Mintri Lao động thương binh saong xã hội (LĐTB-XH) bahrau hu harak pathau khan tagok Phó Thủ tướng Trần Lưu Quang – Akaok Ủy ban pakat negar pacang caga AIDS, jru phin, mại dâm – ka bruk dom urang daok klak njil jru phin klak nduac dauk di Labik klak njil tỉnh Sóc Trăng. Piah khik siam makre saong pacang caga bruk ini rahtabiak gilac veik, Mintri LĐTB-XH ieu kakei UBND tỉnh Sóc Trăng pato tacei Công an tỉnh Sóc Trăng payua kapul ngak bruk đặc trách, daong khik tani tanat, siam makre an ninh trật tự di labik klak njil ini. Gam tui di nan, pasang iek dom pandap panda, radaih, urang ngak di labik klak njil, piah hu jalan langyah pasam veik, pabak tui hatai caong di peih ngak bruk klak njil jru phin.

Tui UBND tỉnh Đồng Nai, tal jhung bilan 12/2023 dalam tinh Đồng Nai hu labaih 880 jabat sự nghiệp công lập, trun labaih 120 saong labaih 3500 biên chế dut haong thun 2015. Piah paglaong kein laba bruk ngak di dom jabat sự nghiệp công lập, tỉnh Đồng Nai hu panuac likau TW oh cakak trun 10% biên chế di dom gah yau: pato megru, y tế, lao động; samar patabiak dom sarak, jalan ngak, tacei pato tanut hadom menuac ngak bruk di yaok labik ngak piah hu jalan brei thau ka biên chế di dom labik đơn vị sự nghiệp.

Mbang nyaom biai pambuak haong doanh nghiệp ngak kong, pablei salih, ngak nong tui kong nghe glaong EuroCham - tỉnh Bình Phước meda rahtabiak di harei 12/3 anak tal. Bình Phước urak ini hu 13 labik ngak kong ngan haong mblang taneh praong 4.686 ha. Tal urak ini, Bình Phước dui pachreih hu labaih 410 danak dak hu phun jien negar langiu buh tame ngan haong phun jien tut angan lac 4 tỷ 245 triệu USD. Bình Phước hu saong daok jhul khang bruk cak rok patagok bruk ngak nong tui kong nghe glaong ngan haong labaih 440ha taneh pala pandar kong nghe glaong. Min, dut saong rilo bhum palei dalam tinh ye bruk ngak mbang, pala drak di Bình Phước jeng daok takik.

Labaih 10 thun dahlau, TP Hồ Chí Minh hu 4 danak dak labik pataok radaih gah ala haluk pambuak saong bruk pablei salih di quận 1, lac mblang bein Lê Văn Tám, sân khấu Trống Đồng, mblang bein Tao Đàn saong sân vận động Hoa Lư. Tui nan hu labik pataok ka labaih 6.000 ô tô saong 4.000 radaih patuh. Min taong abih 4 danak dak jeng oh ka hu peih ngak. Sở jalan mbak pajeng ba hu harak payua dom gah pambuak tal, pasang iek dom kan kandah tavak tavaiy di 4 labik ngak labik pataok radaih gah mala haluk ini, piah ban raya hu jalan langyah ka nyu lagaih saong njuak adat hukum.

Di dom bhum palei di bhum taneran kraong Cửu Long, abih di nyu nan lac pak Cà Mau, langik pandiak biak khang saong bilan thu tal aval jang ngak ka rilo glai kanyik hala saong thu lagu. Yaok piluh ribau ha glai daok dang anak bruk mbuan khuah glaong, dalam nan hu labaih 2 ribau ha mbuan si khuah pakat 5, lac pakat biak kan kandah abih. Chi Cục Kiểm lâm Cà Mau ieu kakei dom po glai, abih di nyu nan lac glai U Minh Hạ saong glai bhum kaoh pulao Hòn Khoai, rami ramik kapul saong dom sruh radaih piah pacang khuah, padam khuah; samar pacang  saong ngak hu siam tuk hu bruk khuah glai.  

Harei 29/2, Tổng thống Nga Putin puac harak Thông điệp Liên bang 2024. Pilih ruah tukvak jaik tal harei pilih ruah urang ngak Tổng thống Nga hu peih tabiak di kreh bilan 3, ong Putin hu puac harak Thông điệp Liên bang dalam angan lac Tổng thống gam lac ứng cử viên Tổng thống. Ong Putin ndom lac: Nga brei padang sa kiến trúc jien padai dunya. Thun 2023, kinh tế Nga tagok samar jang dunya. Nga meda jeng sa dalam 4 nền kinh tế praong abih di dunya dalam dom thun tal.

Hạ viện Mỹ hu brei tapa sa hukum kadung jien kanja tạm thời piah ka rajaei liên bang oh njauk kareik pabah mbang meng harei sanecar adit ini. Hadei di Hạ viện, hukum ini jeng hu ba tabiak buh phieu brei tapa di Thượng viện dahlau di tuk hu payua tagok Tổng thống Mỹ mbaoh tangin jeng hukum. Ini lac mbang ka pak quốc hội Mỹ njauk brei tapa sa hukum kadung jien katut harei piah daong ka dom jabat liên bang daok hu ngak bruk dalam thun jien padai 2024 hu peih tabiak meng  bilan 10 thun blaoh.

Takik di abih 43 urang matai dalam mbang khuah khang di ban ine Dhaka di Bangladet harei kabroi (29/2). Dalam sa pathau khan hu ba tagok mangaok mạng xã hội X, Akaok Mintri Nội vụ taneh ia ini brei thau, pui khuah tuk melam blaoh di sa nhà hàng dane angan di pasak pablei salih. Gah padam pui ba hu 75 urang tabiak truh labik khuah nan. Oh ka thau pui khuah kayua halei./.