Harei ini 16/10, Sở Pato megru Ban raya HCM brei peih pasang iek bruk mek jien tame, cai pandar jien khik piah jien saong ndap pandar mac moc akaok thun bac 2023-2024 di taong abih dom sang bac pho thong dalam Ban. Brei pataom tame pasang iek dom bruk praong yau ye: bruk khik iek jien mek tame, cai pandar, jak ba urang buh jien tame daong ka bruk pato saong bac jeng yau jien di urang lambaok amaik ame anek saih; pasang iek pandap panda, duk bilik bac, jamraih, samar, piah hu salamat di sang bac. Tapa pasang iek nan piah brei ramik pasiam veik samar tayak, nerak, mbau,  ngak jhak tal prein yawa di anek saih.

Pasak bruk ngak bhum ceik pambuak haong Cty TNHH asar pajaih CP Việt Nam bahrau peih ginum biai di mblang hamu ka pajaih tangei lai CP 519 di huyện Hàm Thuận Nam, tỉnh Bình Thuận. Dalam dom thun tapa, tangei lai lac sa dalam dom phun pala praong di urang bangsa takik daok di tỉnh Bình Thuận. Bruk ba tabiak ngak pajaih tangei bahrau ini, piah ba dom pajaih hu  năng suất glaong tame salih ka dom pajaih klak hu takik baoh. Tapa bruk ngak ini, hu daong salih pajaih tangei lai, jhul patagok bruk pala drak, paglaong raidiuk ka bhap bini bnagsa takik daok dalam tỉnh. 

Mbiah tal puac thun 2022, tỉnh Bà Rịa - Vũng Tàu hu 66 labik dauk ia, tukvak dauk ia dui atah meng 30 - 120 minit. Dalam nan, Ban Vũng Tàu hu tal 36 labik dauk ia. Bruk ba tal dauk ia dalam ban nan kayua  BĐKH, dalam nan kayua hajan praong, tukvak hajan dui atah gam ia ndik tagok glong. Langiu di nan, bruk cak rok patagok do thi  samar, yau nan ye ia hajan oh hu lahik tathuak tabiak. Tui So Padang ngak Bà Rịa - Vũng Tàu, langiu bruk buh jien tame ngak brong tathuak ia, pasiam veik danao ba ia tame tathuak ia tabiak, buh jien tame padang ngak siam jang, yam tal brei ngak sumu gauk dom jalan tathuak ia di dom đô thị.

Viện Quy hoạch thủy lợi gah meraong brei thau, bhum gah mala bhum ĐBSCL daok yam tame mbang ia ndik praong ka 2 di thun. Harei kabroi, ia angaok kraong Hậu di TP Cần Thơ tagok tal 2m, lac tanut báo động 3. Di Ngã Bảy (Hậu Giang) ia tagok 1,54m, glaong jang tanut báo động 3 lac 0,14m. Melam, ia meng kraong Hậu daok nduac tame ngak brei dauk dom jalan praong, sit tapen kraong di TP Cần Thơ. Tui kuhria, ia ndik daok dui atah tal harei 19-10, ia di TP Cần Thơ tagok tal 2,07m, mangaok báo động 3. Piah plaih khat lahik kayua ia ndik, bhap bini njauk pok paglaong saong ngak pakhang ar pacang dom pulao angaok kraong Hậu saong dom ar pacang bhum pala phun mbang baoh

UB bhap bini Ban Thuận An, tỉnh Bình Dương birau tacei pato phường Vĩnh Phú brei thau, ba tabiak jalan pasiam ngan haong 2 tatua njauk ia sua ba theik. Dahlau di nan melam 15/10, hadei hajan khang dui atah ia tagok glong, nduac khang  ba theik  2 tatua bhap bini nao mai tapa ribong di Ban Thuận An. Biak jamo patuah , tukvak rah tabiak bruk nan oh hu thei angaok tatua nan ye  oh njuak hagait tal manuac.  Melam kabroi, hajan praong di ralo labik dalam tỉnh Bình Dương ngak dauk dalam ia. Rilo baoh sang bhap bini, kuan pablei pandap mbang dauk dalam ia yau tasik, ngak khut khat drap ar.

Trung Quốc bahrau ini brei thau, sản lượng padai lai di dom labik ngak iek di tỉnh Tứ Xuyên, gah Tây Nam taneh ia ini hu glaong di abih, tagok tal 1.251 kg yaok mẫu, nan lac labaih 18 tấn sa héc ta. Labik padai lai ngak iek praong abih tih 110 mẫu saong pajaih hu pala lac “Liliangyou 8022” hu maong lac padai siam abih di Trung Quốc. Dom jalan ngak yau ye tam drak aval saong lapih, tam tui talei hu tacei tabiak blaoh, pasang iek taneh saong buh khak tui jalan khik ramik  pasang iek halak halin, ruak kik.

Mentri Y te Lào brei thau, urang ruak SXH di taneh ia ini kuhria tal harei 12/10 tagok labaoih 30.000 mbang, hu 17 urang metai. Dalam nan, tỉnh Oudomxay hu rilo urang ruak abih ngan haong 5.000 mbang. Gah Y te Lào  iew bhap bini brei hu jalan piah pacang caga ruak, abih di nyu lac dalam bilan hajan meng bilan 5 tal bilan 10, nan lac tuk jamoh pambak ruak XSH caik mebaoh ralo. Thun 2013, Lào hu urang ruak SXH ralo abih kuhria labaih 44.000 mbang, dalam nan hu 95 urang metai.

Bruk bầu cử di Ba Lan hu menuac nao buh phiếu rilo di abih kuhria dalam 30 thun tapa, lac jaik 73% cử tri nao buh phiếu. Kayua menuac mai buh phiếu saong duah thau hatai sahneng di rahra rah tabiak sa mbang haong gauk glaong di abih ngak ka bruk kiểm phiếu rah tabiak suai jang duk haong kuhria dahlau. Hu dom cử tri praong thun brei thau, oh ka tuk halei, kuhria gam saman bao cấp tuk urang dang xếp hàng cang blei ralow jeng oh ka hu menuac dang xếp hàng atah yau nan. Bruk bầu cử tui kuhria hu khan brei thau dalam harei paguh 17/10.