Doanh nghiệp hu rilo urang ngak abih di TP.HCM lac Công ty TNHH PouYuen Việt Nam (di quận Bình Tân) bahrau brei thau yaom thưởng Tết ka urang ngak haong pok njien abih tih labaih 633 tỷ đồng. Dalam nan, yaom thuong kuhria rah tapa lac 17 triệu đồng sa urang, glaong abih lac 67 triệu đồng, bier abih lac labaih 5 triệu đồng. Công ty TNHH PouYuen Việt Nam di Tập đoàn pakat dunya Pouchen (Đài Loan, Trung Quốc), hu tukvak, Công ty ini hu jaik 100.000 urang ngak. Urak ini, abih tih urang ngak di PouYuen Việt Nam daok hu labaih 37.000 urang.

Sở LĐTB&XH tỉnh Bà Rịa – Vũng Tàu brei thau, dalam dom harei jhung thun ini, bruk brei ka urang ngak mboh hu siam lagaih. Rilo doanh nghiệp caong hu labaih 2.000 urang ngak. Kuhria tal jhung thun 2023, abih tih dom urang ngak brei padeih ngak bruk lac jaik 19.500 urang, samu 3% dom menuac ngak. Abih tih dom menuac ngak hu harak brei mbang jien daong oh hu bruk ngak lac jaik 16.800 urang, urak ini daok hu labaih 8.800 urang ngak daok hu mbang jien daong oh hu bruk ngak.

Jabat Tỉnh ủy Bình Thuận bahrau alin baoh sang anit ranam ka ong Mang Xí, sang kan kathaot di palei Tân Điền, xã Phan Điền, huyện Bắc Bình. Hadei di labaih 2 bilan padang ngak, baoh sang bahrau di sang ong Mang Xí hu ngak salah praong 50 m2, haong yaom jien abih tih lac 100 triệu đồng. Dalam nan, Công ty TNHH Xổ số kiến thiết tỉnh Bình Thuận hu daong 50 triệu đồng, daok gilac kayua sang ong rik tame saong masaiy jien Gilang paraik sarak kanja. Bruk jao brei saong ba tame daok baoh sang bahrau hu daong ka sang ong Mang Xí hu labik daok tani tanat, sahanang hatai ngak mbang, bui raok Tết Nguyên đán sak inegirai dalam baoh sang khang kajap, siam makre.

Dalam dom harei jhung thun ini, urang pala durian di huyện Cái Bè, tỉnh Tiền Giang daok biak chreih chrai kayua durian hu rilo baoh, pablei hu yaom. Di tukvak ini, urang ngak bein paik baoh durian Ri6 pablei hu yaom meng 100 rabau sa kg, durian Mongthon yaom 150 rabau sa kg. Meng yaom yau ini, urang ngak bein laba hu labaih 1 tỷ đồng sa ha saong biak chreih chrai bui sambai caga mbang Tết meng kan. Huyện Cái Bè daok tagok khang bruk pala durian, kuhria mboh hu labaih 9.000 ha bein, dalam nan hu 6.000 ha bein phun durian daok brei baoh. 

Dah page ini, baoh sang dalam hẻm 551 jalan Lê Văn Khương, phường Hiệp Thành, Quận 12, TPHCM njauk apui khuah, ngak ka 4 urang gar veik. Taduan hu panuac khan lac khuah, Kapul Cảnh sát PCCC - Công an Quận 12 ba 3 radaih padam khuah haong 23 urang jakar bol lin nao tal labik piah padam khuah saong duah dom urang gaok bala. Tal maong 3 dah page ini, apui padam hu abih. Gah chức năng duah mboh sa urang likei metai. Urang matai nan, lac saai Đào Thanh Phong (ndih tapui thun 1992). 2 urang praong thun saong 1 uranaih tabiak hu nduac tapa sang taphia di nan. Urak ini, khat lahik ka oh yaok pataom hu. Makna di bruk apui khuah daok hu jabat chức năng pasang iek, ngak cambaih laih.

Dom urang dalam rajaei Thái Lan njauk hatai pachreih tui dự luật angan ieu lac “Hukum Không khí hacih” piah langyah bruk chất lượng không khí oh siam di taneh ia ini. Bruk nan nyu peih tabiak jalan ka Quốc hội Thái Lan tame bruk ginum biai ka dự thảo hukum meng harei paguh 11/1. Thái Lan daok dalam dom taneh ia hu bruk nerak tachauk alam langik tasik biak trak damak yaok thun. Dalam thun blaoh hu jaik 2 triệu menuac njauk tame labik y tế pasang iek prein yava kayua langik tasik njaom nerak tachauk. Dom menuac khik caga alam langik tasik meng lavik mai hu panuac ieu karja Thái Lan patabiak hukum piah langyah bruk nerak tachauk alam langik tasik. 

Dom paka bahrau pathau khan brei mboh, puac thun 2023 bruk cai pandar di dom baoh sang pak Nhật Bản daok trun biar. Bruk lạm phát tagok glaong ngak ka rahra negar ini njauk kuhri kuhria veik dom bruk cai pandar ka nyu lagaih. Dom baoh sang hu cakak trun dom janih pandap mbang yau ye njam patam, baoh kayau, kayua yaom kaom tagok chit jang. Bruk cai pandar ka pato magru, ô tô jeng mboh trun, dalam tuk dom bruk cai pandar pambuak tal sang danaok trun tal 21%. Bruk rahra rilo mbang trun bruk cai pandar brei mboh bruk patagok veik di gah kinh te Nhật Bản jeng daok kan tagok.

Ong Gabriel Attal bahrau hu pilih ruah pok ngak Thủ tướng bahrau di taneh ia Prang. Ong Attal, umo 34 thun, jeng Thủ tướng ranaih abih di taneh ia Prang kuhria meng dahlau mai. Ong Attal sanya ba mai sa jalan pan akaok karei jang duk haong Thủ tướng dahlau drei lac amuk Borne, urang kumei ka 2 ngak Thủ tướng Prang. Meyah amuk Borne hu taong yaom glaong ka bruk ngak catang saong tapak hatai, ye ong Attal lac menuac hu takre abih dalam Rajaei hadei di tukvak ngak akaok mintri Pato megru, sa labik ngak hu yaom biak praong gah chính trị.