Sở Khau tin saong Brei thau TP.HCM bahrau tabiak mbaok saong peih ngak phần mềm Caik hatai pang mạng xã hội. Phần mềm lac pandar trí tuệ nhân tạo (AI) daong ka dom jabat khik ramik kanja di TP.HCM caga dahlau dalam bruk taduan saong thau cambaih jang ka panuac, hatai caong di rahra, doanh nghiệp. Phần mềm ini tabiak rai piah pataom mek khau tin samar drah, tui tukvak peih ngak hu rilo jang, ginup jang dom panuac di rahra ka dom bruk, yau ye ilamo, xa hoi, kinh te jang yau jalan ngak, sarak di urang pan akaok TP.HCM. Meng nan, ba jalan ka bruk hoạch định saong peih ngak sarak di dalam ban raya.

UBND tỉnh Đồng Nai hu tabiak harak jao taneh ka mBan Khik ramik danak dak padang ngak jalan mbak tỉnh Bình Dương di xã Bình Lợi, huyện Vĩnh Cửu piah pandar tame bruk ngak tatua tapa kraong Đồng Nai (ieu lac tatua Bạch Đằng 2), mbaok taneh praong jaik 10.000m2. Tatua Bạch Đằng 2 tapa kraong Đồng Nai hu peih tabiak ngak di jhung thun 2021 pambuak xã Bạch Đằng, ban sit Tân Uyên, tỉnh Bình Dương haong xã Bình Lợi, huyện Vĩnh Cửu, tỉnh Đồng Nai. Abih tih yaom jien buh tame ngak lac labaih 420 tỷ đồng meng kadung jien karja 2 tỉnh.  

Di tỉnh Hậu Giang, manaih Cầu Đúc hu urang blei salih mai blei yaom 11.000 đồng sa baoh manaih janih I. Yaom ini tagok 2.000 đồng sa baoh dut saong 10 harei dahlau. Urang ngak nong pala manaih brei thau lac, yaom lac yaom baoh manaih daok glaong min mikva hu biak takik baoh manaih piah pablei. Makna lac kayua urak ini daok tame bilan pandiak, phun manaih praong suai, brei takik baoh saong baoh bhian sit. Tỉnh Hậu Giang hu labaih 2.800ha taneh pala manaih, pajaih pala rilo abih lac janih baoh manaih Queen (manaih Cầu Đúc). Dalam nan, tui kuhria mblang taneh pala daok brei baoh lac jaik 2.400 ha, baoh manaih mek hu meng 20-30 tấn/ha.

Labaih 75% mbaok taneh pala durian di tỉnh Vĩnh Long oh ka hu brei mã số bhum pala pablei tapa negar langiu, ba tal bruk pablei tabiak gaok rilo kan kandah. Ong Nguyễn Ngọc Thanh – Phaok akaok Chi cục pala drak saong khik caga phun pala tỉnh Vĩnh Long brei thau, tukvak tapa, Chi cục hu pambuak bruk haong dom puk palei patagok bruk pathau khan, tacei pato, daong ka urang ngak nong ngak harak likau mã số bhum pala pablei tapa negar langiu. Tal urak ini, hu gac 24 bhum pala durian praong labaih 600ha daok cang negar blei pabak brei mã số.

Labik kraong Tiền daok tame mbang ia tagok bahrau, dalam mbang ia tagok ini, mbaok ia samu jaik saong bier jang tanut kakei 3. Piah plaih nyaih dom khat lahik kayua mbang ia tagok gam haong bruk njom ia mbak rahtabiak di dom bhum pala drak praong, Mban pato tacei pacang caga bala saong daong duah urang njauk bala tỉnh Tiền Giang kakei dom bhum palei, abih di nyu nan lac dom xa, phuong tapen kraong Tiền saong bhum labik anak binek Bảo Định di ban Mỹ Tho samar drah peih bruk pasang iek, ngak pasiam veik dom labik binek, takai kraong njauk khut, piah pacang caga ia tagok saong bruk njom ia mbak, khik siam makre ka bruk ngak mbang, pala drak saong raidiuk di rahra.

Thái Lan caong lac hu pambuak veik bruk ginum biai parabha bhum meriak gauk (OCA) di Vịnh Thái Lan haong gah Campuchia. Yaom lac asal kadha di bruk ginum biai oh hu khan brei thau, min Thủ tướng 2 taneh ia jeng ndom lac dom bruk ginum biai meda ba mai kein laba ka 2 taneh ia. Bhum meriak gauk di Vịnh Thái Lan di negar Thái Lan haong Campuchia praong tal 26.000 km2. Tập đoàn dầu khí Chervon di Mỹ taong yaom lac labik ini hu khí đốt tự nhiên yaom  labaih 96 tỷ USD  

Tổng thống Hàn Quốc Yoon Suk Yeol bahrau tabiak panuac lac daok tui bruk brei patagok dom sinh viên tame dom sang bac gah y piah pasiam veik jit vu sangka iek glang prein yava, yaom lac dom bac si daok jak gauk padeih ngak urak ini. Hàn Quốc daok gaok bruk sarau kadau di gah y te kayua dom bac si ranaih daok jak gauk padeih ngak. Labaih 9.000 bác sĩ ranaih, padeih ngak di adit dahlau ngan haong makna lac gah sangka iek glang prein yava oh kurang bac si saong rajaei njauk langyah dom bruk pambuak tal jien bilan saong pasiam labik ngak bruk.

Dom anek kamar hu menek tabiak di negar Japon trun thun ka 8 gam gam, trun tal tanut biar di abih di thun 2023, ngak kan kandah ka taneh ia ini dalam bruk kham merat pacang cakak bruk patrun menuac sia. Chánh văn phòng Nội các Japon Yoshimasa Hayashi brei thau, Rajaei taneh ia ini meda peih ngak "dom jalan ngak oh ka bhian mboh" piah pacang bruk takik menek, yau ye peih praong bruk iek glang uranaih saong jhul bruk tagok jien bilan ka urang ngak daok ranaih./.