Page ini, hadei pang panuac di Tong LĐLĐ Viet Nam saong Lien doan Pablei salih saong Kong nghiep, Hoi ndong Jien bilan pakat negar brei buh phieu hu 16 dalam taong abih 16 phieu njauk hatai brei tapa bruk patagok jien bilan biar abih di bhum lac 6% meng harei 1/7/2024 saong luac thun 2025. Tui nan, jien bilan biar abih meda hu pandar yaok bhum hu tagok meng 200 -250 ribau đồng, yau ye: Bhum I lac 4,96 trieu dong sa bilan; Bhum II tagok 4,41 trieu dong sa bilan; Bhum III tagok 3,86 trieu dong sa bilan; Bhum IV tagok tal 3, 45 trieu dong sa bilan.

Rilo Cty, doanh nghiep di dom tinh, ban gah Maraong negar hu pathau khan jalan ngak sangka Tết Nguyên đán 2024, piah ba kein lagaih ka urang ngak sahanang hatai ngak bruk saong rami ramik tukvak padeih Tết lagaih. Tui urang lambaok Công đoàn cơ sở Công ty TNHH Apparel Far Eastern Việt Nam di ban Thuận An, tỉnh Bình Dương, công ty hu labaih 4.300 urang ngak, tanut thuong tet thun ini yaok urang ngak hu mbang jien bilan ka 13 lac 9 triệu đồng sa urang. Abih di nyu nan lac, urang ngak bruk meng 15 thun tagok meda taduan hu sa paok pandap alin lac 1 chỉ ameh, harak thu thau dhar phol saong bingu.

Mentri Pato megru birau patabiak Harak Thong tu ka bruk pato bac saong bac sap Viet ka anek saih bangsa takik dahlau di tuk tame tal bac Sa. Tui nan, uranaih jaik tame tal bac Sa saong ginup umo thun tame bac tal Sa hu tame bac Tieu hoc piah bac pang, ndem meyai, bac, cih vak akhar huroh…Mentri Pato megru caong khin dom sang bac brei hu gru pato naih joi, hu ilamu hadah krah, khang kajap, thau akhar bangsa saong thau ilamu di bhum palei di uranaih piah pato bac sap Viet ka uranaih dahlau tuk tame tal bac Sa.

Meng akaok thun tal urak ini, Pasak Jit vu bruk ngak tỉnh Hậu Giang hu pabak brei phun jien daong tuk camriep bo oh njauk biyar gilac ka labaih 400 urang ngak nao ngak bruk di negar langiu. Piah ba kein lagaih ka urang ngak hu kein nao ngak bruk di negar langiu, tinh hu sarak daong phun jien tuk camriep ka yaok urang ngak meng 7 trieu 5 rituh ribau tal 15 trieu dong tui yaok urang. Dom paok daong hu kuhria tui phun jien anak mata, saong hu biyar sa mbang tuk tabiak nao ngak bruk di negar langiu.

Hadei tukvak kurang vaccine DPT-VGB-Hib (daok lac vaccine 5 dalam 1), anak tal, TPHCM meda hu Mentri Y te pabha brei 14.400 lieu jru. Hu dom vaccine nan, ban raya meda hu ginup jru pandar dalam vaktu meng 45 -60 harei. Yau dom vaccine daok kurang, Sở Y tế brei klauk jru dahlau ka uranaih ginup 2 bilan tagok hu klauk ginup 3 mbang vaccine DPT-VGB-Hib. Patui nan, lac uraniah labaih 12 bilan.

Gah Y tế dunya (WHO) hu parabha biến thể phụ JN.1 lac janih BA.2.86 di virus SARS-CoV-2 lac “biến thể biak caik hatai tal”, min brei thau lac, biến thể này ini oh ngak tabiak rilo kanjak jhak ka prein yava di rahra. Bruk ini hu WHO ba tabiak pamaong tame dom bruk rahtabiak blaoh, dom bruk kuhria tamuh tabiak ngak jhal tal prein yava di rahra kayua biến thể JN.1 ngak tabiak, urak ini hu taong yaom di tanut bier abih. WHO jeng brei thau lac dom janih vaccine urak ini jeng daok hu kein daong khik ka urang njauk ruak plaih njaih di dom kan kandah saong bruk metai lahik kayua JN.1 jang yau dom biến thể daok tamuh tabiak karei di virus SARS-CoV-2 ngak tabiak.

Kuhria mbiah tal ini urang metai kayua megei baoh taneh khang 6,2 độ di melam 18/12 di gah Tây Bắc Trung Quốc tagok tal 130 urang saong labaih 700 urang njauk rambuac. Gah urang jakar Trung Quốc hu mboh, hadei mbag megei baoh taneh hu veik 9 mbang megei tayun khang abih lac 4,1 độ richte. Hu takik di nyu lac 4.000 lin urang daong padam apui, binh linh saong cảnh sát hu ba tame ngak bruk kham daong duah urang gaok bala.

Dalam thun ini, Tổng cục Hải quan Indonesia hu pacang cakak saong pataom mek hu labaih 5,6 tấn ma túy di dom kol toi pham daok duah jalan tame negar ini. Tui Jabat chức năng Indonesia, dom kol toi pham, abih di nyu nan lac bhum labik Tam giác vàng (sa bhum jaik taphia 3 taneh ia Mianma, Lào saong Thái Lan) patui veik daok duah jalan pajeng ba ma tuy tame negar ini tapa dom jalan tasik saong jalan kapar haok.