Mintri Ngak nong saong patagok palei pala Việt Nam saong Tổng cục Hải quan Trung Quốc hu mbaoh tangin tame “Sarak thư ka bruk pasang iek thực vật ngan haong baoh tamekai that pablei tabiak meng Việt Nam tapa Trung Quốc". Tui nan, abih tih dom bhum pala, labik papaok tamekai pablei tapa Trung Quốc njauk tut angan saong hu Mintri Ngak nong saong patagok palei pala, Tổng cục Hải quan Trung Quốc pasang iek, brei tapa. Ini lac sa takai yam praong piah jhul tagok bruk pablei tabiak negar langiu tui jalan chính ngạch pandap panda kaya nong meng kan di Việt Nam saong ngak tui adat ka bruk pablei tabiak kaya nong di dua taneh ia.

Lac pasak raong glang di taneh ia, meng biak aval, Đồng Nai hu ba tabiak bruk patagok raong glang tui jalan công nghiệp bahrau. Dalam tỉnh hu 442 labik raong praong pandar var ro la-an, sre. Meng 2 janih raong praong lac pabui saong menuk, raong glang praong meblah tal 90%. Dalam nan oh kurang hu dom labik raong pandar công nghệ bahrau dang akaok di dunya. Dalam gah raong kaya ikan, tỉnh jeng patagok tui jalan công nghệ glaong. Anak tal, tỉnh Đồng Nai brei paglaong hatai sahneng di urang ngak nong ka patagok ngak nong tui ilamu công nghệ glaong. 

Dom taneh pala phun hijao công cộng di TP.HCM biar abih dalam dom đô thị di taneh ia, bahrau hu 0,55 m2 sa urang. Tui dom urang roh duah ilamo, yaok urang daok di đô thị caong hu mblang taneh praong 7m2 phun hijao sa urang piah tani tanat alam langik siam makre. Kayua yau nan ye, TP.HCM daok ba tabiak jalan ngak lac 10 trieu phun hijao dalam tukvak 2020 – 2025 piah pasiam veik bruk njamnerak tachrauk di ban raya.

Mban Tacei jalan 138 tỉnh Bà Rịa – Vũng Tàu bahrau peih bruk tabiak mbaok tabung glaong pagui mek kol tội phạm tukvak dahlau, dalam saong hadei Tết Nguyên đán thun sak inegirai 2024. Dalam nan dom gah pambuak gauk patagok pasang iek, langyah bruk ngak suan gah nồng độ cồn, radaih pajeng rilo menuac jang, rilo pandap jang adat brei pajeng. Gam haong nan, peih ngak siam bruk duah thau, ba tabiak kaoh tui hukum, samar ba tabiak kaoh duas dom bruk khang, bruk biak trak damak saong hu menuac sia caik hatai sangka.    

Công an Ban Rạch Giá, tỉnh Kiên Giang bahrau khởi tố bị can Nguyễn Tùng Lâm (palei daok di Ban ine Hà Nội, urak ini daok di Rạch Giá) ka bruk brei masaiy laba trak dalam bruk jao jit dân sự. Dahlau di nan, Công an ban Rạch Giá hu mboh Lâm brei masaiy laba glaong nan ye daa tagok ngak cambaih bruk. Tapa pasang iek, Lâm khan lac, meng bilan 8 tal bilan 11 meng blaoh, Lâm hu brei ka 5 urang di ban Rạch Giá masaiy 185 triệu đồng, biyar dalam 25 harei; laba brei masaiy lac 1% sa harei, samu haong laba 365% sa thun (glaong jang 18,25 mbang dut saong lala brei adat), mek laba jhak labaih 52 triệu đồng.

Sang bac Đại học Brawijaya di Indonesia hu cakrok ứng dụng hu angan ieu lac Peih radaih sahneng mboh 2 piah pacang caga bala di dom canah jalan pambuak haong jalan pasei. Ứng dụng ini meda nduac angaok bản đồ thaot binguk saong sap yava, hu caong lac pataom hu haong Google Maps piah padang sa hệ thống cảnh báo aval siam lagaih. Bruk puac di abih lac padang hu hệ thống brei thau aval abih hu siam lagaih. Indonesia urak ini hu 2.259 labik hu canah 4 jalan haong jalan pasei oh hu paga pacang atau oh hu menuac khik iek. Thun 2022, dom bala di dom labik canak jalan nan tagok tal 289 mbang. 

Mban peih bruk Olympic Paris 2024 brei thau lac, pandap mbang hu pabak meda hu 60% lac pandap chay dalam bruk kham marat trun tathuak nerak carbon. Dom janih pandap mbang hu dalam var mbang di dom vận động viên saong urang iek meda lac ahar bánh mì hu tai ngak meng lúa mì saong salad. Tui panuac di urang ngak pandap mbang di Thế vận hội brei thau, dom pandap mbang chay ini biak siam ka prein yava saong lagaih haong dom pandap mbang di dom vận động viên. Abih tih hu 13 trieu paok pandap mbang meda hu pabak dalam Thế vận hội Paris 2024.

Dom labik pablei pandap di ban New York, Mỹ, daok ba drei tame Noel meng bruk brei ramik ka nyu mekre dom pabah mbang tho gah langiu labik pablei piah dui pachreih tuai damuai. Sa labik pablei hu meng 150 thun ini mai daok brei ramik ngak tui jalan meng kan, pataom tame pok meyaom dom tangin gheih ngak. Dom cửa hàng Saks ye pambuak bruk haong hãng thời trang Dior padang sa labik parang iek biak praong biak gheih. Dom pabah mbang tho ini jeng ndung bak rup binguk di dom labik di New York saong Paris. Daok cửa hàng Macy's ye ta-a tuai daoh saong thaot di rilo pabah mbang tho karei di gauk./.