bac jeng peih ngak cambaih laih Danak dak “Khik ramik saong patagok dom yaom glaong ilamo meng kan siam gheih di bangsa takik pambuak haong bruk cak rok patagok du lịch” di Mintri Ilamo, Thể thao saong Du lịch di Danak dak bruk ngak negar cak rok patagok kinh tế - xã hội bhum mikva bangsa takik saong bhum ceik thun 2023.

UBMT negar Việt Nam tỉnh Ninh Thuận bahrau padang mban tacei jalan peih ngak danak dak padang ngak sang daok ka sang kan kathaot, jaik kathaot tukvak 2023-2025. Danak dak ba tabiak bruk lac khik daong ka 1.234 sang kathaot, jaik kathaot dalam tỉnh hu sang daok tani tanat. Tui danak dak, sang daok daong brei nan, praong takik di abih lac 32 m2, hu padang ngak njauk tui phê duyệt, khik kajap “3 khang” (nền khang, khung – daning khang saong tabung khang). Umo di dom baoh sang nan, lac meng 20 thun tagok saong brei hu jaman, sang vệ sinh. Yaom yaok baoh sang hu daong pandang ngak nan, takik di abih lac 100 triệu đồng.

Anak dom khau tin pathau khan di amaik ame ka chất lượng pandap mbang di dom labik pabak pandap mbang daok kreih pandiak, meng harei (1/11), ban Thủ Đức, Ban raya Hồ Chí Minh meda peih bruk pasang iek patuak dom labik pabak var mbang dalam sang bac, ghieng mbang pataom gauk, căn tin saong dịch vụ mbang manyum di dalam sang bac dalam ban. Asal kadha pasang iek gam chất lượng dinh dưỡng, paka hacih saat. Kapul pasang iek meda mek mau saong payua nao pasang iek, taong yaom. Bruk ini piah taong yaom bruk tani tanat ghieng mbang rilo manac saong samar drah langyah dom bruk ngak suan pambuak tal salamat pandap mbang.

 Harei ini (1/11), Trung Quốc peih bruk duah thau hatai sahneng di 1 triệu 400 rabau rahra ka biến động menuac sia, dalam tuk rilo sarak pachreih menek, pachreih ndih tapui anek hu ba tabiak kayua bruk ndih tapui saong menuac sia trun mbang camereip abih dalam 6 pluh thun tapa. Mbang bahrau abih jaik di ini, Trung Quốc peih bruk yaok pataom menuac sia pluh thun sa mbang di bilan 11/2020. Tapa nan brei mboh lac, taneh ia ini tagok suai damuai di abih kuhria meng mbang yaok pataom menuac sia di dom thun 1950. Makna lac kayua bruk ndih tapui trun daok takik saong rahra dak harei dak huac dom kan kandah dalam bruk raong pato anek bhik. 

Mintri Quốc phòng Mỹ brei thau lac, Washington meda patui veik pasang iek jalan hu pathau khan blaoh di Triều Tiên ka kham marat peih bruk cuh vệ tinh quân sự mbang ka 3. Dahlau di nan, Triều Tiên hu khan lac negar ini meda kham marat mbang ka 3 piah ba sa vệ tinh quân sự cuh tagok quỹ đạo dalam bilan 10, hadei di 2 mbang cuh ka oh jeng. Min, dalam bilan 10, Triều Tiên oh peih bruk cuh halei. Urang pan akaok negar Triều Tiên  Kim Jong-un rilo mbang brei thau lac, bruk cuh vệ tinh pasang iek quân sự lac jalan ngak cambaih laih dalam bruk cak rok patagok gah quân sự không gian, ilamo saong công nghệ di Triều Tiên.

Taong Yam ndok Gah Pablei salih dunya (WTO) Ngozi Okonjo-Iweala duh hatai ka bruk mesruh gauk Israel - Hamas dak harei dak khang tagok saong ngak kan kandah tal bruk patagok di dunya meyah bruk mesruh gauk pambak praong tabiak bhum Trung Đông. Tui WTO, bruk kinh tế ka thun 2024 jeng daok mboh hu siam lagaih, haong tanut patagok tui kuhria mboh lac 3,3%, "min rủi ro tanut patagok ini trun nao lac biak praong".