Rajaei bahrau ba tabiak Sarak ka 90 tabiak tanut mek jien tame, dom paka pataom mek, buh tame, oh mek jien, khik ramik saong pandar jien phí dalam jalan mbak, dalam nan, adat hu ndem cambaih tanut mek jien phi pandar dalam jalan mbak nao mai ngan haong yaok radaih. Tui sarak bahrau ini, tanut mek jien phi tuk nduac di jalan mbak pajeng manuac mala 10 kik daok tut angan manuac urang, sang pablei salih hu tanut mek jien lac 130.000 đồng sa bilan. Dom sruh radaih karei tui yaok sruh praong, sit, radaih trak hadom meda hu tanut mek jien meng 180.000 đồng sa bilan tal 1 triệu 40 ribau đồng sa bilan. Taeng radaih katung biak trak gam haong khối lượng brei adat katung meng 40 tấn tagok hu tanut mek jien 1 triệu 430 ribau dong sa bilan.

Sở LĐTB&XH TPHCM bahrau pasang iek 1.300 doanh nghiệp, mboh lac jien thưởng Tết 2024 kuhria rah tapa hu 12 triệu 300 rabau sa urang. Langiu jien thưởng, doanh nghiệp jeng hu brei pandap tết, brei phiếu blei pandap, brei radaih pajeng urang ngak nao palei mbang tết, nao ravang urang ngak gaok kan kandah. Urak ini, dom doanh nghiệp di TPHCM caong hu 25.000 urang ngak piah ngak pandap, pablei salih tuk tết. Piah pabak bruk caong hu di doanh nghiệp, di urang ngak, tukvak tapa, pasak jit vu bruk ngak TPHCM hu peih 7 mbang jao jit bruk ngak. 

UBND tỉnh Bạc Liêu bahrau peih harei pataom mbaok halau janeng, dom urang daong bruk ka dom agama dalam tuk Tết Nguyên đán sak anek inegirai. Di harei taom gaok, dom urang lambaok dom halau janeng, dom urang daong bruk ka dom agama thei jeng brei mboh hatai chraih chrai, uan tabuan anak dom jak jeng bo tỉnh Bạc Liêu ngak hu dalam thun 2023; abih di nyu nan lac bruk pasiam veik gah kinh tế - xã hội, sangka siam ka bruk an sinh xã hội, padang ngak saong pakhang talei jumpataom gauk dalam rahra. Tapa nan, urang pan akaok tỉnh hu alin pandap ka dom halau janeng, dom urang daong bruk ka agama, payua panuac tadhau ayuh siam makre tal abih urang tui agam, dom bangsa dalam tỉnh sa thun bahrau siam makre, chreih chrai, haniem phun saong jak jeng.

Salam uan thun bahrau thun sak anek girai, UBND tỉnh Ninh Thuận peih bruk taom mbaok 100 urang lambaok ka dom nhân sỹ, trí thức, halau janeng dom agama saong urang hu angan je di dom bangsa. Tapa nan, dom urang lambaok brei mboh hatai chreih chrai, uan tabuan anak dom jak jeng, dom bruk ngak hu di tỉnh dalam thun blaoh. Dom urang lambaok jeng hu brei rilo panuac abih hatung hatian, rik daong tame piah ba  kinh tế - xã hội di Ninh Thuận cakrok khang jang dalam tukvak anak tal.

Liên đoàn Lao động tỉnh Bình Dương bahrau peih danak dak “Tết jumpataom - Xuân daong gauk” thun 2024, jao yaok ratuh paok pandap tet daong ka urang ngak gaok kan kandah. Tapa nan, urang pan akaok tỉnh Bình Dương hu jao alin 44,4 tỷ đồng piah ka Liên đoàn Lao động tỉnh sangka daong ka 44.400 urang ngak gaok kan kandah oh nao palei mbang Tết, yaok urang hu daong 1 triệu đồng. Công đoàn dom pakat pak tỉnh Bình Dương daok buh tame phun jien labaih 300 tỷ đồng piah sangka urang ngak saong peih ngak danak dak salao lisei harei Tết ngan haong biak rilo bruk ngak sangka ka uranaih lac anek di urang ngak lahik kayua COVID-19.

Rajaei Israel bahrau brei tapa panuac caong di Mintri Ngak nong taneh ia ini ka bruk brei tagok urang ngak negar langiu rilo jang10.000 menuac. Bruk nan piah pabak bruk kurang menuac ngak gah ngak nong di Israel kayua mesruh gauk. Kuhria meng di tuk bruk mesruh gauk patuh tabiak, menuac dalam taneh ia hu ieu tame lin, jaik abih urang ngak negar langiu nao palei negar di drei veik. Karja Israel brei thau, kuhria tal bilan 7/2023, hu 119.000 urang ngak negar langiu ngak bruk tui harak pambuak bruk di taneh ia ini. 

Rahra bhum Catalonia, gah timun Tây Ban Nha meda pakauk rao radaih saong njuk ia tuh bak binek manei tui dom jalan patak pataom. Dom jalan ngak nan piah trun manieng dom kan kandah di mbang pandiak bhang biak trak damak abih ka oh bhian mboh meng nan mai pak labik Catalonia. Harak pakauk ini meda pambak tal labaih 6 triệu urang daok di 200 palei, ban sit. Dom jaln ngak patak pataom ia hu ba tabiak hadei di tuk  ia di dom binek caik ia trun jaik 16%.

Sa uranaih kumei metai hadei di tuk urang amaik oh caik hatai, klaak anek dalam sa sruh radaih ô tô daok pataok di 1 sang iek ruak di Malaysia. Pathau khan di cảnh sát lac, urang amaik lac menuac ngak di sang iek ruak, taduan raok anek meng nhà trẻ tuk mon 2 biar harei 30/1. Amaik nan var lac anek di drei daok ndih di khagaiy gah likuk radaih saong padam radaih. Tuk pasang ieu phone mai di mon 6 biar harei sup, urang amaik umo 34 thun meng hadar lac anek di drei jeng daok dalam radaih. Yaom lac dom menuac ngak dalam sang iek ruak kham merat abih drei, min anek anaih umo 5 thun nan oh tapa truh hu, nyu matai. Bruk nan daok hu pasang iek, duah thau tui Hukum Uranaih./.